Sap ing hơnăm kố, Leh tơbleăng Sầu riêng Krông Pač kô châ mơdêk chiâng Leh tơbleăng Sầu riêng kong pơlê Dak Lak. Tơdroăng kố hiăng châ Vi ƀan hnê ngăn kong pơlê Dak Lak môi tuăn tung tơdroăng ki tơpui mơgêi dêi Khu pơkuâ ngăn Đảng ủi, klêi kơ’nâi séa ngăn mâu tơdroăng ki klêi kơ’nâi mơnhông tơƀrê dêi mâu hneăng po leh mơdĭng hdrối. Tiô pơkâ pêi nếo, Leh tơbleăng Sầu riêng kong pơlê Dak Lak kô châ tơkŭm po tiô túa râ kong pơlê, tiah hmâ 2 hơnăm môi xôh.

Tiô tối hdrối, po mơdĭng rôh ki apoăng tiô túa pơkâ râ kong pơlê kô châ tơkŭm po a hơnăm kố, cho tơdroăng cheăng ki kal, tro ƀă tơrŭm pơla pêi chiâk, túa lĕm tro ƀă ôm hyô. Leh tơbleăng kô ai hên tơdroăng pêi pro, môi tiah: po kơchơ tê tơmeăm pêi lo ing chiâk deăng, po mơdĭng plâi kơhiâm, ăm rơxế prôk pơtăng a troăng, mơđah tơbleăng ngê̆ thuât chal krâ, mơđah tơbleăng ôm hyô, tơdjêp tê mơdró tơmeăm pêi lo ing chiâk deăng.

Tiô Khu ngăn túa lĕm tro, Tơ’noăng ivá ƀă Ôm hyô kong pơlê Dak Lak, kong pơlê dế mơjiâng pro túa pơkâ mơnhông pêi pro nhên ăm Leh tơbleăng Sầu riêng, ƀă pơkâ cho tơdroăng ki xiâm tung túa tơkŭm po ôm hyô hneăng má 3 hơnăm kố, malối cho rôh pơtê hâi mơjiâng Tơnêi têa lơ 2/9.