Pêi pro tiô troăng hơlâ dêi Đảng ƀă luât tơnêi têa, tung mâu hơnăm hdrối, mâu kong pơlê kơpong Tây Nguyên pêi pro tiô tơdroăng ai hlâu tơƀrê  tơdroăng Pơkâ dêi tơnêi têa xăm kơtiê krá ton ƀă tơdroăng pơkâ dêi tơnêi têa mơnhông cheăng kâ rêh ối a kơpong kuăn ngo ƀă kong ngo.  Sap rơpŏng kơtiê, rơpŏng hngêi nâ H’Phương Knul (kuăn ngo Rơđế), ối a buôn Tuôr, cheăm Hòa Phú, kong pơlê Dak Lak hiăng châ tơnêi têa kơjo kum ăm mung liăn vâ liăn pêi cheăng kâ châ tơƀrê, nôkố hiăng ai tơdroăng rêh ối tơniăn ƀă  châ pro hngêi lĕm nếo.

“Hdrối nah, rơpŏng hngêi á cho rơpŏng kơtiê xơpá, ôh tá ai hngêi ối. Hngêi ối châ tơnêi têa kơjo kum môi iâ, rơpŏng hngêi măn kơdĭng iâ châ tơkŭm pro hngêi. La tơdroăng cheăng pêi hâi tơniăn, ối tô tuăn ăm kuăn ‘nĕng hriâm. A púi vâ tơnêi têa pơtối tơmâng, veăng kum ai cheăng pêi tơniăn ƀă kơxô̆ liăn pê lo tơniăn ăm mâu rơpŏng ki ối kơtiê xơpá tung pơlê”.

Hneăng hôp mâu kăn tung lâp tơnêi têa rôh má 14 dêi Đảng tối pơkâ tung 5 hơnăm la ngiâ, kơxô̆ rơpŏng kơtiê tiô pơkâ ki kơtiê hên troăng pơla hơnăm 2026-2030 kơdroh riÂn sap 1-1,5 điêm kơpêng hrĭng rêm hơnăm. Troăng hơlâ pêi pro mê, cho tơdroăng Pơkâ hneăng Hôp kân Đảng ƀô̆ kong pơlê Dak Lak hneăng hơnăm 2025-2030 ai pơkâ kơxô̆ kơtiê tung kong pơlê kơdroh tâi tâng sap 2% tung môi hơnăm tơngi klêng; kơxô̆ rơpŏng kơtiê cho kuăn ngo chu kơdroh sap ing 3% tung môi hơnăm tơngi klêng; vâ ai tiô pơkâ ki mê, kong pơlê pơtối kơjo pêi ahdrối mơnhông pêi chiâk, pêi hên túa cheăng kâ, po rơdâ mâu túa xăm kơtiê ăm tơtro ƀă tơrêm cheăm, kong pơlê.  Jâ Nguyễn Thị Nguyên Thảo, Phŏ Kăn hnê ngăn Vi ƀan kuăn pơlê kong pơlê Dak Lak, ăm ‘nâi:

“Pơla hơnăm 2026-2030, kong pơlê pơtối pro hlâu vâ tơbleăng kơxô̆ liăn, tŏng kum pơlê pơla ăm kuăn pơlê; pêi pro tiô tơdroăng Pơkâ 39 dêi kăn hnê ngăn Đảng, mơdêk xúa tơƀrê kơxô̆ liăn, xúa pêi chiâk tê mơdró, tăng tơnôm hên liăn vâ mơnhông thôn pơlê nếo, mơnhông cheăng kâ- pơlê pơla kơpong kuăn ngo, kong ngo tơniăn rêh ối tung kong pơlê”.

 Klêi hneăng hôp 14 dêi Đảng, Khánh Hòa hbrâ rơnáu, pơ’lêh pêi tiô tơdroăng tuăn vâ  mơ-eăm “rah tro - tơbleăng pêi rĕng - pêi troh tung lui- vê hdró ƀă tơdroăng hiăng pêi tơbrê, tơkŭm ‘mâi hơ’lêh tíu pêi tơdroăng ‘no liăn cheăng, mơdêk mâu tơdroăng ki xiâm tâk hên, pro xiâm tung pêi pro tiô pơkâ chiâng pơlê Kong kân râ xiâm tơnêi têa hdrối hơnăm 2030. Tung hnê mơhno pơkuâ pêi, pôa Trần Phong, Kăn hnê ngăn Vi ƀan kong pơlê Khánh Hòa tối nhên pơkâ rĕng pêi tŭm tơdroăng tung mâu kơvâ cheăng xiâm; pơkâ thế mâu tíu pêi cheăng, kơvâ cheăng, kong pơlê mơjiâng pơkâ nhên; tơkŭm tâh tơvâ tơvân, mơdêk ivá cheăng tơbriât cheăng ƀă ki tơƀrê pơxúa dêi kuăn pơlê, khu mơdró:

