Plông hngêi hôp kân dêi thôn Đoàn, cheăm Lak hiăng châ rơnuâ lĕm krúa. Ƀă inâi chêh “Koh hâk rôh tâ phĭu pôk Kăn Kuô̆k hô̆i hneăng XVI ƀă Kăn Hô̆i đong hnê ngăn Kuăn pơlê rêm râ, hơnăm 2026 - 2031”  châ tâ krâu lĕm a bo péa. Pôa Huỳnh Quang Phấn, Ngế pơkuâ thôn Đoàn, cheăm Ia Lốp ăm ‘nâi:

“Thôn Đoàn rôh kố tơdah vâ chê 300 ngế kuăn pơlê lăm tâ phĭu pôk kăn Kuô̆k hô̆i ƀă kăn Hô̆i đong hnê ngăn Kuăn pơlê rêm râ a hâi lơ 15/3 la ngiâ. Vâ ăm cheăng ta phĭu, thôn hiăng mơhnhôk vâi krâ nhŏng o gum môi hâi pêi cheăng tơrŭm ƀă khu kŏng an, khu lêng ƀă mố đô̆i gâk tơkăng kong gum môi hâi pêi cheăng, ‘mêng pro hô̆i trương, kơƀăng tăng, vâ ăm tơniăn lĕm tơnêi tíu, pro châ tiô tơdroăng púi vâ dêi hâi tâ phĭu pôk kăn”.

Pôa Bùi Sỹ Đông a thôn Đoàn tối, sap ing lo ing kong pơlê Bến Tre troh a kơpong tơkăng Dak Lak pêi cheăng, rêh ối sap ing vâ chê 30 hơnăm hdrối, kố cho rôh tâ phĭu rôh má 5 pôa veăng lăm tâ phĭu pôk kăn Kuô̆k hô̆i ƀă kăn Hô̆i đong hnê ngăn kuăn pơlê rêm râ. Ƀă pôa, cheăng veăng châ gum ivá ăm hâi leh kân kố đi đo cho tơdroăng ki hâk tơngăm khât:

“Hneăng tâ phĭu pôk kăn Kuô̆k hô̆i, Hô̆i đong hnê ngăn kuăn pơlê la ngiâ, á xuân tơngah kô pôk xo mâu kăn ki ai tŭm hiâm mơno lĕm, tuăn ngoâ rơkê plĕng, hriâm lâm kân vâ pơkuâ djâ vâi krâ kuăn pơlê ngin; teăng ăm hiâm mơno púi rơhêng vâ, djâ rơkong tơpui dêi kuăn pơlê troh ƀă Đảng, ƀă Tơnêi têa, vâ mâu tơdroăng ki hêng hôu, dế hlo trâm hên a kong pơlê châ tơleăng tơtro. Tơdrêng amê hlối, tơmâng ngăn troh mơjiâng pro troăng prôk xuân môi tiah tíu khăm pơlât a kơpong tơkăng kong klêi kơ’nâi ‘mot tơkŭm”.

Hneăng tâ phĭu pôk kăn Kuô̆k hô̆i hneăng XVI ƀă kăn Hô̆i đong hnê ngăn kuăn pơlê 2 râ, hơnăm 2026 - 2031, a cheăm tơkăng kong Ia Lốp, kong pơlê Dak Lak ai 4.600 ngế kuăn pơlê lăm tâ phĭu. Pôa Nguyễn Duy Trung, Phŏ pơkuâ ngăn Đảng ủi cheăm Ia Lốp ăm ‘nâi, cheăm hiăng mơjiâng 4 tíu tâ phĭu ƀă 10 tôh tâ phĭu a mâu thôn, xoăng liăn vâ roê mâu tơmeăm, pơtroh khu kŏng an, mố đô̆i gâk tơkăng kong, khu lêng kuăn pơlê rak tơniăn a kơpong tơkăng kong hdrối, tung ƀă klêi kơ’nâi tâ phĭu, tơmiât troh hneăng tâ phĭu tơniăn, ƀlêi chiâng.

