Ngế pro xiâm hnê ngăn tơnêi têa phiu ro rôh lăm pôu klêi kơ’nâi ƀlêi chiâng dêi Hneăng hôp XIV dêi Đảng, tối nhên Việt Nam ngăn nhuô̆m, khŏm mơ-eăm pro trâu hngế tâ nếo tơrŭm tơroâ khôi hmâ, tơrŭm tŭm têk Việt Nam – Cuba. Péa pâ mơnhên tối khât ivá mơnhông tơrŭm cheăng pơla péa pâ, môi tuăn thăm mơnhông rơdêi tơrŭm cheăng kâ, tê mơdró; tơbleăng pêi tơƀrê mâu tơdroăng tơkêa mơjiâng pro kế kâ, hnê tối ki rơkê plĕng tung 40 hơnăm Pơhlêh nếo; po rơdâ tơrŭm cheăng on tơhrik vêh pro, malối cho on tơhrik kơtâu ƀă tôu mâ hâi; thăm mơnhông tơrŭm tung khăm pơlât hnê ‘na kong ngê̆ vaccine, pơkeăng vâ tê ăm kơchơ mơdró péa tơnêi têa ƀă tê ngi kong têa ê.

Ngế pro xiâm hnê ngăn tơnêi têa tối rơdêi, Việt Nam kô pơtối tối ki rơkê plĕng tung mơjiâng pro on tơhrik vêh pro ăm Cuba vâ xúa tung mơjiâng pro tơmeăm ƀă xúa tung tơdroăng rêh ối dêi kuăn pơlê Cuba.