A kơpong kuât pơlê Kăm, cheăm Ia Krái, kong pơlê Gia Lai, tơdroăng phiu ro rơnó hơngui po ƀă ‘’Hâi xah hêi ro kơƀăn chưng, phâi hơtô. Kăn pơkuâ Khu xiâm pơkuâ lêng Ƀinh đoân 15, khu râ kăn pơkuâ rơtế ƀă kuăn pơlê châ klâ chiâng 4 khu, hâk vâ kơxuô kơƀăn chưng, pro chiâng chiâng phiu ro ‘nâng, tơdjêp khu lêng – kuăn pơlê. Rơtá kuât cho mâu ‘’Tíu tê tơmeăm 0 liăn’’ ăm kuăn pơlê hbrâ Têt. Hên tơdroăng xah hêi tiô khôi vâi krâ nah xuân châ tơkŭm po, mơhnhôk kơdrâm vâi hdrêng veăng, djâ rơkong tó phiu ro.

Troh kơmăng, tíu kố chiâng hâi xah hêi ro pêng păm khôi túa lĕm tro Tây Nguyên ƀă chôu on koh kân lĕm ƀă hên tơdroăng rơhdruê xuăng kheăn kơdeăn pơlê xiâm, tơnêi têa rơtế chêng koăng, tơdrá kơhnhon xuăng tiô khôi vâi krâ nah. Veăng tơdroăng kố, nâ Ksor Nuch - kuăn pơlê pơlâ Dọch Krót, cheăm Ia Krái phiu ro tối.

“Mô đô̆i ‘na kâ Têt rơtế ƀă Kuăn pơlê mê cho phiu ro hơniâp ro. Roh xah hêi ro tơ’noăng kơxuô kơƀăn chưng, mâu tơdroăng xah hêi tiô khôi vâi krâ nah ƀă trâm mâ mơhno khôi túa lĕm tro, châ tâ châ hlo mâu kơchâi kâ dêi mơngế Jarai ƀă mơngế Xuăn, chiâng roh châ tâ châ hlo phiu ro ‘nâng ƀă mot tơrŭm ƀă dêi pó’’.

Tung tơdroăng, Ƀinh đoân 15 ƀă Khu cheăng kâ – Gâk kring tơnêi têa 715 hiăng diâp hrĭng kơxuô tơmeăm ăm mâu ngế ai hnoăng tơnêi têa, rơpŏng kơtiê. Khu xiâm pơkuâ lêng Binh đoân 15 hiăng troh a hngêi kơ-êng, diâp kơxuô tơmeăm, rơkâu Têt mâu krâ pơlê, kăn pơkuâ thôn, ngế ki kuăn pơlê loi tơngah ƀă rơpŏng ai hnoăng tơnêi têa; lăm pôu, rơkâu Têt Đông mô đô̆i gâk tơkăng kong Ia O, khu râ kăn pơkuâ hnê ngăn cheăng Đảng, khu râ kăn pơkuâ mâu cheăm Ia O ƀă Ia Krái.

Thiê̆u tươ̆ng Hoàng Văn Sỹ - Kăn pơkuâ lêng Ƀinh đoân 15 tối ăm ‘nâi, tơdroăng pêi cheăng ‘’Rơnó Hơngui tơkăng kong pêng păm tuăn pâ khu lêng kuăn pơlê’’ kô pơtối châ pêi pro. Tung roh má 1, Ƀinh đoân kô diâp 30.000 kơxuô tơmeăm troh kăn ƀô̆, mơngế pêi cheăng ƀă kuăn pơlê mâu thôn pơlê; tŏng gum 100 tâ̆n phon hưh cơ vi sinh ƀă tơdroăng ‘’Pro chiâng drêh lĕm Trường Sa’’ hơnăm 2026.

Klêi kơ’nâi mâu tơdroăng pêi kố, Ƀinh đoân 15 ôh tá xê to rak ngăn tơdroăng rêh ối kế tơmeăm khoăng, hiâm mơno ăm kuăn pơlê mê ối pêi pro hnoăng cheăng ki kal, gum pro krá tuăn pâ, krá tơniăn tơdroăng loi tơngah dêi Kuăn pơlê ƀă Đảng, Tơnêi têa ƀă Khu mô đô̆i, mơjiâng krá tơniăn “tơdroăng gâk kring tung hiâm mơno kuăn pơlê’’ tíu a ko Tơnêi têa. Thiê̆u tươ̆ng Hoàng Văn Sỹ tối ăm ‘nâi:

“Hơnăm 2026, ngin xúa mâu tơmeăm tung khu dêi Ƀinh đoân tung mâu kơxuô tơmeăm diâp. Ing mê, thăm mơnhên tơdroăng tuăn pâ tá hiâm mơno dêi Ƀinh đoân 15 troh ƀă kuăn pơlê, mơjiâng tơdroăng môi tuăn tro tơdroăng pêi pro dêi Khu pơkuâ tơdroăng cheăng Đảng kơvâ cheăng lêng Tơnêi têa hnê mơhno ôh tá lôi kơbố parŏng. Ing mê, tơdroăng loi tơngah kô châ thăm pêi pro, ƀă păng ‘nâng chiâng a ko krá tơniăn gâk kring Tơnêi têa tung hneăng nếo’’.

