Klêi kơ’nâi leh tơdah, pôa Lương Cường, Kăn xiâm hnê ngăn tơnêi têa prế pôa pôa António Costa, Kăn xiâm hnê ngăn Hô̆i đong châu Âu hiăng pơxiâm hôp tơpui tơno. A rôh tơpui tơno mê, pôa Lương Cường, Kăn xiâm hnê ngăn tơnêi têa ăm ‘nâi: Tơrŭm cheăng pơla Việt Nam – EU dế mơnhông tơniăn, ai pơxúa ƀă tŭm têk.

Loi tơdroăng cheăng kal kí châ ‘mâi mơnhông ƀă mơdêk ƀă EU ƀă mâu kong têa tơrŭm cheăng. Cheăng kâ – tê mơdró – ‘no liăn pêi cheăng cho tơdroăng mơnhông xiâm dêi tơrŭm cheăng. Tơrŭm tung mâu kơvâ cheăng mơnhông trâu hơngế, malối tơrŭm ‘na khoa hok, kong ngê̆ ƀă pơhlêh nếo tơmiât pêi rơkê, hiăng ƀă dế chiâng môi tung mâu tơdroăng cheăng xiâm, cho tơrŭm cheăng tung la ngiâ pơla Việt Nam ƀă EU ƀă mâu kong têa tơrŭm cheăng.

Peăng tơná, Kăn xiâm hnê ngăn Hô̆i đong châu Âu - pôa António Costa ăm ‘nâi, Việt Nam ƀă EU cho kong têa tơrŭm rơtế ai hiâm mơno tơmiât pêi môi troăng, môi tuăn tung tơdroăng loi nhuô̆m hên kơvâ cheăng, tơniăn lâp plâi tơnêi, tê mơdró tơniăn krê ƀă mơnhông ngăn tung mâu tơdroăng ki tơƀrê kố.