“Cheăm hiăng mơjiâng pro mâu tơdroăng ki hnê tối ‘na cheăng tâ phĭu vâ mơ’no tung mâu loa dêi cheăm, ƀă tơdroăng kal châ mơ’no péa xôh tung hâi ‘no a kơxo ƀă a kơxê. Mơjiâng mâu tôh tâ phĭu, hbrâ rơnáu mâu tơdroăng tơmeăm tơniăn tro má môi ăm hneăng tâ phĭu pôk Kăn Kuô̆k hô̆i hneăng XVI ƀă Hô̆i đong hnê ngăn kuăn pơlê 2 râ hơnăm 2026 – 2031 a hâi lơ 15/3 la ngiâ ah”.

Ia Lốp cho môi tung 4 to cheăm tơkăng kong a tơnêi peăng mâ hâi Lâ kong pơlê Dak Lak, tơkoh ƀă kong pơlê Mondulkiri (kong têa Kul). A cheăm ai đông mố đô̆i gâk tơkăng kong 735 (Ea H’Leo), ối tung Khu pơkuâ mố đô̆i gâk tơkăng kong, kong pơlê Dak Lak. Trung tă Trần Ngọc Kiên, Phŏ pơkuâ đông mố đô̆i gâk tơkăng kong 735 ăm ‘nâi, pakĭng hnoăng cheăng rak vế krá rơdêi hnoăng pơkuâ, gâk kring tơkăng kong tơnêi têam kăn ƀô̆, mố đô̆i tíu pêi cheăng ối veăng rak vế gâk kring tơniăn hdrối, tung ƀă klêi kơ’nâi Hneăng hôp Đảng rôh má XIV, xuân môi tiah hneăng tâ phĭu pôk kăn Kuô̆k hô̆i hneăng XVI ƀă kăn Hô̆i đong kuăn pơlê rêm râ.

“Đông mố đô̆i gâk tơkăng kong Ea Hleo hiăng tăng ‘nâi plĕng ăm râ ủi, kăn pơkuâ kong pơlê séa ngăn, rah xo ƀă hbrâ rơnáu tŭm mâu tơmeăm xúa a mâu tíu tâ phĭu; pơtroh khu lêng veăng mơgrúa lĕm, rơnuâ, hbrâ mâu loa, tâ ƀăng-rôl, chư chêh; tơdrêng amê hlối pơtroh khu ki rak vế, vâ rak tơniăn a mâu tíu tâ phĭu. Pakĭng mê, tíu pêi cheăng ối mơdêk rơdêi hnê tối vâ kuăn pơlê hlê nhên tuăn tơmiât pro ‘mêi, pro tơ’nhiê rôh tâ phĭu, ing mê, kuăn pơlê mơdêk kơchăng, hbrâ rơnáu tơplâ, tơtrâ ăm gá tơƀrê”.

Tơdroăng ki veăng gum dêi khu cheăng kal kí rơtế ƀă tơdroăng môi tuăn dêi kuăn pơlê, cheăng hbrâ rơnáu ăm hneăng tâ phĭu pôk kăn a cheăm tơkăng kong Ia Lốp dế châ tơbleăng pêi, tro pơkâ. Sap ing ‘mêng pro mâu tíu tâ phĭu, mơdêk rơdêi hnê tối troh rak vế gâk kring tơniăn, tâi tâng pơrá tơmiât pêi vâ hâi lơ 15/1 la ngiâ ah cho hâi leh kân dêi kuăn pơlê tíu tơkăng kong, rah xo mâu ngế ki ai tŭm ivá, tŭm tuăn ngoâ rơkê, tŭm hiâm mơno lĕm, teăng ăm mâu rơkong tuăn tơmiât rơhêng vâ dêi kuăn pơlê a kơpong tơkăng kong, kong pơlê Dak Lak.