Drêng troh hơnăm nếo 2026 ƀă hbrâ tơdah Têt hơnăm nếo Bính Ngọ, kơxê hâi lơ 4/2, a Hà Nội, pôa Tô Lâm, Kăn xiâm pơkuâ hnê ngăn Đảng trâm mâ mâu kăn ƀô̆ xiâm kong an râ ki pêi cheăng ing mâu rơxông hdrối. Teăng mâ Đảng, Tơnêi têa, pôa Tô Lâm, Kăn xiâm pơkuâ hnê ngăn Đảng pơtroh rơkong rơkâu hơnăm nếo ăm mâu vâi pú tung rơpŏng hngêi.

Tơbâ nếo mâu tơdroăng tung tơnêi têa, Kăn xiâm pơkuâ hnê ngăn Đảng tối nhên, tung tơdroăng sôk ro tơdjuôm ‘na hiăng klêi tơniăn hneăng hôp má 14 dêi Đảng, Việt Nam dế ai rôh ki kân vâ hvêa prôk mot tung rơxông mơnhông tơná dêi hdroâng mơngế. Kăn xiâm pơkuâ hnê ngăn Đảng rơrêk tung hiâm mơno drêng hlo hnoăng cheăng dêi mâu lêng kong an kuăn pơlê rôh apoăng châ mơjiâng krip lĕm tung hlá mơ-éa chêh tơbleăng hneăng hôp 14.

Kăn xiâm pơkuâ hnê ngăn Đảng tối, mơhé hiăng pơtê pêi cheăng xua hơnăm hiăng krâ, mâu vâi pú xuân ối tuăn ngôa, ối ai túa pêi cheăng, hâk vâ pêi khât; vâ pơtối mơhno troăng ahdrối a kong pơlê, cho tíu tơngah tơdroăng kal kí, loi nhoăm khât, kơhnâ veăng ‘no hnoăng tung mơjiâng khu lêng Kong an kuăn pơlê rơkê ƀeăn tiô túa nếo.