Tơdroăng pơkâ kơxô̆ 80-NQ/TW dêi Khu xiâm ngăn cheăng kal kí hneăng 13 ‘na mơnhông túa lĕm tro Việt Nam tung pơkâ mơ’no hlá mơ-éa ahdrối Hneăng hôp kân Đảng roh má 14 mơhno tối ki khŏm mơ-eăm kân khât dêi Đảng tung hnoăng cheăng tah lôi tíu ki tơvâ, ki kreăng ‘na hnoăng cheăng pơkuâ, ‘na ivá xiâm, pơtối mơdêk ó rơdêi ivá ki trâu rơdâ tung mơdêk ‘na túa lĕm tro, mơjiâng ivá cheăng ó rơdêi ki nếo, thăm mơdêk tung mơdêk mơnhông rĕng, krá tơniăn tơnêi têa tung chal mơnhong ki nếo.

Tơdroăng pơkâ mê ai chêh tối mơnhên, hnoăng cheăng dêi tơmeăm khoăng khôi túa lĕm tro ngăn ga trối tơmeăm khoăng ki xiâm vâ mơjiâng túa lĕm tro ki djâ troăng ahdrối, trâu rơdâ ‘na khôi túa, vêa vong dêi hdrông kuăn ngo tung chal ki nếo. Tơdroăng pơkâ mê vêh mơnhên tơmeăm khoăng túa lĕm tro ai tá tơmeăm khoăng ƀă ai tá tơdroăng, cho ki xiâm, ki râng tơvế khôi túa, lĕm tro ki kơnía pơkal athế châ rak vế, pơtối mơnhông ai pơxúa kân khât vâ mơnhông krá tơniăn ton. Tung troăng pơkâ kố, hnoăng ki kring vế ƀă pơtối mơnhông tơdroăng kơnía ‘na túa lĕm tro ôh tá xê to hnoăng cheăng pơtối mơdêk hnoăng cheăng roh vâi krâ nah mê ga hiăng châ pơkrâ tung môi hnoăng cheăng krá tơniăn ton mơnhông tung hên kơvâ cheăng, krá kâk ai tơdjâk troh ƀă tơdroăng hnê mơhriâm, rêh ối pơlê pơla, ‘na pêi cheăng kâ, ki rơhêng vâ tối tung pơla vâ tơrŭm cheăng tung lâp plâi tơnêi ƀă xúa cheăng kơxô̆ chal nếo.

Mâu hdrông kuăn ngo Bru, ối tối cho Vân Kiều, Chứt hiăng rêh ối ton hơnăm a kong pơlê Quảng Bình sap ing chal vâi krâ roh nah a kong pơlê Quảng Bình, hdrối nah, nôkố cho Quảng Trị. Tíu kố, hiăng ai tơmeăm khoăng, tơdroăng ki kơnia git dêi khôi túa lĕm tro, ai tơdjâk ƀă kong kế, ngo ngối kơpong kơdung ngo Trường Sơn, kroăng têa, tơnêi tíu ƀă túa lĕm tro tung rêh kâ ối dêi pơlê pơla. Hnoăng ki kring vế, rak ngăn tơmeăm khoăng ôh pa khoh chiâng tơklâ lôi hnoăng ki rak vế tơnêi tíu, kơpong túa lĕm tro dêi pơlê kơtâo, hnoăng rak vế ngăn kong kế, loăng pơlái, kơnhŏng têa ƀă túa rêh kâ ối tiô khôi hmâ vâi krâ roh nah. Ki xiâm dêi Tơdroăng pơkâ kơxô̆ 80 NQ-TW dêi Khu xiâm ngăn ‘na cheăng Kal kí vêh mơnhên, ‘măn chôu, pơtối mơnhông túa lĕm tro tung tơrŭm cheăng kâ-rêh ối ga kal tơtro, tơxâng ƀă tơdroăng ki ai xêh ƀă châ mơnhông krá kâk, ton xŏn la ngiâ.

