Tung pơla tâng idrâp chêng koăng ki chuât xơtó, mâu vâi droh Rơđế chôa ‘lâng lo a drôu xiâm, chôa ‘lâng tung túa ki kơhnhon xuăng krếo ôu drôu tiô khôi hmâ. Tơrêm hvêa chêng, ing túa ki ki kơhnhon xuăng rơpâ rơmuăn trối tơdroăng ki koh pơ’lâng kơ khu xeăng ƀă mâu ngế ki mơnê nhuô̆m. Tuá kơhnhon xuăng krếo ôu drôu mê hmâ hlo tung pơla tĭng rơkâu hâk suâ kâ báu nếo, tĭng rơkâu kơno têa, tĭng rơkâu ivá mo lĕm, pơkoăng ƀă mâu  mơdĭng tiô khôi hmâ dêi pơlê pơla. Tíu ki kơhnhon xuăng mê cho hngêi trá xŏn hơniâp ro, a plông tâng idrâp chuât xơtó ro rih, lơ achê kĭng vó drôu, tíu ki tơdjêp pơla mơngế ƀă pơlê pơla ƀă xiâm kối dêi hdrông mơngế Rơđế. Pôa Y Kŭt Niê, ôí krếo cho pôa Nang, ối a ƀuôn Prao, cheăm MDrak, kong pơlê Dak Lak tối ăm ngin ’nâi:

“Tiô khôi túa, vêa vong dêi hdrông Rơđế xuăng krếo ôu drôu cho túa xuăng ki pơlê ai tơdroăng hơniâp ro, drêng hiăng ai drôu xiâm, ôh tá khoh xuăng drêng tung rơpŏng hngêi nếo ai mơngế hía. Vâi krâ roh nah hmâ tối tiah kố, cho tíu ki tơkŭm mâu vâi droh rơtăm rơtế tơkŭm, tâi tâng pơlê pơla rơtế vêh troh hơniâp ro akố”.

Tuá kơhnhon xuăng krếo ôu drôu dêi mơngế Rơđế châ mơhno tối ƀă mâu túa ki kơ’grâu xuăng chôa ‘lâng, ƀă tơdroăng ki kơhnhon chêng tơdrêng, tơdâng tâ tá drôu xiâm. Péa pâ kơpeăng kŏng rơmuăn, tơtro khât tung tơrêm túa ki hnhó kŏng, têk kŏng vâ krếo djâ vâi krâ ôu drôu xiâm, xuân ai tá tơdroăng ki koh tơdah ki mơnê nhuô̆m. Méluâ ôh tá eâ ai pro ki klâi krip hên, túa kơhnhon xuăng mê ối cho túa ki ôh tá păng lôi tung tơdroăng ki ahdrối vâ rơkâu xối  ƀă vâ mơhno tối ‘na khôi túa, vêa vong, mơhno  hiâm mơno koh nhuô̆m kơ khu xeăng ƀă mâu tơmối. Tơdrêng ƀă tơdroăng kơhnhon xuăng mê cho idrâp chuât ki hơniâp ro dêi chêng, ƀă rơ-rêk chêng ki chôa ‘lâng, tơdrêng, ing mê mơjiâng chiâng tíu ki krih tơviah la tâ hơniâp ro, tơtro khât tiô khôi hmâ dêi túa kuăn ngo.

Pôa Y Klôt Ƀuôn Yă, ối tối cho pôa Thảo, ối a ƀuôn Hra Ea Ning, cheăm Dray Bhăng, kong pơlê Dak Lak tối ăm ngin ‘nâi, kơhnhon xuăng krếo ôu drôu dêi mơngế Rơđế cho vâ mơhno tối ki lĕm tro dêi hiâm mơno mơjo pâ, hlế rơkê kơ tơmối, cho kơxái ki vâ tơdjêp pơla mâu ngế tung pơlê pơla, tơdrêng amê, ối vâ mơhno tối hiâm mơno pơlê pơla loi tĭng kơ khu xeăng. Ing túa kơhnhon xuăng mê, mơngế Rơđế vâ mơhno tối hiâm mơno loi tơngah, tơdroăng koh mơnê ƀă pói rơhêng vâ ‘na tơdroăng rêh ối hơniâp ro, phâi tơtô.

“Klêi kơ’nâi pêi pro kêi tơdroăng ki rơkâu xối a kơno têa, rơkâu xối ivá mo lĕm kô ai tơdroăng ki kơhnon xuăng krếo ôu drôu tung tuăn mơno pói rơhêng vâ vâi krâ-nhŏng o tung pơlê pơla ai hên tơdroăng ki hơniâp ro bă phâi tơtô. Mê cho rơkong ki vâ rơkâu xối kơ khu xeăng ngo, xeăng têa, mơhúa jâ nôa tơmâng idrâp chêng, drêng hlo túa kơhhon xuăng mê kô rơtế vêh hơniâp ro ƀă vâi krâ-nhŏng o tung pơlê cheăm tơná”.

Pôa Y Klôt Ƀuôn Yă tối ăm ngin ‘nâi thăm tiah kố, mơngế ki xuăng hmâ sâp ếo pơtâk tiah khôi hmâ dêi mơngế Rơđế. Tiô khôi túa roh nah, ahdrối vâ ôu drôu xiâm, hdrối vâ bêng têa mê athế lăm xo têa a kơno têa ki krúa, dâ ƀă plôi, ôh tá khoh lăm hnêng têa ing tíu ki ê, xua mê cho têa ki tĭng.

“Tâng rơkâu xối ai 3 xiâm drôu mê athế ai 3 ngế xuăng, tâng ai 7 to xiâm drôu mê athế ai 7 ngế kơhnhon xuăng. Hmâ hlo mâu ngế ki xuăng mê ai ing 5 ngế troh tơngi klêng, ƀă hmâ lối 1 ngế, ôh tá chiâng tơ’mô tơpéa ngế. Roh vâi krâ nah, hdrối vâ ôu drôu xiâm, têa ki bêng tung vó mê, athế cho têa ki xo ing kơno têa ƀă plôi khăng, ôh tá khoh lăm hnêng têa ing mâu tíu ki ê”.

Xuăng krếo ôu drôu ôh tá xê to tơdroăng ki vâ rơkâu tĭng, mê ối cho khôi túa ki lĕm tro, tíu ki mê ối ai tơdrá chêng koiăng, tơdroăng ki tơtro ƀă tơdroăng ki loi tĭng tiô khôp. Tơrêm hvêa chêng, ing tơdroăng hnhó kŏng, têk kŏng pơrá ai tơdroăng ki mơnê nhuô̆m, mơhno tối tơdroăng ki tơrŭm pơla kuăn mơngế ƀă kong kế, ngo ngối, khu xeăng ƀă pơlê pơla. Pơla idrâp chêng ki chuât xơtó mê ƀă idrâp tó ki hơniâp ro dêi pơlê, dêi tơmối ki châ tâ, châ ‘nâi tơdroăng ki phâi tơtôu, tơdroăng ki mơnê nhuô̆m ƀă krih tơviah dêi chôu phut ki lĕm ro dêi Tây Nguyên.