Hnê mơhno ‘na cheăng tâ phĭu, pôa Trần Thanh Mẫn, Kăn xiâm hnê ngăn Kuô̆k hô̆i pơkâ thế hbrâ rơnáu tro ăm rôh hôp má pơtăm dêi Hô̆i đong Tâ phĭu Tơnêi têa, tiô tối hdrối tơkŭm po hdrối rôh pơtê Têt Lo hơnăm nếo. Hô̆i đong Tâ phĭu Tơnêi têa rĕng ai mơéa hnê mơhno ăm mâu kong pơlê tơbleăng pêi cheăng tâ phĭu tung rôh pơtê Têt Lo hơnăm nếo; pơkâ nhên mâu hnoăng cheăng kal pêi pro sap ing thôn, kơtâu troh cheăm, bêng, kong pơlê, pơlê kong kân, rak vế tơdroăng pơkuâ tung plâ sap ing pơlê cheăm troh râ kong pơlê, pôi tá ăm ai tơdroăng ôh tá vâ hmâng, pơtê cheăng hbrâ rơnáu tâ phĭu xua Pơtê Têt.

Pêi pro hnê mơhno dêi Kăn xiâm hnê ngăn Kuô̆k hô̆i, pơla kố nah Khu kăn ki pêi dêi hnoăng kơxô̆ 2 Tiêuh ƀan rak vế tơniăn, gâk kring ƀă tơniăn tung pơlê pơla dêi Hô̆i đong Tâ phĭu tơnêi têa xua Thươ̆ng tươ̆ng Lê Tấn Tới, Kăn hnê Vi ƀan Cheăng lêng – Gâk kring ƀă Tơpui kâ dêi Kuô̆k hô̆i hiăng pêi cheăng ƀă Vi ƀan tâ phĭu kong pơlê Khánh Hòa ‘na cheăng rak vế gâk kring, tơniăn tung pơlê pơla gum ăm cheăng tâ phĭu. Thươ̆ng tươ̆ng Lê Tấn Tới pơkâ thế.

“Mơdêk hnoăng dêi khu lêng gâk kring tơniăn a pơlê cheăm, khu kring vế, kố cho khu ki achê kuăn pơlê má môi. Á pâ thế kong pơlê ki lâi ôh tá tơniăn, pó athế xoăng khu ki gâk kring lăm troh sap ing nôkố, a hdrối Têt. Vâ achê kuăn pơlê, hmâng kuăn pơlê tơpui, tối kuăn pơlê hlê, pêi kuăn pơlê loi. Ôh ti xê troh a chê hâi tâ phĭu mê nếo pơtroh ngế troh. Malối tơmâng ngăn troh kong ngo, chuăn rơlốu”.

A kong pơlê Dak Lak, kơvâ cheăng ki ai tơdjâk troh rơtế ƀă Kuăn pơlê dế hbrâ rơnáu hbrâ mơdât, tơplâ, mơdât tơƀrê mâu tơdroăng chêh mơ’no tối ôh tá tro, veăng gum rak vế vâ rôh tâ phĭu kố chiâng hâi leh kân dêi kuăn pơlê a kong pơlê. Cho Tôh phŏ Tôh pơhlêh kơxô̆ pơlê pơla, pôa Y Sắc Kƀuôr, Ngế pơkuâ ƀuôn Cuôr, cheăm Ea M’droh, kong pơlê Dak Lak, ăm ‘nâi:

“Á po ngăn Zalo, Facebook hlo mâu tơdroăng ki vâi chêh mơ’no ôh tá tro tơdroăng, kăn Kuô̆k hô̆i lơ kăn Hô̆i đong Kuăn pơlê rêm râ mê pơtối châ chêh mơ’no vâi tung măng mê á xut. Nâl Xuăn ôh ti ai, nâl Rơđế xuân ôh ti ai. Kố cho mâu tơdroăng tơbleăng tối ki ‘mêi, tơtrâ, drêng hlo á xut hlối ƀă pơchân rêm ngế pêi tiô ƀối, pôi tá ăm vâi châ pro pơxúa ăm tơná ing tơdroăng kố, tơdjâk troh ngế krê ƀă rơpŏng hngêi”.

Hneăng tâ phĭu pôk kăn Kuô̆k hô̆i hneăng XVI ƀă kăn Hô̆i đong Kuăn pơlê rêm râ, hơnăm 2026 – 2031, kong pơlê Dak Lak ai dâng 2,42 rơtuh ngế veăng lăm tâ phĭu. Vâ rôh tâ phĭu kố châ tơkŭm po tơniăn, tro pơkâ, Vi ƀan hnê ngăn kong pơlê Dak Lak hiăng mơjiâng Vi ƀan tâ phĭu râ kong pơlê, 102 Vi ƀan tâ phĭu râ cheăm ƀă tiêuh ƀan ngăn ‘na tâ phĭu; tung mê ai khu kŏng an, mố đô̆i cho khu ngế ki kal, tơbleăng pêi tơdâng tơ’mô mâu hnoăng cheăng rak vế gâk kring, hbrâ rơnáu plâ mơdât ing hdrối, ing hngế. Pôa Trương Công Thái, Phŏ kăn hnê ngăn Vi ƀan kong pơlê Dak Lak tối rơdêi:

“Pơtối thăm mơnhông cheăng ‘nâi nhên tơdroăng, tung măng pơlê pơla, malối ai to mâu tơdroăng ki tơmiêt ‘mêi, cheăng pêi pro dêi mâu khu ‘mêi hêng hôu, tơtrâ, khu ki rêh ối a kong têa vâi tơdjêk troh tơnêi tơníu kong pơlê Dak Lak. Ing mê teăm ‘nâi, pơxâu phâk mâu tơdroăng pêi pro ôh tá tro, pro kuăn pơlê chiâng hêng hôu ‘na rôh tâ phĭu; tơdrêng amê hlối tí tăng ‘nâi plĕng ăm Khu hnê mơhno tâ phĭu kong pơlê hnê mơhno pơxâu phâk, vâ rak tơniăn khât a kong pơlê, pôi tá ăm ai mâu tơdroăng ki tối ôh tá tro, ôh tá tơniăn tơdjâk troh hneăng tâ phĭu”.

Ƀă tơdroăng hnê mơhno kơtăng, tơdâng tơ’mô dêi Tơnêi têa, tơdroăng veăng gum tung hbrâ rơnáu dêi mâu kong pơlê rơtế ƀă hiâm mơno pôu râng khât dêi mâu khu ki kal xiâm ƀă Kuăn pơlê, cheăng hbrâ rơnáu ăm rôh tâ phĭu khu kăn Kuô̆k hô̆i hneăng XVI ƀă kăn Hô̆i đong Kuăn pơlê rêm râ hơnăm 2026 – 2031 dế châ tơbleăng pêi tơniăn, tro.