Ƀă a kơpong tơkăng kong dêi kong pơlê Dak Lak, tơdroăng ro a rơnó hơngui dế troh rĕng tâ ƀă mâu tơdroăng pêi ai kơnâ tâ dêi kăn ƀô̆, mâu lêng Mô đô̆i gâk tơkăng kong tŏng gum Têt ăm kuăn pơlê, ki má lối cho mâu rơpŏng ai tơdroăng rêh ối pá puât, nếo tro lŭp ó xua kong prâi pro ôh tá tơniăn, têa kân lân lu.

A bêng Sông Cầu, kong pơlê Dak Lak, Đông mô đô̆i gâk tíu tơkăng kong Xuân Đài tơrŭm ƀă Khu pơkuâ vâi kơdrâi bêng tơkŭm po ‘’Hâi xah hêi ro kơƀăn chưng ngiêt’’. Hrĭng to kơƀăn tuăn pâ châ diâp a kŏng mâu rơpŏng kơtiê, rơpŏng ai hnoăng tơnêi têa, gum djâ troh môi Têt hơtô, tŭm kế tơmeăm khoăng tâ.

“Cho phiu ro ‘nâng châ tơdroăng tŏng gum, châ diâp mâu kơxuô tơmeăm ăm mâu ngế kuăn pơlê kơtiê, mâu tíu tro kong mêi khía mơhot plong mot, vâ ai môi rơnó Têt Bính Ngọ phiu ro ƀă hơniâp lĕm’’.

A bêng Hòa Hiệp, Đông Mô đô̆i gâk tơkăng kong Hòa Hiệp Nam tơrŭm ƀă mâu tíu pêi cheăng tơkŭm po Tơdroăng ‘’Hơngui Tơkăng kong, hơtô hiâm mơno kuăn pơlê’’. Khu tơkŭm po hiăng diâp 110 kơxuô tơmeăm mê cho liăn mâ ƀă tơmeăm ki kal xúa rêm hâi ăm mâu rơpŏng ai hnoăng tơnêi têa, rơpŏng ai hnoăng ƀă kăch măng, rơpŏng kơtiê, mâu vâu o tung tơdroăng ‘’Gum o troh hngêi trung’’. Rơtế amê, khu lêng ƀok thái pơkeăng ối tơkŭm po khăm pơlât, hnê mơhno rak ngăn ivá ƀă xing xoăng pơkeăng tê kơtê ăm dâng 100 roh ngế kuăn pơlê.

Xuân tung mâu hâi kố, mâu đông mô đô̆i gâk tơkăng kong a drô têa kơxĭ Dak Lak ối tơrŭm ƀă mâu khu ki tŏng gum mơngế hliăng tiâ pá puât tŏng gum rơnêu hngêi ối ăm hên rơpŏng kuăn pơlê pá puât, gum kuăn pơlê rĕng tơniăn tíu ối, hmiân tuăn pêi cheăng pêt mơjiâng tơmeăm ƀă tơdah Têt tơniăn lĕm. Thiê̆u tă  Vũ Lý Huỳnh, Cheăng kal kí phŏ Đông mô đô̆i gâk tơkăng kong Xuân Đài, Khu pơkuâ Mô đô̆i gâk tơkăng kong kong pơlê Dak Lak, tối ăm ‘nâi:

“Tơdroăng Têt khu lêng kuăn pơlê hơnăm kố mê kăn ƀô̆, lêng Đông mô đô̆i gâk tơkăng kong Xuân Đài ai hên pơhlêh nếo tâ, tơkŭm po troh tíu lăm pôu, mơhnhôk mâu kuăn pơlê pơla kố nah hiăng tro lŭp kế tơmeăm khoăng xua mơhot 13 ƀă roh kong mêi têa kân lân lu. Teăm tơdrêng mơhnhôk ƀă diâp kơxuô tơmeăm vâ kuăn pơlê mơ-eăm rêh ối ing têa kơxĭ, rơtế khu Mô đô̆i gâk tơkăng kong gâk kring hnoăng pơkuâ têa kơxĭ rơlố, gâk kring tơniăn kơpong tơkăng kong têa kơxĭ ƀă gum mơnhông cheăng kâ rêh ối pơlê pơla a pơlê’’.