Jâ Võ Thị Bạch Nga, ngế ki pơkuâ môi tíu tơmeăm a bêng Tân Lập, kong pơlê Dak Lak tối, hmâ troh a rôh Têt Lo hơnăm nếo rêm hơnăm, tíu tê tơmeăm dêi jâ pơrá hbru tŭm mâu tơmeăm ki kal vâ xúa tung rôh Têt môi tiah kơƀăn kĕo, drôu ƀiêr, têa ngeăm, phái, têa rơmâ, têa măm, ƀô̆t ngot ƀă hên ki ê. Vâ ai liăn roê tơmeăm vâ tê, jâ mung ing tơdroăng ki pro tơniăn xua Tơnêi têa tơbleăng pro, ƀă kơxô̆ liăn mung dâng 2 rơtal.

“Túa pơkâ mơ’no dêi tơná mê hmâ dâng 2 rơtal, á xúa vâ roê tơmeăm hdrối Têt vâ ai tơmeăm tê tơniăn. Á rơhêng vâ laih mung ối rak vế dâng lối 6.0 la rêm hơnăm, ƀă châ tơnêi têa tŏng gum tơniăn mê kô tơ’lêi hlâu ăm tíu tê tơmeăm kố ƀă tá mâu ngế ki roê. Drêng ai kơxô̆ liăn mung rak tơniăn ‘na yă tê laih iâ mê mơni tíu tê tơmeăm kố kô ôh tá mơdêk yă luâ râ, ƀă môi tiah lâi mê ngế ki roê châ pơxúa hên tâ”.

Pôa Bùi Quang Hoà, Kăn pơkuâ siêu thĭ Co.opmart Buôn Ma Thuột ăm ‘nâi, rôh Têt Bính Ngọ hơnăm kố, tơdroăng ki roê tơmeăm xúa ki kal ối tung 5 khu ki xiâm mê cho kơchâi plâi pôm, kế kâ, phái, xik ƀă po hlo tâk dâng 6% a siêu thĭ. Vâ rak tơniăn tŭm tơmeăm vâ tê, tíu tê tơmeăm kố hiăng hbrâ tŭm, rak vế tơniăn krúa kế kâ, xúa mâu tơmeăm ki ai nhên xiâm kối, tơdrêng amê hlối ôh tá mơdêk yă roê ôh tá tro pơkâ.

“Pêi cheăng ƀă Khu ngăn Kơmăi kơmok ƀă tê mơdró kong pơlê Dak Lak, ngin tơhrâ pơkâ yă rak tơniăn ƀă tơbleăng tơdrăng pơkâ tê a siêu thĭ, tung pơla 3 khế sap ing 15/12/2025 – 15/3/2026. Vâ pêi pro tiô túa pơkâ kố, ngin pêi cheăng ƀă mâu khu ki tê tơmeăm ƀă vâi xuân hiăng tơhrâ kĭ tơkêa, tung pơla hdrối, tung ƀă klêi kơ’nâi Têt tê tơmeăm pôi tá mơdêk yă”.

Tơbleăng tơdroăng pro tơniăn yă rôh tung pơla hdrối, tung ƀă klêi kơ’nâi Têt Bính Ngọ 2026 tiô hnê mơhno dêi Chin phuh, a kong pơlê Dak Lak ai 16 khu tơrŭm ăm mung liăn veăng tơrŭm pêi. Pôa Trần Minh Hoàng, Phŏ pơkuâ Tíu pêi cheăng Hngêi rak liăn TMCP Đầu tư và Phát triển kong pơlê Dak Lak BIDV ăm ‘nâi, veăng tung tơdroăng kố, hngêi rak liăn hiăng ƀă dế tơbleăng pêi hên tơdroăng ăm mung liăn ki kơjo gum vâ gum mâu khu tơrŭm, mâu ngế krê ê mơdró mâu tơmeăm xúa tung rôh Têt.

Túa pơkâ ăm mung châ pêi pro rơkê tiô tơdroăng púi vâ, hdró hâi khế ki tơtro vâ ăm liăn ‘no hrê tơtro, mơ-éa chêh pro tơ’lêi, laih rơpâ ƀă tơniăn, vâ pro tơ’lêi hlâu ăm khu mơdró kâ, rơpŏng tê mơdró ƀă khu tê mơdró ki kŭn tơ’lêi châ mung, xúa kơxô̆ liăn mung tơƀrê tung rôh kố.