Pôa Đinh Văn Chờ-Mơngế ki rơkê hnoăng vâi krâ nah, hdrông kuăn ngo Chứt, ối a pơlê Hoá Lương, cheăm Kim Điền, kong pơlê Quảng Trị ai tối tiah kố, i hiâm mơno ki sap ing nah ôh tá ai la lâi pơhlêh dêi Tơdroăng pơkâ mê, xo kuăn mơngế cho ki xiâm, tung mê, pơlê pơla cho ki xiâm, ki păng ‘nâng vâ pơkâ pêi pro tiô túa hloh hlê rơkê plĕng ƀă kring tơrak tơmeăm khoăng ki kơnâ, tơdroăng kơnía git roh vâi krâ nah. Pôa Đinh Văn Chờ ai tối:

“Tuá lĕm tro cho ki xiâm dêi i hiâm tuăn, i hiâm mơno mơnhôk mơdêk tơdroăng mơnhông dêi pơlê pơla. Kơnôm châ Đàng ƀă Tơnêi têa tŏng gum, ngăn khât, hdrông kuăn ngo Chứt ngin phiu ro, ga ai pơxúa kân khât ki kân vâ ing mê châ pơtối mơnhông, ‘măn chôu ki kơnía git túa lĕm tro dêi mơngế Chứt. Ing pơlê cheăm troh a tíu xiâm tơnêi têa, pro trối lâi mê pơkal athế đi đo tŏng gum, ngăn khât troh tơdroăng, tơmeăm khoăng dêi kuăn pơlê hdrông kuăn ngo, ki rế hlo rế hía tơ’lêi vâ hía long lôi, kal athế ai troăng hơlâ, troăng pơkâ i tơtro, ai túa ki pơtối pơtó, hnê tối, hnê ‘măn, hnê mơjiâng ăm rơxông kơ’nâi vâ pơtối châ rak vế ƀă mơnhông mâu tơdroăng, tơmeăm khoăng ki mê”.

Vêh ngăn mơnhên a kong pơlê Dak Lak, tung Tơdroăng Tơkêa bro Kring vế ƀă mơnhông ki kơnía git tơdroăng-tơmeăm khoăng dêi tơnêi têa tung lâp kong pơlê kố ing hơnăm 2023-2025 hiăng ai troăng hơlâ ki mơ’no hnoăng cheăng, túa pêi pro ki nhên cho vâ kring vế, pơcháu hnoăng cheăng ƀă pơtối mơdêk mâu ki kơnía git, ki lĕm tro má môi dêi 3 tơdroăng-túa lĕm tro dêi tơnêi têa, trối: Rơngê rơngối dêi mơngế Rơđế, Nâl tơpui tơcho dêi mơngế Rơđế ƀă Tĭng rơkâu rêh ton hơnăm dêi mơngế M’Nông. Ki nhên ga po mâu lâm hnê hriâm ‘na tơdroăng-tơmeăm khoăng dêi tơnêi têa; mơjiâng mâu hnoăng cheăng, pơkâ pêi pro pơtối chôu ‘măn, pơtối mơdêk tơdroăng, kế tơmeăm ai tơdjâk troh ƀă hnoăng cheăng mơnhông pêi cheăng kâ-pêi lo kế tơmeăm-rêh ối pơlê pơla dêi kong pơlê; mơjiâng ƀă tơkŭm po mâu tơdroăng cheăng, pêi pro mâu túa cheăng ki rơkê plĕng tung mơdêk ki kơnía git dêi túa lĕm tro tơdroăng-tơmeăm khoăng tơnêi têa, hnối pêi pro adrêng ƀă ôm hyô pơlê pơla, pơtối mơdêk hnoăng cheăng ki xiâm dêi tơdroăng-tơmeăm khoăng, mô mơnêi tơkŭm po mâu tơdroăng ki mơđah, tơbleăng tơmeăm khoăng-tơdroăng tung rêh kâ ối rêm hâi tung pơlê pơla, tung leh mơdĭng, tung mâu tĭng chiâk deăng-rêh ối, tung mâu hnoăng cheăng tơ’mot tơmối mot ôm hyô, po rơdâ túa lĕm tro ki krip ro ƀă hên hĕng mâu tơdroăng ki ê.

