Ôh tá tơhrâ la châ trâm, mâu hâi vâ chê tâi hơnăm ton, têt vâ chê troh, phiu ro Đảng, hâk rơnó Hơngui, ngin troh a thôn Phú Hữu, cheăm Hòa Thịnh, tíu ki tro têa kân lân lu ó peăng mâ hâ Lo kong pơlê Dak Lak klăng a hâi rơpŏng nâ Lê Thị Kim Ngân ai kơdrâm kơdrĕng nhŏng o troh tơkŭm amê. Kăn ƀô̆, Kŏng an Đồng Nai, Khu vâi kơdrâi pêi viâ hnoăng cheăng tơnêi têa dêi Kŏng an kong pơlê Dak Lak troh diâp tơmeăm ăm rơpŏng ki ai toăng hngêi tuăn pâ. Nâ Ngân phiu ro xua kơxuô tơmeăm tuăn hơ-ui pâ tung mâu hâi ki ro kố:

“Á phiu ro păng ‘nâng, nôkố ôh tá ‘nâi tơpui ki klâi xếo. Mâu xăng, mâu tăm troh rơkâu têt akố, rơkâu mâu ngoh nâ hơnăm nếo kố ai ivá mo krá, têi ‘răng ƀă phiu niu, tơniăn lĕm’’.

Xuân ai mâ tung hâi hbru ăm hngêi ối ki nếo pro mê, pôa Trương Văn Lành, Kăn pơkuâ hnê ngăn Đảng ủi cheăm Hòa Thịnh phiu ro, hơniâp tối tơbleăng, tíu ki tro têa kân lân lu sap nah troh nôkố tá hâi chói hlo, la nokố, a tíu kố hiăng châ mơdâng pro hngêi trăng ki nếo, krá lĕm. Cheăm Hoà Thịnh dế tung troăng prôk vêh ‘mâi pro hngêi nếo, troăng klông nếo tâi tâng.

“Hâi kố, mâu ngoh nâ troh akố mê ro ‘nâng, ôh tá ai xếo tơdroăng xía vâ, tơdroăng ki kong mêi têa kân lân lu, ki sap nah tá chói hlo, ‘na rêh ối dêi kuăn pơlê akố hiăng vêh tiah hmâ tiah hdrối nah nếo. Mê cho kơnôm ing hnoăng pơkuâ, hnoăng hnê tơdjâ dêi mâu khu râ kăn pơkuâ hnê ngăn Đảng, ki tơrŭm tá khu cheăng kal kí, tơdroăng ki tơdjuôm ivá dêi mâu khâu ai hiêm mơno ‘nâi hơ-ui pâ, tŏng gum mơngế hliăng tiâ, pá puât châ xông tơniăn môi tiah hâi kố’’.

Kơtăn hngêi nâ Ngân kơtăn to lâi ƀăng klâng cho Đô̆i 13 thôn Phú Phong, tíu ki tro têa kân lân lu, rơlêa râ ó má môi, xuân cho tíu ki pôa Phạm Minh Chính, Ngế pro xiâm hnê ngăn tơnêi têa hiăng troh lăm ngăn ƀă pơkâ thế vêh mơjiâng pro hngêi trăng, thâ rĕng pro tơdrêng hlối, tối cho “Cheăng pêi thâ Quang Trung”. Pơla mê nah, cho mâu hngêi trăng ki tơ’nhê tơ’nhĕng, rơlâm tơhnâp, mê hâi kố, xuân a tíu ki kố, hiăng châ ai hngêi trăng ki nếo, hiăng rĕng châ sôk suâ kâ ôu mơgêi hơnăm ton, hnối to dêi hngêi nếo. Trối pôa Trần Văn Khánh hiăng tơkŭm po ôu kâ mơgêi hơnăm ton. Troh nôkố, pôa hiăng to ối dêi tung hngêi tơniăn, hbrâ tơdah Têt ƀă hên mâu tơdroăng cheăng a la ngiâ.

