Péa tơdroăng tơkêa kố ai tâi tâng kơlo liăn ‘no vâ chê 60 rơpâu rơtal. Tơpui a rôh hôp, pôa Hồ Văn Mười, Kăn hnê ngăn Vi ƀan kong pơlê Lâm Đồng tối nhên, tơdroăng diâp pơkâ troăng hơlâ ‘no liăn pêi cheăng klăng rôh tơbâ Hâi mơjiâng Đảng Kŏng san Việt Nam ai pơxúa khât ‘na tơdroăng cheăng kal kí, mơhno hnoăng cheăng pơkuâ dêi Đảng tung troăng pơkâ pêi ƀă mơnhông cheăng kâ rêh ối pơlê pơla, tung mê kŏng ngiê̆p chiâ xo tơmeăm tung kơdâm tơnêi ƀă kŏng ngiê̆p nhôm cho kơvâ cheăng ki kal.

Kăn hnê ngăn Vi ƀan kong pơlê mơnhên tối khât tơdroăng ki hbrâ rơnáu, khŏm mơ-eăm dêi TKV, tơdrêng amê hlối pơkâ thế mâu khu râ, kơvâ cheăng, kong pơlê tơrŭm krá tơniăn ƀă pro kơdroh hâi khế chêh pro hlá mơ-éa, rak vế tơdroăng ki xo tơnêi ƀă pro pơlê ối tro pơkâ.