Kơchâi hyô̆ng cho hdrê kơchâi hmâ tăng hlo, ga hmâ huăn a kĭng têa kroăng, lơ pá kơdâm kong tơnêi hngiâm. Vâi krâ kuăn pơlê hdrông Bơhnéa hmâ lăm tăng kêi kơchâi hyô̆ng plâ hơnăm. Vâi hmâ lăm kêi a kơxo má drêng ối ai têa ngêa krêa a hlá, ga vâ chôu iâ ƀă kâ ga rơngiâp lĕm tung châ. Ki kơhiâm má môi vâi hmâ kriê kơbâng, hlá drêh lĕm. Klêi kơ’nâi kriê xo ing kong djâ vêh a hngêi vâi xếo krúa lĕm, tơkôm ăm ga xĭng têa. Jâ Y Giang ối a Plei Tơngia, bêng Đăk Cấm, kong pơlê Quảng Ngãi ai tối ‘na túa pế pơchên tơpoăng ƀă kơchâi hyô̆ng kố:

“Kơchâi hyô̆ng mê pin athế kriê a kơxo má, ối krêa têa ngêa, kriê a kơxo má mê ga ối rak ki vâ hơ-iâ, chôu i iâ, kơhiâm há. Tơpoăng mê athế pêi ăm i li, rơbĕn lĕm, tơkôm têa hiăng tơnăm mê pin râm tơpoăng chôa ‘lâng, ‘vâl chôa ‘lâng, tơ’mô mê têa tơpoăng ga kô hnăng lĕm tơpoăng kô kơhiâm”.

Tơpoăng vâ pế mê hmâ trâm hlo cho tơpoăng phái lơ tơpoăng alâi. Klêi pế tơpoăng, hdro têa ki chat a kơnoh on tơkôm ga tơnăm ‘nôi mê nếo râm chôa ‘lâng tơpoăng, rế râm rế ‘vâl tơ’mô vâ tơpoăng ôh tá tơkâ. Klêi mê, nếo râm kơchâi hyô̆ng, râm tơ’nôm po, ƀôt ngot ƀă mâu tơmeăm ki ê. Ngăn tiô kơ rơpŏng hngêi, xuân chiâng vâ râm tơ’nôm ƀă ká têa kroăng, hjuô lơ iâ hơ’nêh, la tâng pế kơchâi hyô̆ng ki tơpoăng, ôh tá râm mâm cho kơchâi ki hmâ trâm hlo hên a mâu rơpŏng hngêi.

Ki pin hmâ kâ tơpoăng kơchâi hyô̆ng mê ga hơ-iâ, kơhiâm, kâ hmâ lŏn. Jâ Y Lat, ối a Plei Tơngia, bêng Đăk Cấm, kong pơlê Quảng Ngãi tối ăm pin ‘nâi:

“Tơpoăng kơchâi hyô̆ng cho kơchâi ki hmâ kâ dêi mơngế Bơhnéa ing chal vâi krâ roh nah. Kơchâi ki kâ rêm hâi ƀă hmê, mê bu kal ai kơchâi hyô̆ng ƀă tơpoăng mê rơpŏng hngêi kô ai kế kâ ki kơhiâm. Tâng ai tơ’nôm hơ’nêh lơ ká pế ƀă mê kâ ga kô thăm rế kơhiâm tâ nếo. Pế tơpoăng aă kơchâi hyô̆ng kố athế pê chôa ‘lâng, ôh tá khoh thâ rĕng luâ râ, ‘vâl chôa ‘lâng, ‘vâl hên hdroh mê kơchâi tơpoăng nếo kơhiâm khât”.

Tung tơdroăng rêh ối rêm hâi dêi pơlê pơla, tơpoăng kơchâi  hyô̆ng mê hmâ ai tung rôh kâ hmê dêi rơpŏng hngêi, klêi kơ’nâi lo lăm pêi chiâk pêi deăng, lơ tung mâu hâi ki tơkŭm ôu kâ tơdjuôm dêi pơlê. Kơchâi ki pế mê hmâ chôu ‘măn a tơdế leăn hngêi, rêm ngế pơrá ối hvât tâ tá, rơtế kâ, rơtế tơpui tơno. Kơchâi ki kố ôh tá xê to vâ păn roăng ivá châ chăn kuăn mơngế, mê ối cho vâ tơdjêp, tơrŭm pơla mâu ngế tung rơpŏng hngêi ƀă pơlê pơla.

Hâi kố, méluâ tơdroăng rêh kâ ối dêi vâi krâ-nhŏng o hdrông Bơhnéa hiăng ai hên ki pơhlêh, hên kế kâ ki nếo, laga tơpoăng kơchâi hyô̆ng xuân ối châ rak vế ƀă pơtối ối kâ rêm hâi, ngăn mê cho khôi túa, vêa vong dêi hdrông kuăn ngo akố.