Mâu hâi apoăng hơnăm nếo 2025, tung tơdroăng ki hơniâp ro dêi rơnó Hơngui Tây Nguyên, pôa Trịnh Văn Bình, 69 hơnăm, Chi hô̆i trưởng, Hô̆i mâu mố đô̆i hơnăm hiăng krâ thôn Đoàn Kết, cheăm Ia Hiao, kong pơlê Gia Lai, kŏng râng tơmô pâm ‘nhiê dêi kơnâng rơpŏng vâ pleăng tơnêi pro troăng. Pôa Trịnh Văn Bình tối, pleăng tơnêi pro troăng cho veăng gum ai pơxúa dêi rơpŏng rơtế ƀă vâi krâ kuăn pơlê tung thôn, vâ mơjiâng thôn pơlê nếo.

“Tiô troăng hơlâ pơkâ tơbleăng cheăng thôn pơlê nếo, á hlo gá tơtro khât ƀă tuăn tơmiât dêi Đảng hiâm mơno púi vâ dêi kuăn pơlê mê rơpŏng á hiăng môi tuăn pleăng tơnêi tung tơdroăng tơkêa a pơlê cheăm. Ƀă tuăn mơno tơná xua kuăn pơlê, kuăn pơlê xua á, tơdroăng tơkêa po rơdâ troăng prôk kố gá tơ’lêi hlâu khât ăm vâi krâ kuăn pơlê tung thôn tối tơdjuôm ƀă rơpŏng hngêi á tối krê. Prôk lăm tơniăn lĕm tơ’lêi hlâu, pêi cheăng kâ kơdroh iâ kơxô̆ liăn ‘no hrê, pêi lo liăn tơƀrê mê tơdroăng rêh ối kuăn pơlê châ mơdêk tâ”.

Cheăm Ia Hiao, kong pơlê Gia Lai châ mơjiâng tung tơdroăng ki ‘mot tơkŭm môi 3 to cheăm: Ia Peng, cheăm Chrôh Pơnan ƀă cheăm Ia Hiao, tơring Phú Thiện ton. Mơnhên troăng prôk cho tơdroăng ki kal vâ mơnhông cheăng kâ tung hơnăm 2025 – 2030, Đảng ủi, kăn pơkuâ cheăm Ia Hiao hiăng mơhnhôk kuăn pơlê pleăng tơnêi, pleăng tơmeăm vâ po rơdâ troăng prôk tung thôn pơlê. Pôa Đỗ Văn Điền, 63 hơnăm, kuăn pơlê thôn Đoàn Kết, phiu ro ăm ‘nâi, châ pêi pro dêi kuăn pơlê mê tơdroăng pleăng tơnêi pro troăng hiăng rĕng chiâng môi tơdroăng tơ’noăng tung lâp lu.

“Tâi tâng kuăn pơlê pêi pro, mê cho phiu ro khât, pêi pro châ tơdroăng kố cho ing tơmâng ngăn tŏng gum dêi Đảng ƀă Tơnêi têa, dêi kăn pơkuâ cheăm bêng ƀă mâu khu râ kăn pơkuâ mê phiu ro khât. Ki hên cho xua vâi krâ nhŏng o môi tuăn, môi hiâm mơno tơdjuôm ivá, tâi tâng rơtế veăng gum hâi pro mê nếo pro klêi tơdroăng ki lĕm môi tiah kố”.

Bu tung pơla iâ khế, sap ing mơ’nui hơnăm 2025 troh nôkố, cheăm Ia Hiao hiăng pro klêi 22 to troăng prôk, mơhnhôk châ 207 rơpŏng pleăng lối 38 rơpâu met kare tơnêi, lối 6.200 met karê kơnâng rơtế ƀă hên kế krá kâk ki ê, ƀă tâi tâng kơnâ tiô riân lối 4,8 rơtal liăn.