“Tiô troăng hơlâ tŏng gum dêi Hngêi rak liăn Mơ’no gum ƀă Mơnhông chiâk deăng - thôn pơlê Việt Nam (BIDV), ngin đi đo kơjo gum kơxô̆ liăn ăm mung tung kơvâ mơjiâng pro, tê mơdró, malối cho mơjiâng pro, tê mơdró, roê xo kế tơmeăm. Ƀă kơvâ cheăng kố, hngêi rak liăn ôh tá pơkâ kơxô̆ liăn ăm mung, liăn laih đi đo châ xúa a kơlo ki rơpâ má môi tung mâu rôh mung. Drêng mâu khu tơrŭm, rơpŏng tê mơdró ƀă khu ki tê mơdró rơhêng vâ mung, ngin di đo tơbleăng mâu kơxô̆ liăn mung ôh tá pơkâ ăm mung to lâi vâ tơmối gum tơmối”.

Riân ngăn dêi Khu ngăn cheăng kơmăi kơmok ƀă tê mơdró kong pơlê Dak Lak, tơdroăng rơhêng vâ roê tơmeăm rêm khế a kong pơlê châ dâng 3.400 rơtal. 1 khế hdrối Têt Lo hơnăm nếo Bính Ngọ 2026, tơdroăng ki roê tiô tối hdrối tâk dâng 30%, tơ’mô ƀă lối 1 rơpâu rơtal liăn, tơkŭm hên cho mâu tơmeăm, môi tiah: kơchâi, plâi pôm, kế kâ, phái, xik, po, hmân ếo, yêp chêng khŏng, drôu ƀiêr, têa ngeăm.

Pôa Nguyễn Hải Triều, Phŏ pơkuâ Khu ngăn cheăng kơmăi kơmok ƀă Tê mơdró kong pơlê Dak Lak ăm ‘nâi, vâ rak vế tơniăn ai tŭm tơmeăm tê, ƀă yă tê tơtro tung Rôh Têt, Khu hiăng hnê mơhno khu ki pơkuâ ngăn kơchơ ƀă mâu ƀơrô cheăng, thăm mơnhông séa ngăn tíu tê mơdró, tơdrêng amê, hlối tí tăng ‘nâi plĕng ăm Vi ƀan kong pơlê hnê mơhno mâu hngêi rak liăn tê mơdró ăm mung liăn kơjo, liăn laih rơpâ vâ pro tơniăn yă.

“Tung tơdroăng cheăng rak vế tơniăn tŭm tơmeăm tê ƀă pro tơniăn yă a kong pơlê, Vi ƀan hnê ngăn kong pơlê Dak Lak hiăng ai hlá mơ-éa hnê mơhno 13 khu mơdró kâ mê cho mâu siêu thĭ, tíu xiâm tê mơdró, tíu tê mơdró ‘ngré môi tiah: Co.opmart, GO! Bách Hóa Xanh, VinMart, rơtế ƀă mâu khu mơdró kâ tê tơmeăm veăng tung tơdroăng kố. Pakĭng mê, Khu kố xuân ăm phêp ăm hên tíu tê mơdró tơkŭm po kơchơ a kơpong Buôn Ma Thuột ƀă kơpong ki achê vâ kuăn pơlê roê tơmeăm Têt”.

Hlo tơdroăng ki roê tơmeăm tung rôh Têt tâk hên, la ƀă tơdroăng hbrâ rơnáu sap ing hbrâ tơmeăm, kơxô̆ liăn troh cheăng pơkuâ ngăn kơchơ mơdró, tơdroăng ki roê tơmeăm Têt a Dak Lak kô châ rak vế tơniăn. Kế tơmeăm hên, yă tê châ pro tơniăn vâ gum kuăn pơlê hmiân tuăn roê. Môi rơnó Têt ai tŭm kế tơmeăm, tơ’lêi dế troh ƀă kuăn pơlê a kong pơlê Dak Lak.