Troh nôkố, kong pơlê Lâm Đồng hiăng mơjiâng 124 Vi ƀan tâ phĭu râ cheăm klăng tro tiô tơdroăng vâ, mâu ngế pêi pro tro tiô luât; hlối mơjiâng 6 khu tâ phĭu Kuô̆k hô̆i ƀă 38 Khu tâ phĭu Hô̆i đong kuăn pơlê dêi kong pơlê. Lâp tung kong pơlê klâ 6 tíu tâ phĭu rah xo kăn Kuô̆k hô̆i, kô rah xo 17 ngế; 38 tíu tâ phĭu rah xo Hô̆i đong kuăn pơlê dêi kong pơlê, rah xo 85 ngế kăn. Kong pơlê hiăng mơjâng 1.004 tíu tâ phĭu rah xo Hô̆i đong Kuăn pơlê râ cheăm, vâ rah xo 2.949 ngế.

Tơbleăng mơgêi hâi pêi cheăng, jâ Võ Thị Ánh Xuân, Phŏ Kăn xiâm hnê ngăn Hô̆i đong  tâ phĭu tơnêi têa pâ thế kong pơlê mơdêk hnoăng pơkuâ hnê mơho, ngăn tơdroăng tâ phĭu cho tơdroăng ki kal khât, ôh tá ăm tơdroăng cheăng pêi ki lâi hrá, lơ tro lôi, lơ tro kơdrâ; hlối tơmâng ngăn khât tơdroăng séa ngăn tiô pơkâ, vâ ‘nâi nhên ‘na mơngế ki lo tơbriât, tơniăn tơdroăng rah mơngế pro kăn thế tro tơdroăng pơkâ.