Khu kăn ki lăm ngăn, séa ngăn tơdroăng cheăng tâ phĭu pôk kăn Kuô̆k hô̆i hneăng XVI ƀă kăn Hô̆i đong hnê ngăn kuăn pơlê rêm râ xua Đăi tươ̆ng Lương Tam Quang, Ngế cheăng tung xiâm pơkuâ tơdroăng cheăng kal kí, Ngế xiâm ngăn Kŏng an pro ngế xiâm pơkuâ djâ khu kăn kố nếo ai rôh pêi cheăng ƀă Vi ƀan tâ phĭu pơlê kong kơdrâm Huế. Đăi tươ̆ng Lương Tam Quang tơmâng xo, mơnhên tối khât tơdroăng ki hbrâ rơnáu pêi krâu dêi pơlê kong kơdrâm Huế tung tơdroăng cheăng hbrâ rôh tâ phĭu.

Tơdrêng amê hlối pơkâ thế pơlê kong kơdrâm Huế pơtối pơkâ kơtăng mâu tơdroăng hnê mơhno dêi Tơnêi têa, malối tơtrŏng rak vế gâk kring cheăng kal kí, tơniăn tung lâp pơlê pơla, tơniăn tơdroăng tơbleăng ƀă tơniăn tơdroăng tung pơla tâ phĭu, pôi tá ăm tro kơdrâ tung mâu tơdroăng.

“Tơdroăng cheăng hbrâ rơnáu tơkŭm po tâ phĭu dêi pơlê kong kơdrâm Huế hiăng châ tơbleăng tŭm têk, kơtăng, teăm tơdrêng, pêi châ tơdroăng pơkâ pêi pro. Má môi. cho hnoăng cheăng pơkuâ, tơbleăng pêi rôh tâ phĭu hiăng châ tơbleăng sap ing hdrối ƀă hiâm mơno pêi pro rĕng, kơtăng, tro tơdroăng, tro hâi khế pơkâ, tro pơkâ mơ’no vâ rak tơniăn tơdroăng tơkŭm po tâ phĭu tơniăn krê, tơdrăng. Hiăng tơkŭm po ƀlêi chiâng Rôh hôp má môi hiăng môi tuăn ‘na tơdroăng pơkâ rah xo, mâu ngế ki châ rah xo, kơxô̆ ngế ki châ rah xo tơbleăng inâi vâ to pro kăn Kuô̆k hô̆i, kăn Hô̆i đong hnê ngăn kuăn pơlê rêm râ. Tơdroăng tơkŭm po rôh hôp má péa hiăng châ hbrâ rơnáu nhên”.

A Dak Lak, Vi ƀan tâ phĭu kong pơlê xuân hiăng tơkŭm po hôp má 5 tơkŭm tơbleăng tơdâng tơ’mô hên tơdroăng cheăng ki kal, rak vế tơniăn tơdroăng tơkŭm po tâ phĭu ƀă tơdroăng ki tơ’lêi hlâu ki kal ăm rôh tâ phĭu pôk kăn Kuô̆k hô̆i hneăng XVI ƀă Kăn Hô̆i đong hnê ngăn kuăn pơlê rêm râ hơnăm 2026 – 2031 po tơniăn lĕm, tro luât.

Tiô tối tơbleăng dêi Vi ƀan tâ phĭu kong pơlê Dak Lak, troh nôkố, tơdroăng cheăng hbrâ ăm rôh tâ phĭu a kong pơlê hiăng pêi châ tơƀrê hên tơdroăng. Khu hnê mơhno tơdroăng cheăng tâ phĭu kong pơlê tơkŭm po hôp má pŭn, pơkâ mâu tơdroăng tối tơbleăng mơgêi vâ hnê mơhno tung plâ rôh tơkŭm po tâ phĭu. Hô̆i đong hnê ngăn kong pơlê mơjiâng 11 khu lăm ngăn, mê kô lăm ngăn a 102 to cheăm, bêng vâ teăm ‘nâi nhên tơdroăng ƀă tŏng gum xơpá a cheăm bêng mê tâng ai.

