Khu kăn pêi cheăng cheăng dêi kong pơlê Gia Lai xua jâ Nguyễn Thị Thanh Lịch, Phŏ kăn hnê ngăn Vi ƀan kuăn pơlê dêi kong pơlê pro ngế xiâm pơkuâ djâ khu kăn nếo troh pôu, rơkâu Têt ăm mâu tíu pêi cheăng ƀă rơpŏng hngêi mâu ngế ai hnoăng tơnêi têa a peăng mâ hâi Lu kong pơlê.

Khu kăn hiăng rơkâu Têt ăm 25 rơpŏng ki ai hnoăng a mâu cheăm: Ia Rbol, Ia Rsai, Uar, Ia Dreh ƀă Phú Túc, rêm rơpŏng châ diâp 1 kơxu tơmeăm dêi kong pơlê ăm ƀă 2 rơtuh liăn mâ. Pôa Ksor Chuel krâ pơlê ối a buôn Rưng Ama Nhiu, cheăm Ia Rbol, Gia Lai ăm ‘nâi:

“Rơpŏng á xuân môi tiah rơpŏng vâi krâ nhŏng o ki ê tung pơlê, tơdroăng rêh ối rế tơniăn ƀă rế xông kro mơdrŏng tâ, Hngêi ki lâi xuân ai tơdroăng rêh ối phâi tơtô, hơniâp. Pakĭng mê, Đảng Tơnêi têa đi đo tơmâng khât troh tơdroăng rêh ối dêi mâu hdroâng kuăn ngo a tung kơpong Tây Nguyên. Tung la ngiâ, á púi vâ Đảng ƀă Tơnêi têa pơtối tơmâng khât tâ nếo, ai tơ’nôm mâu luât pơkâ ki pơxúa khât vâ kuăn pơlê kuăn ngo hmiân tuăn pêi cheăng kâ, vâ tơniăn tung rêh ối ton ta ah”.

-Ƀă kuăn pơlê mơngế M’Nông a cheăm Nâm Nung (kong pơlê Lâm Đồng) – kơpong đông kăch măng tung tơplâ xâ nah kố hiăng pơhlêh hên. Nôkố, kuăn pơlê tung cheăm dế mơnhông cheăng kâ ing loăng kơphế, tiu, báu klâng ƀă rak khôi túa lĕm tro hdroâng kuăn ngo.

Krê a ƀon Ja Rah, kuăn pơlê mơngế M’nông ối rak châ 20 khu chêng ƀă 30 ngế đi đo tôu chêng koăng tung mâu tơdroăng cheăng dêi pơlê; 30 ngế đi đo teăn ếo pơtâk, teăn pong chêa. Tâi tâng mâu rơpŏng pơrá rak xiâm drôu vâ pế drôu xiâm vâi krâ nah. Mâu tơdroăng po leh hô̆i dêi mơngế hdroâng kuăn ngo M’Nông môi tiah rơhdruê hdroâng, pro klông putm t’rưng ối châ rak tŭm tâi tâng.

Pôa Y Nkrơm (hdroâng kuăn ngo M’Nông) ối a ƀon Ja Rah, cheăm Nâm Nung, kong pơlê Lâm Đồng mơnhên, tơdroăng rêh ối nếo hơtô, tơniăn lĕm cho tơdroăng ki châ tơƀrê ‘na tơdroăng tơrŭm môi tuăn, mơ-eăm xông tơtêk dêi kuăn pơlê mâu hdroâng kuăn ngo tíu kơpong kăch măng hơnăm mê nếo.

‘’Hơnăm kố pêi cheăng kâ nếo xuân pêi lo hên tâ hơnăm nah. Rơpŏng ai 1 sao klâng pêt báu pôe châ 20 kơxâk. Ƀă kơphế châ 5 tâ̆n, pêi lo châ hên mê á tâ hâk ro. Hơnăm kố tê lối 100 rơtuh liăn, liăn kơxô̆ liăn mơ’no rôe phon rơvât u ối lối vâ mơ’no liăn ăm hơnăm ah ƀă rôe tơmeăm khoăng tung rơpŏng hngêi, u ối 20 – 30 rơtuh liăn hbrâ tơdah Têt vâ phiu ro rơtế kuăn pơlê tung pơla Têt tiô khôi vâi krâ nah, mê tơkŭm po ôu kâ krếo nhŏng o troh; mâu rơpŏng gum dêi pó pêi drôm tung pêi chiâk deăng dâng 10 rơpŏng, ƀă nhŏng o, pú hmâ troh ôu kâ rơkâu sôk ro hâi Têt rơkâu pêi kâ rế hía rế hôm tâ mê nếo’’.