Nâ Đỗ Thị Mỹ Duyên, 24 hơnăm, ối a bêng Buôn Ma Thuột, kong pơlê Dak Lak ăm ‘nâi, măng pơlê pơla nôkố hlối cho tíu ki trâm tơpui tơno, xah po ngăn, hlối cho tíu ki po ngăn mâu tơdroăng nếo ai. Malối, tung pơla kong prâi po ôh tá tơniăn, têa lân lu, khía mơhot kân, tŏng kum tơdrêng mê măng pơlê pơla cho tíu ki tối ăm ‘nâi hên tơdroăng. Ki ôh tá lĕm dêi tơdroăng tối ăm ‘nâi mê ‘na tơdroăng ton ƀă tơdroăng ki nếo tơvât tơvĕng, hên drêng ‘nâ ôh tá tro khât. Sap rôh kong mêi kân têa lân lu pro tơ’nhiê Tây Nguyên - Nam Trung bộ, nâ Duyên hmâ xúa hên măng pơlê pơla ƀă hlo  fanpage dêi mâu Kong an, hlối tơniăn hlối rĕng, hên tơdroăng há ƀă tơxâng loi khât. Ing mê, nâ Đỗ Thị Mỹ Duyên chiâng đi đo po ngăn  trang ki mê:

“A hmâ mot po ngăn  facebook, tung mê a hmâ po ngăn trang dêi kong an Dak Lak. A mê hmâ đăng um, tơdroăng ton tơdroăng nếo ai, tơdroăng mâu ngế pro xôi luât drô troăng prôk. Lơ nếo achê kố cho hên um ‘na tŏng gum mâu ngế trâm xía vâ, tŏng gum kuăn pơlê a kơpong tro têa lu a mâu cheăm peăng mâ hâi Lo (kong pơlê Phú Yên ton). A xuân đi đo tơbleăng nếo, ƀă á tâ hmiân tuăn ôh tá xâu tơdroăng tối mê ôh ti xê”.

Pêi pro tiô hnê mơhno dêi Khu xiâm Kong an ‘na tơdroăng pơ’lêh kơxô̆, xúa khoa hok kong ngê̆ tung tơdroăng cheăng, mâu tíu pêi cheăng dêi Kong an kong pơlê Dak Lak xuân pro fanpage. Ing mê, mâu kong an mơdêk hnê tối, hnê ‘na luât; tơdah xo mâu tơdroăng kuăn pơlê pơtroh ăm, veăng pro tơniăn ƀă tơplâ mơdât mâu tơdroăng ki ôh tá tro. Trung tă Trần Viết Nghĩa, Đô̆i trưởng Đội hnê tối, hnê  mơhno dêi Ƀơrô Cheăng  Kal kí Kong an kong pơlê Dak Lak ăm ‘nâi, fanpage “Kŏng an kong pơlê Dak Lak” xua tíu pêi cheăng pơkuâ, nôkố ai lối 121.000 ngế po ngăn, vâ chê  9 rơtuh ngế  chêh êng. Ôh ti xê đăng tơbleăng to mâu tơdroăng hnê ‘na luât, kring tơniăn pơlê pơla, tơdah xo mâu tơdroăng kơ-êng tiâ, tối ăm ‘nâi ‘na mơngế ki ai xôi ing kuăn pơlê, mê ối cho tíu ki tơbleăng tơdroăng krếo thế tơrŭm dêi rơpó, hơlêm dêi rơpó, kum dêi rơpó mâu kuăn pơlê ki trâm pá xua kong prâi pro ôh tá tơniăn.

“Tung rôh kong mêi têa lân lu kố nah, a cheăm Hòa Thịnh ai môi ngế kơdrâi dế hbrâ vâ mơhum kuăn ngá la ôh tá ai troăng prôk, tâ tá to têa lu. Tơdroăng mê châ ngin teăm đăng tung fanpage ƀă kơ’nâi mê, mâu khu tŏng gum mơngế xơpá dêi Kong an Hoà Thịnh troh hlối, rĕng djâ ngế nôu lăm troh a hngêi pơkeăng teăm mơhum kuăn ngá. Tiô a tơmiât kố cho kơjo tŏng kum teăm tơdrêng, ai pơxúa ing  fanpage troh kuăn pơlê”.