Klêi kơ’nâi pêi pro mâu hnoăng cheăng ki tơtro mê hiăng gum ăm kuăn pơlê châ xúa dêi tơmeăm khoăng ƀă pơtối châ rak vế ƀă mơnhông khôi túa, vêa vong ki lĕm tro dêi pơlê pơla tơná. Jâ H’Ring Mlô, hdrông kuăn ngo Rơđế, ối a ƀuôn Mgăm, cheăm MDrak, kong pơlê Dak Lak ai tối tiah kố, kơnôm ai Đảng ƀă Tơnêi têa, vâi krâ-nhŏng o, kuăn pơlê ôh tá xê to châ hluăn ing kơtiê mê ối ai ivá vâ kâi châ rak vế, pơtối mơnhông khôi túa, vêa vong dêi kuăn ngo tơná:

“Hngêi á achê troăng kân, á ai mơjiâng hngêi trá. Á rơhêng vâ po hngêi mơdró ôu kâ, pế pơchên dêi hmê kơchâi hdrông kuăn ngo Rơđế, trối pế drôu xiâm kal athế tơrŭm ƀă tơdroăng ki mơđah tôu chêng tôu koăng vâ châ pơtối rak vế dêi khôi túa, vêa vong hdrông kuăn ngo tơná. Hngêi á xuân ai klâng, ai chiâk tâ tá, á xuân pêi pêt hên mâu hdrê loăng plâi kâ”.

Mâu troăng hơlâ ki nếo tung koxop hlá mơ-eá ki kal dêi Hneăng hôp  kân Đảng roh má 14 mê cho ‘măn chôu, rak vế tơdroăng-tơmeăm khoăng tung hneăng cheăng ki krá ó rơdêi ton xŏn la ngiâ, tŭm têk ‘na túa tơlá lĕm tro ƀă kuăn mơngế Việt Nam. Mơnhông túa lĕm tro ƀă kuăn mơngế Việt Nam tro tiô hiâm mơno Hneăng hôp kân 14 dêi Đảng cho môi tung mâu hnoăng cheăng ki pêi pro adrêng, tơ’mô, to hơto, môi tiah, tơxâng pơla rak vế khoi túa lĕm tro vâi krâ nah ƀă mơnhông túa rêh ối-pêi cheăng tiô chal nếo nôkố.

Kơxop hlá mơ-éa ki kal dêi Hneăng hôp kân má 14 dêi Đảng xuân hiăng vêh mơnhên 12 troăng prôk ki kân; 6 hnoăng cheăng ki kal ƀă 3 hnoăng cheăng krá rơdêi ton xŏn. Hnoăng cheăng pêi pro mê hiăng vêh mơnhên mâu hnoăng ki vâ kô chiâng pêi pro tơdrêng, pêi pro hlối. Tung mê, pơkâ ‘na túa lĕm tro ƀă kuăn mơngế cho ki xiâm dêi i hiâm tuăn dêi pơlê pơla, ivá ó rơdêi ing tơná kuăn mơngế, kơxô̆ mơngế, kế tơmeăm, ƀă ivá ki mơnhông dêi tơnêi têa.

Pôa Mai Xuân Thành-Phŏ Kăn ngăn Túa lĕm tro, Tơ’noăng Ivá ƀă Ôm hyô kong pơlê Quảng Trị tối ăm ngin ‘nâi, ki păng ‘nâng a mâu pơlê cheăm, kơpong kong ngo, hnoăng ‘măn chôu, rak vế túa lĕm tro dêi hdrông mơngế kuăn ngo ki iâ mơngế kâi tơrak krá kâk drêng mâu tơdroăng-tơmeăm ki mê ai tơdjâk troh mơjiâng cheăng pêi, lo kế tơmeăm, liăn ngân tơniăn ăm kuăn pơlê.

“Ai mâu troăng pơkâ ‘na troăng tơdjâ tơveăng gum ăm mâu vâi krâ-nhŏng o ki ối rơkê rak vế tơdroăng vâi krâ roh nah, malối tung hnoăng cheăng rak vế, hnê mơhriâm, pơtối mơnhông mâu tơdroăng, tơmeăm khoăng ki kơnía git dêi hdrông kuăn ngo ki rêh ối tung kơpong kố. Pơkal athế thăm mơdêk tuăn i hiâm ăm mâu kuăn pơlê thăm rơkê plĕng, ăm vâi thăm rế hâk tơngôu dêi túa lĕm tro, rơtế ƀă Tơnêi têa veăng rak vế, ‘măn chôu mâu ki kơnía git dêi túa lĕm tro mê. Pêi pro tro mâu tơdroăng pơkâ dêi Luât rak vế Tơmeăm khoăng, rak tơniăn ăm mâu pơlê cheăm pơtối châ chôu ‘măn, thăm mơdêk ki kơnía dêi tơmeăm khoăng-tơdroăng túa lĕm tro tiô pơkâ dêi Luât rak vế tơmeăm khoăng-túa lĕm tro”.