“Sap nôkố troh mơ’nui hơnăm ƀă pơxiâm mot hơnăm 2026, pơkâ mâu tíu pêi cheăng, kơvâ cheăng, kong pơlê mơjiâng pơkâ nhên tiô tơrêm khế, thăm nếo tơrêm măng tĭng; tơkŭm tah xơpá tơvâ tơvân, ‘mâi mơnhông ’no liăn cheăng, mơdêk ki pơxúa tơbriât cheăng ƀă ki tơƀrê dêi kơvâ pêi cheăng pơxúa ăm kuăn pơlê , khu mơdró. Ngăn tiô kơ ivá tíu pêi cheăng, mâu ngế pơkuâ cheăng thế hbrâ tơbleăng pêi”.

Tung hên tơdroăng mơ-eăm pêi pro đi đo tâk 2 kơxô̆, mơnhông Khánh Hòa chiâng pơlê kong kân râ xiâm tơnêi têa, kơvâ mơjiâng tơmeăm khoăng cho xiâm tung tơdroăng pêi apoăng. Pôa Nguyễn Thành Phú, Ngế pơkuâ ngăn Mơjiâng pro tơmeăm khoăng kong pơlê Khánh Hòa ăm ‘nâi kơvâ mơjiâng pro kô tơkŭm tơmâng pêi vâ tơƀrê tro tiô pơkâ, mơnhông tơdâng tơ’mô tâi tâng kơphô̆ ƀă kih thuât tiô troăng hơlâ ki nếo, krá tơniăn, pơxúa má môi ăm tơdroăng pơkâ dêi kong pơlê: 

“Ngin kô pơtối mơ-eăm, ƀă tơdroăng mơ-eăm ‘na kal kí má môi, tơkŭm tơbleăng mâu tơdroăng cheăng pêi dêi Tỉnh Ủy, Vi ƀan kuăn pơlê dêi kong pơlê; ki xiâm cho mơdêk tơbrê pơkâ, mơnhông tơdâng tơ’mô kơphô̆ ƀă tơmeăm khoăng kih thuâ̆t, rơtế ƀă mơnhông cheăng kâ  krúa lĕm, cheăng kâ a têa kơxĭ ƀă ôm hyô cho pro xiâm vâ mơnhông cheăng kâ tơdjuôm tơniăm ăm lâp kong pơlê”.

Tây Nguyên ƀă kơpong kĭng têa kơxĭ Nam Trung bộ cho kơpong tíu tơkăng kong - chuăn têa kơxĭ. Klêi hôp mâu kăn tung lâp tơnêi têa rôh má 14 dêi Đảng hiăng klêi tơniăn lĕm, Thượng tướng Đỗ Xuân Tụng, Ngế cheăng tung Tíu xiâm Đảng, Phŏ ngế pơkuâ khu xiâm cheăng Kal kí mâu lêng Việt Nam hiăng ai rôh pêi cheăng a Khu pơkuâ Mố đô̆i tơkăng kong dêi kong pơlê Dak Lak hnê thế rĕng tơbleăng pêi tơdroăng pơkâ hneăng Hôp kân 14 dêi Đảng tung rêh ối.

“Khi hdrối thế tơbleăng pêi kơtăng, nhên tơdroăng pơkâ hneăng hôp 14 dêi Đảng, pêi kơtăng tiô tơdroăng hnê mơhno dêi kăn xiâm pơkuâ hnê ngăn Đảng cho “2 rak tuăn tơmiât ki tro 2 mơdêk, 2 mơdât’’ ƀă “5 krá”. Kăn xiâm pơkuâ hnê ngăn tối mâu tơdroăng ki kal ‘nung ‘nâi tơ’lêi pâ hiăng tối tŭm tâi tâng tơdroăng hnê mơhno ƀă mâu lêng tối tơdjuôm, ƀă Mố đô̆i gak tơkăng kong tối krê”.

Kô ăm hlo, ing tơdroăng xiâm dêi hneăng hôp mâu kăn tung lâp tơnêi têa rôh má 14 dêi Đảng dế rĕng tơbleăng xua pêi tung rêh ối rêm hâi tơdroăng pêi nhên, tro tơrêm a kong pơlê, tơrêm tơdroăng cheăng. Tâi tâng dế tơrŭm ƀă chôa hvêa prôk tung hiă mơno phiu ro Đảng, hâk hơngui hơnăm nếo Bính Ngọ 2026.