Môi fanpage pêi cheăng tơƀrê ki ê dêi Kong an Dak Lak cho “Ƀơrô Kăn sát gak troăng prôk Dak Lak”.  Fanpage kố nôkố châ lối 33.000 ngế po ngăn, ƀă lối tơdế rơtuh ngế po ngăn rêm khế. Kố cho ƀâng hnê tối ‘na Luât prôk drô troăng; teăm po ngăn vâ ‘nâi mâu tơdroăng tơdjâk troh pro tơniăn drô troăng prôk ƀă tơniăn pơlê pơla. Ing  fanpage, Ƀơrô Kăn sát gak troăng prôk ối tơdah xo um, clip ki kuăn pơlê xup xo tối ‘na mâu ngế pro xôi luât prôk drô troăng, tê mơdró tơmeăm ki mơdât tá ăm tê... Trung tă Nguyễn Khiếu Nam Vũ,  ngế pơkuâ ngăn ‘na trang chêh tối mâu tơdroăng mê  dêi “Ƀơrô Kăn sát gak troăng prôk Dak Lak” tối ăm ‘nâi:

“Tíu pêi cheăng hiăng ai tơ’nôm môi ƀâng tối ‘na tơdroăng tơdah xo mâu tơdroăng kuăn pơlê tối. Ing mê, Ƀơrô hiăng pơxâu phâk vâ chê 100 ngế pro xôi luât, ƀă tâi tâng kơxô̆ liăn lối 300 rơtuh liăn. Pơtih: Pơla tơdế khế 12 kố nah, ing tơdroăng ăm ‘nâi dêi kuăn pơlê chêh tung trang fanpage ƀă clip 2 toăng rơxế chơ tơmối kơtâu têi luâ tơdroăng pơkâ, ngin hiăng séa ngăn, mơnhên ƀă pơxâu phâk 2 toăng rơxế chơ tơmối ki pro xôi luât. Mê cho, xua pôa Đ. V. P., ối a cheăm Tuy Đức, kong pơlê Lâm Đồng, vế rơxế ô tô krâ kơxô̆ 48B-000.XX, tro pơxâu phâk 5 rơtuh liăn ƀă trừ 2 điêm a ƀâng vế rơxế”.

Tâi tâng mâu tíu pêi cheăng ƀă kong an dêi 102 to cheăm, bêng dêi Kong an kong pơlê Dak Lak  xuân hiăng pro fanpage, hên trang ki ‘nâ tơ’mot hên mơngế ngăn, ai fanpage ki ‘nâ châ hrĭng rơpâu ngế tiê vâ ƀă ngăn. Tơdroăng ki đăng mê châ hriăn tơmiêt pro tŭm têk, hên túa, ing hnê ‘na luât, bro tơniăn troh mâu tơdroăng tŏng gum mơngế xiá vâ, tơbleăng ăm hên ngế ‘nâi mơngế ki lĕm pro tơdroăng lĕm ƀă tơtrâ mâu tơdroăng ôh tá tro. Pôa Nguyễn Quốc Hiệp, Phŏ pơkuâ ngăn Tíu xiâm mơhno túa lĕm tro, Tơ’noăng ivá ƀă ôm hyô kong pơlê Dak Lak tối, kố cho túa hnê tối tơtro ƀă troăng hơlâ pơ’lêh kơxô̆ nôkố:

“Tung la ngiâ, Tíu xiâm pơtối tơrŭm cheăng pêi tơƀrê tâ nếo ƀă mâu tíu pêi cheăng tung mâu lêng Kong an kong pơlê Dak Lak vâ mơdêk thê tối troh lâp lu tâ nếo, kum kuăn pơlê châ rĕng ‘nâi teăm tơdrêng mâu tơdroăng tung fanpage dêi mâu lêng Kong an troh ƀă kuăn pơlê. Pơtối tơbleăng, mâu trang mê troh kuăn pơlê, malối cho kuăn pơlê a kơpong hơngế hơngo, kơpong kuăn ngo, ‘nâi mâu trang fanpage kố hên tâ”.

Ki khât ăm hlo, mâu fanpage dêi Kong an Dak Lak ôh ti  xê  to ƀâng tối tơdroăng kal tung măng, mê hiăng chiâng xiâm ki tơdjêp achê, loi nhoăm pơla mâu lêng kong an ƀă kuăn pơlê. Amê, mâu tơdroăng nếo ai châ rĕng troh tơbleăng ăm hên ngế ‘nâi, hlối tro, nhên; tơdroăng ki kuăn pơlê tối châ rĕng tơmâng, teăm tơdrêng, veăng rak tơniăn, tơbleăng tơdroăng xiâm vâ râk vế ” xua kuăn pơlê pơxúa ăm kuăn pơlê” tung rơxông pơ’lêh kơxô̆.