Hngêi hôp pơlê pơla Ƀuôn Kđoh châ mơjiâng pro tiô troăng hngêi xŏn tiô khôi vâi krâ nah dêi hdroâng kuăn ngo Rơđế. Hngêi tiô tối hdrối kêi đeăng ƀă pơcháu djâ xúa a khế 7 hơnăm 2026. Drêng kêi đeăng, Hngêi hôp tơdjuôm pơlê pơla kô cho tíu tơkŭm po mâu tơdroăng mơhno khôi túa lĕm tro, hôp, pơtâng tối troăng hơlâ, troăng prôk dêi Đảng, troăng hơlâ, luât dêi Tơnêi têa; gum mơdêk tơdroăng rêh ối hiâm mơno ăm kuăn pơlê, rak ƀă mơnhông khôi túa lĕm tro hdroâng kuăn ngo, tơdrêng amê gum châ tơƀrê hnoăng cheăng gâk kring tơnêi têa - kring tơniăn a pơlê pơla.

Rơtế hâi ki mê, Kuân khu 5 xuân hiăng tơkŭm po Leh pơxiâm mơjiâng pro Hngêi hôp tơdjuôm pơlê pơla a thôn 12, cheăm tơkăng kong Ia Rvê, kong pơlê Dak Lak. Tơmeăm châ mơjiâng tiô túa hngêi hôp pơlê pơla, veăng gum mơdêk tơdroăng rêh ối mơhno khôi túa lĕm tro, hiâm mơno ăm Kuăn pơlê kơpong tơkăng kong. Tâi tâng kơxô̆ liăn mơjiâng pro 2 toăng hngêi pơlê pơla cho 5 rơtal liăn.