Khu ngăn kong pơlê cheăm bêng ƀă hnoăng cheăng dêi mâu kăn ƀô̆ ăm lối 15 rơpâu ngế kăn a 103 tíu tâ phĭu tung lâp kong pơlê, tơkŭm tung túa pơkâ hôp chêh inâi kuăn pơlê ƀă tơdroăng ki riân phĭu. Tơdroăng hôp châ tơbleăng tro pơkâ, tung mê, Rôh hôp má péa râ kong pơlê hiăng môi tuăn ƀă inâi chêh dêi 22 ngế vâ to pro kăn Kuô̆k hô̆i ƀă 144 ngế vâ to pro kăn Hô̆i đong hnê ngăn kong pơlê. A râ cheăm, tung lâp kong pơlê tơdah xo lối 4.600 hồ sơ ngế ki vâ tơbriât to pro kăn, ai mâu ngế ki ‘nâ vâi chêh xêh inâi vâ pro kăn tiô pơkâ.

Tơpui a rôh hôp, jâ Cao Thị Hòa An, Ngế cheăng tung Khu pơkuâ xiâm Đảng, Phŏ pơkuâ ngăn Đảng, Kăn hnê ngăn Hô̆i đong kong pơlê, Kăn hnê ngăn Hô̆i đong Tâ phĭu kong pơlê Dak Lak tối nhen, tung la ngiâ ah mâu tíu pêi cheăng kal tơkŭm tro tơdroăng ki xo rơkong tơpui dêi kuăn pơlê tíu kuăn pơlê ối ƀă ngế ki châ chêh inâi vâ to pro kăn, tơdrêng amê, hlối thăm mơnhông rak vế gâk kring tơniăn, mơdêk hnê tối ƀă pêi pro klêi tơdroăng vâ rôh tâ phĭu châ tơkŭm po tơniăn, tro luât, cho hâi leh kân dêi tâi tâng kuăn pơlê.

“Mặt trâ̆n, mâu khu râ, kơvâ cheăng cheăng kal kí, pơlê pơla athế tơkŭm tung tơdroăng ki tŏng gum kuăn pơlê kâ Têt châ hơtôu, châ phâi, châ tŭm, châ hơniâp ƀă ai tíu xah hêi tơniăn. Tung tơdroăng la athế kơdĭng ƀă tơtro dêi Têt khôi hmâ. Tŏng gum tung mâu tơdroăng hnê tối rôh tâ phĭu, vâ hlo kuăn pơlê pôu râng dêi hnoăng ƀă hnoăng kuăn pơlê ƀă pôu râng dêi ngế ki châ pôk. Á pơkâ thế pó athế pêi tro hnoăng cheăng hnê tối ro Hơngui – hâk phiu Đảng – hâk phiu tơnêi têa la athế pêi pro troh hâi leh kân dêi tâng tâng kuăn pơlê dêi hâi tâ phĭu”.

A rôh hôp má 54 dêi Vi ƀan pơkuâ cheăng Kuô̆k hô̆i pơla kố nah hiăng séa ngăn, tơbleăng Pơkâ ‘mâi pơhlêh rôh má péa troăng pơkâ, khu ngế, kơxô̆ ngế dêi kơ koan, khu tơrŭm, tíu pêi cheăng a tơnêi têa ƀă kong pơlê châ tơbleăng vâ to pro kăn Kuô̆k hô̆i hneăng XVI. Tơpui a rôh hôp, pôa Trần Thanh Mẫn, Kăn xiâm hnê ngăn Kuô̆k hô̆i tối nhên: Hâi lơ 15/3 kô po Rôh tâ phĭu pô kăn Kuô̆k hô̆i hneăng XVI ƀă kăn Hô̆i đong hnê ngăn rêm râ hơnăm 2026 – 2031.

Ing rôh pêi cheăng séa ngăn hbrâ ăm rôh tâ phĭu a Tơbăng kroăng Cửu Long pơla hdrối kố nah, tiô Kăn xiâm hnê ngăn Kuô̆k hô̆i, mâu kong pơlê xoăng cheăng nhên, hlối mơnhên tối tối Vi ƀan xiâm Măt trâ̆n tơnêi têa Việt Nam hiăng tơkŭm po hôp ƀlêi chiâng rôh má môi, má péa. Tung la ngiâ ah, kăn xiâm hnê ngăn Kuô̆k hô̆i pơkâ thế mâu kơ koan ki ai tơdjâk thăm mơnhông tâ nếo hnoăng cheăng séa ngăn, vâ teăm hnê mơhno mâu tơdroăng ki trâm; Hô̆i đong tâ phĭu Tơnêi têa tơkŭm pơkuâ, hnê mơhno rơkê tro. Malối tung hnoăng cheăng hôp môi tuăn rôh má pái la ngiâ.