Mâu hâi ki kố, a mâu thôn tung kơpong tíu pêi cheăng Lý Sơn, kong pơlê Quảng Ngãi, cheăng hnê tối ‘na tâ phĭu pôk kăn Kuô̆k hô̆i ƀă Hô̆i đong hnê ngăn rêm râ dế châ tơbleăng pêi kơtăng, tơkŭm pêi pro nhên ki pơxúa, hnoăng pơkuâ ƀă hnoăng dêi kuăn pơlê. Ki hên kuăn pơlê kal vâ ‘nâi plĕng, tơdroăng púi rơhêng vâ dêi tơná. Pôa Nguyễn Văn Huy, Kăn hnê ngăn kơpong tíu pêi cheăng Lý Sơn, kong pơlê Quảng Ngãi ăm ‘nâi, kơpong kố dế hbrâ rơnáu nhên mâu tơdroăng ki kal, cho hnê tối vâ kăn ƀô̆, đảng viên ƀă kuăn pơlê ‘nâi tŭm tơdroăng ki kal dêi rôh tâ phĭu; tơdrêng amê hlối vâ pro tơniăn ‘na gâk kring, tơniăn tung mâu tơdroăng ki tơ’lêi hlâu vâ kuăn pơlê pêi pro hnoăng tŭm hnoăng dêi tơná.

“Nôkố, cheăm hiăng tơkŭm po hôp tơkêa rôh má môi, ing mâu inâi chêh mâu kăn ƀô̆, kông chưk ƀă mâu tíu pêi cheăng ki ối tung pơkuâ ngăn Đảng kơpong tíu pêi cheăng pơkuâ ngăn vâ ăm ai troăng hơlâ veăng chêh inâi pro kăn. Tơdrêng amê hlối hnê tối trâu hngế vâ mâu kăn veăng nâp hô sơ. Troh nôkố hiăng tro túa pơkâ Vi ƀan Tâ phĭu pơkâ mơ’no”.

A cheăm Nghĩa Hành, kong pơlê Quảng Ngãi, cheăng hôp tơkêa, xo rơkong tơpui tối dêi kăn ƀô̆, kong chưk, viên chưk ƀă kăn mâu thôn dế châ tơkŭm po tơniăn lĕm, tơdrăng, tro pơkâ. Tơdroăng ki tơbleăng inâi ngế vâ to pro kăn a mâu thôn châ hbrâ rơnáu krâu ing rôh hôp tơpui tơno ‘na tơdroăng pơkâ ai tŭm tơdroăng ki vâ pro kăn, túa rêh ối lĕm ƀă ivá pêi cheăng rơkê. Khu cheăng Măt trâ̆n mâu thôn ƀă Vi ƀan tâ phĭu cheăm Nghĩa Hành tơkŭm hôp xo rơkong veăng tơpui tối dêi kuăn pơlê tíu rêh ối dêi ngế chêh inâi vâ pro kăn.

Pôa Lê Quang Thu, Kăn hnê ngăn Vi ƀan Măt trâ̆n Tơnêi têa Việt Nam cheăm Nghĩa Thành, kong pơlê Quảng Ngãi ăm ‘nâi, ki rơkê plĕng dêi ngế kăn cho tơdroăng ki kal má môi.

“Vâ tơdrăng tung pơla tơbleăng mơhno ngế kăn Hô̆i đong, kơ koan teăng mâ pơkâ thế mâu tíu pêi cheăng pêi pro tơdrăng ăm tâi tâng kăn ƀô̆, kong chưk, viên chưk. Ƀă ngế ki chêh dêi inâi vâ pro kăn a thôn, Khu cheăng ‘na Măt trâ̆n tơkŭm po krếo thế kuăn pơlê ƀă mâu chi hô̆i, khu râ vâ tơbleăng tơdrăng nhên ngế châ tơbleăng ăm inâi vâ pro kăn”.

Tung lâp kong pơlê Quảng Ngãi ai 4 tíu tâ phĭu pôk kăn Kuô̆k hô̆i, pôk xo 11 ngế kăn; 21 tíu tâ phĭu pôk kăn Hô̆i đong hnê ngăn kong pơlê, pôk xo 66 ngế kăn. Râ cheăm, hiăng pơkâ ‘na kơxô̆ tíu tâ phĭu ƀă kơxô̆ ngế kăn châ pôk ƀă tâi tâng ai 683 tíu tâ phĭu. Cheăng tơkêa rôh má môi châ tơbleăng pêi tro pơkâ ƀă tơbleăng tŭm troh mâu kơ koan ki ai hnoăng pơkuâ.

-Kơpong hngêi mơhno túa lĕm tro thôn Đông An Hải, kơpong tíu pêi cheăng Lý Sơn, kong pơlê Quảng Ngãi

Jâ Y Bích Thọ, Phŏ hnê ngăn Vi ƀan Măt trâ̆n Tơnêi têa Việt Nam kong pơlê Quảng Ngãi ăm ‘nâi, Măt trâ̆n rêm râ pơkuâ pêi pro tŭm, pêi kơtăng 3 rôh rôh hôp tơkêa tiô Luât pôk, vâ tơniăn tro, tơdrăng lĕm sap ing rôh ki tơbleăng tối inâi ngế pêi cheăng.

“Tung pơla rôh tơkêa, Vi ƀan Măt trâ̆n Tơnêi têa Việt Nam kong pơlê Quảng Ngãi malối ngăn nhuô̆m khât tơdroăng ki ai tŭm a ngế ki vâ tơbleăng inâi, tơdrêng amê hlối rak tơniăn tơdroăng pơkâ tơtro ƀă kơvâ cheăng kơnốu lơ kơdrâi, rah xo, hơnăm, kuăn ngo, tơdroăng tiô khôp, tơdroăng cheăng kâ rêh ối tung pơlê pơla; tro ƀă tơdroăng pơkâ, tơdroăng ki rơkê a ngế kăn cho xiâm. Tơdroăng xo rơkong mơnhên tối, pôk dêi kuăn pơlê a tíu ngế ki mê rêh ối tíu pêi cheăng cho kal khât, mơhno nhên hiâm mơno, tơdroăng púi vâ dêi Kuăn pơlê”.