Ki rơhêng vâ tối, tung tơdroăng pêi pro mê, kăn ƀô̆, đảng viên đi đo cho khu ki djâ troăng ahdrối, djâ troăng pêi pro nhên. Pôa Siu Hiếu, Kăn hnê ngăn Vi ƀan Măt trâ̆n Tơnêi têa cheăm Ia Hiao, kuăn pơlê thôn Sô Ma Lơng, ăm ‘nâi tơdroăng ki pleăng tơnêi ƀă rơpŏng pôa apoăng xuân trâm pá, xua tơnêi a mâ troăng ai yă tê kơnâ. Laga, hlo nhên hnoăng cheăng dêi kuăn pơlê pêi cheăng măt trâ̆n, pôa hiăng khŏm pêi pro tơdroăng kố hdrối tâ pú:

“Hlo troăng hơlâ pơkâ mơ’no tơtro khât, tơná á xuân pêi pro tơdroăng ki pleăng tơnêi vâ po rơdâ troăng vâ ăm kuăn pơlê prôk lăm. Apoăng xuân hlo xơpá tung tơdroăng mơhnhôk kơdrâi kuăn xua tơnêi a ngiâ troăng tâng tê tiô yă nôkố cho dâng 200 rơtuh liăn môi met, la hlo troăng hơlâ pơkâ tơtro ƀă tơná á xuân cho kăn hnê ngăn măt trâ̆n cheăm pêi cheăng hnê tối mơhnhôk kuăn pơlê mê á xuân athế cho ngế ki apoăng pêi pro vâ djâ troăng ăm mâu rơpŏng kuăn pơlê ki u ối. Klêi kơ’nâi po rơdâ troăng mê hlo gá phuâng rơdâ krúa lĕm, ai tíu ki ăm têa hiu tơniăn lĕm rơpŏng á hlo xuân phiu niu”.

Ki khât gá ăm hlo, vâ mơdêk rơdêi tơdroăng ki pro troăng klông, liăn ngân dêi cheăm Ia Hiao ôh ti ai tŭm vâ chêl thiê̆n ăm tơdroăng ki xo tơnêi kuăn pơlê pro troăng. ‘Na tơdroăng ki pơloăng mơnúa kố, Đảng ủi cheăm hiăng pơkâ mâu tơdroăng cheăng tơdjuôm ivá kuăn pơlê, xo tơdroăng ki môi tuăn dêi kuăn pơlê cho tơdroăng ki kal xiâm. Mơnho nhên ăm hlo hên troăng kân rơdâ tá hâi châ 3 met, Yên Phú 1, Yên Phú 2, Đoàn Kết, Sô Ma Lơng sap ing troăng ki rơdâ tá hâi châ 3 met, mê nôkố hiăng châ po rơdâ troh 8 met.

Tung mê, liăn Tơnêi têa ‘no ƀă mâu liăn tơkŭm ing ê châ 90%, kuăn pơlê tơlo 10% ƀă tâi tâng ƀăng tơnêi ki xo pro troăng. Pôa Phạm Văn Phương, Kăn pơkuâ ngăn Đảng ủi, Kăn hnê ngăn Hô̆i đong cheăm Ia Hiao tối rơdêi:

“Mơnhên tơdroăng ki xoăng cheăng athế nhên ƀă mơnhông tâi hnoăng cheăng djâ troăng ahdrối dêi mâu kăn ƀô̆ đảng viên. Tro ƀă xoăng tơdroăng cheăng mê ngin hiăng rah xo mâu rơpŏng kăn ƀô̆ đảng viên pêi hdrối. Thôn apoăng pêi cho thôn Sô Ma Lơng A, klêi mê troh mâu thôn ki ê, ai hên thôn hiăng pêi pro, pơla hdrối kố nah ngin hiăng pro châ 22 to troăng sap ing liăn ki veăng tơlo ƀă kơxô̆ liăn ki mơhnhôk thế kuăn pơlê veăng tơlo vâ pro ăm vâi krâ nhŏng tung môi to cheăm”.

Mâu troăng prôk ki nếo ôh ti xê to po rơdâ troăng prôk lăm tơ’lêi hlâu, mê ối po troăng mơnhông nếo ăm kơpong thôn Gia Lai. Ngiâ méa cheăm Ia Hiao mâu hâi apoăng hơnăm nếo lĕm krip, krúa, tơngah dêi kuăn pơlê a kăn pơkuâ krá tơniăn khât. Sap ing tơdroăng ki môi hiâm mơno dêi Đảng ƀă kuăn pơlê, môi tơdroăng pêi pro ki nếo dế tơdjâk troh krá tơniăn ƀă rơdêi pơtối mâu tơdroăng ki lĕm ‘na thôn pơlê nếo a kong ngo Gia Lai.