“Nôkố, ngin hiăng pơhlêh tung hneăng rak ngăn klâng chiâk, hbrâ tăng rôe phon, trâ văng nhâ kơ’noăng klâng, xôh pơkeăng, pêt tơmó báu ƀă hbrâ hdrê reăng, hdrê loăng vâ tơdah têt, klêi mê, rak ngăn krâu khât kơdrum klâng chiâk, kơdrum deăng. Tâng vâ ối tơdjuôm, rơpŏng á ai hên tơdroăng thế pêi pro ‘nâng’’.

Ai hngêi trăng, tơniăn ‘na klâng chiâk cho nguân khât, pôa Trần Văn Khánh ối hmâ krếo cho Trần Quốc Khánh. 4 ngế kuăn kơnốu ai inâi cho Hoà, Hội, Nghĩa, Nam… tiô chư Tơnêi têa ‘’Kŏng hòa – Xã hội – Chủ nghĩa – Việt Nam’’. 5 toăng hngêi dêi rơpŏng 5 ngế kuăn: Quốc Khánh, Cộng Hòa, Xã Hội, Chủ Nghĩa, Việt Nam châ mơjiâng ing tơdroăng “Cheăng pêi thâ Quang Trung”, hiăng xông mơ-eăm, krá tơniăn nếo a klâng báu drêh lĕm.

Tiô ngoh Trần Chủ Nghĩa, tơdroăng vêh mơjiâng ing tơdroăng pro hngêi kân rơdâ, krá lĕm ki Ngế pro xiâm hnê ngăn tơnêi têa thế pro, ôh tá xê pơtroh ăm to hngêi trăng ki nếo, vâ kuăn pơlê vêh mơjiâng tơdroăng rêh ối, mê ối mơnhông tuăn i hiâm mơno tơmiât tơdroăng nếo.

“Tâng vâi sĭng khéa mê vâi ôh tá ‘nâi chiâng pêi ki klâi, xua troăng tơmiât đi đo athế mơnhông dêi rêh ối. Ôh tá mơnhông mê “Tếo mô đŏng” méluâ hiâ to lâi xuân chiâng hngăm. Pin phiu ro,  tuăn tơmiât hleăng, mâ ngăn tơleăng, mê pin pêi ki klâi xuân lĕm tro tâi tâng, ôh ta tâ tơbrê tơbroh’’.

Tung mâu hâi ki kố, phiu ro Đảng, hâk ro rơnó Hơngui, ngoh Trần Chủ Ngĩa méluâ ối tơvâ tơvân ƀă tơdroăng lêm tơ’nôm kuâ pa ngiâ hngêi, hding tâi tâng plông peăng ngiâ hngêi vâ pro tíu tơdah tơmối, ‘măn rơxế. Ngoh Nghĩa xuân chân krá i hiâm mơno, pêi dêi nhên, rơhí rơhó, krâ tơ’nôm 2 klŏng meăm thĕp a 2 trăng vâ pro tíu chuâ hlá cơ. Ngoh tối, tơdroăng chuâ hlá cơ tơnêi têa a hngêi ki nếo a kơpong châ vêh mơjiâng pro hngêi trăng tơniăn, klêi têa kân lân lu kố, cho tơdroăng ki kơnía:

‘’Thế chuâ 2 hlá cơ a trăng ƀă bo péa mê ăm i lĕm. Vâi hlo ai hlá cơ mê gá nếo tối OK hôm cho há? Ƀă peăng pá tá cho hngêi pâ á. Hơnăm kố pôa 45 hơnăm Đảng, á xuân lối chât hơnăm Đảng há?

Tung mơngiơk rơnó Hơngui Bính Ngọ pêng păm to tơdroăng phiu ro, sôk suâ, mê cho phiu ro Đảng, hâk ro rơnó Hơngui, mâu hlá cơ tum kơneăng a ngiâ bo hngêi trăng ki nếo ôh tá xê to tơbleăng mơhno hâi Têt hiăng tơniăn, ai tŭm hngêi trăng, kế tơmeăm, mê ối cho mơhno mơnhên ăm i hiâm mơno pói vâ, mơjiâng túa rêh ối, cheăng kâ  la ngiâ krá tơniăn a tơnêi nah tro têa kân lân lu ó.