Riân sap ing hâi mơjiâng nah troh nôkố, tơkâ luâ 14 hneăng hôp kân, Đảng đi đo djâ troăng pêi pro tiô tơdroăng ki pơkal vâ thế dêi kăch măng vâ ing mê, po mơjiâng chiâng hên troăng tơdjâ, Tơdroăng pơkâ ki kân, ôh tá xê pakong hnoăng cheăng xiâm dêi tơnêi têa, xua ing kuăn pơlê. Phŏ Yăo sư-Tiê̆n sih Nguyễn Viết Thông, Kăn xiâm chêh tôm xo rơkong Hô̆i đong tơpui leăng Tíu xiâm Đảng tối tiah kố, ing Kơxop hlá mơ-éa ki kal ki apoăng dêi Đảng hơnăm 1930, Nguyễn Ái Quốc hiăng xúa tơdroăng ki hloh hlê rơkê plĕng dêi tơdroăng tơpui leăng dêi Chuh ngiah Mác-Lênin mot tung hnoăng cheăng ki păng ‘nâng dêi Việt Nam drêng pơkâ ‘na hnoăng cheăng ki kố:

“A roh hôp kân mơjiâng Đảng hiăng tối tơbleăng mâu kơxop hlá mơ-eá ki ‘nâng ‘nâi; Hlá mơ-eá ki chêh tối ‘nâng nâi; Luât chêh tối ki ‘nâi ‘nâi; Hnoăng cheăng ki kal xiâm dêi Đảng, mâu kơxop hlá mơ-eá pơkâ ki apoăng kố hiăng châ mơjiâng apoăng, hiăng chêh tối nhên, ki xiâm sap nah troh nôkêo ƀă la ngiâ dêi Đảng, mê cho tơdroăng ki ai pơxúa dêi kuăn pơlê ƀă ing mê troh nôkố, pin đi đo kơdo mơ-eăm pêi pro ăm hnoăng cheăng xiâm ki kân kĕng mê”.

40 hơnăm hiăng tơkâ luâ ƀă hên ngế xuân ối hlo ƀriê tung hiâm mơno dêi hâi khế ki vâi hmâ khê̆n cho “thời bao cấp”. Mê cho môi hneăng ki sap nah hâi chói ai dêi tơnêi têa ƀă mâu tơdroăng ki pá vâ kâi piu. Ing mê, tơdroăng ki Pơhlêh nếo hiăng tơkâ luâ hên rôh mơnhông tơƀrê ai troăng hơlâ pơkuâ. Tung mê, hiăng chêh pro klêi troăng hơlâ cheăng kâ nếo, pơhlêh tơdroăng cheăng kâ xúa tiô troăng hơlâ ‘mâi pơhlêh dêi Tơnêi têa. Yăo sư – Tiê̆n sih Tạ Ngọc Tấn, Phŏ hnê ngăn Hô̆i đong Lĭ luâ̆n Tơnêi têa tối tiah kố:

“Mê cho môi hvêa chêng prôk ki kal vâ djâ troh hên hĭn mâu tơdroăng pơkâ mơ’no môi tiah: tối rơdêi Tơnêi têa luât pơkuâ, tối rơdêi ‘na hnoăng cheăng ki kal dêi tơdroăng mơjiâng ‘mâi rơnêu Đảng, tối rơdêi kân ‘na túa lĕm tro, thăm mơnhông cheăng kâ tro ƀă mơjiâng, mơdêk túa lĕm tro, pêi pro tơdâng tơ’mô pơlê pơla. Mâu lĭ luâ̆n ki kal môi tiah mê hiăng châ mơgêi, mơnhên tối klêi kơ’nâi 20 hơnăm pơhlêh nếo dêi Đảng”.

Kơxop hlá mơ-éa chêh tơdroăng cheăng kal kí ki apoăng mơjiâng tơnêi têa tung hneăng ki prôk troh chuh ngiah xah hô̆i (‘mot tơ’nôm, mơjiâng pro hơnăm 2011) châ tơbleăng a Hneăng hôp XI dêi Đảng tối nhên ki pơkâ pêi troh tơdế chal 21: “Tâi tâng Đảng, tâi tâng kuăn pơlê pin athế mơ’no ivá mơ-eăm mơjiâng tơnêi têa chiâng môi tơnêi têa cheăng ƀă kơmăi kơmok rơkê plĕng, tiô troăng hơlâ xah hô̆i chuh ngiah”. Tơheăm tơdroăng ki kal tối tung Hlá mơ-éa chêh ‘na tơdroăng kal kí ki apoăng 2011 dêi Đảng mơhno ki rơkê plĕng tŭm têk ‘na “xah hô̆i, xah hô̆i chuh ngiah ki kuăn pơlê pin mơjiâng” xuân ối châ rak vế môi tiah ton tá troh nôkố. Phŏ Yăo sư - Tiê̆n sih Nguyễn Trọng Phúc, Học viện Chính trị Quốc gia Hồ Chí Minh vêh mơnhên tối:

“Klêi kơ’nêi hriăn plĕng ‘na tơpui leăng mơgêi tơdroăng ki ai păng ‘nâng ‘na tơpui leăng, ki rơhêng vâ tối ‘na troăng hơlâ chuh ngiah xah hô̆i ƀă troăng prôk ki vâ to chuh ngiah xah hô̆i Việt Nam tung pơla pơhlêh nếo mê tơdrêng amê chôa ‘lâng hvêa chêng prôk, pêi pro mâi tơdroăng ki tơpui leăng, malối cho 10 tơdroăng ki tơrŭm kân ki Hneăng hôpo kân Đảng má 13 hiăng mơgêi, mê cho ki ƀlêi chiâng ‘na mơjiâng, ‘mâi rơnêu pât hnoăng cheăng Đảng ‘na topui leăng, ‘na i hiâm mơno”.

Tung pơla tơdroăng rêh ối lâp plâi tơnêi hiăng pêi pro tiô hnoăng cheăng ki pơhlêh kân ‘na kŏng ngiê̆p roh má 4 ƀă túa cheăng pêi pro ki kân, thâ rĕng ƀă tá hâi teăm ai sap ing hdrối mê hía nah, ƀă mâu hnoăng ki pơhlêh kân ‘na kŏng ngê̆, ai tơdjâk kân ó rơdêi troh tâi tâng mâu kong têa pơhlêh nếo tung hriăn plĕng rơkê cho tuăn mơno ki pơhlêh nếo tung hnoăng mơnhông dêi tâi tâng mâu kong têa tung lâp plâi tơnêi.

Ki ƀlêi chiâng dêi Hneăng hôp kân mâu kăn teăng mâ tung lâp tơnêi têa rôh má 14, hdró tơdroăng ki kal pơtối 40 hơnăm hơ’lêh nếo, hdró mâu hơnăm pơtối dêi tơdroăng hơ’lêh nếo, tơrŭm tơrôa, cho hvêa prôk ki kal tung mơnhông tơnêi têa; tung mê, xo hơ’lêh nếo pro xiâm, xo kuăn mơngế  ƀă túa lĕm tro pro xiâm, xo tơniăn krê pơkua ngăn dêi ƀă hlối tơrŭm cheăng trâu rơdâ pro troăng pêi ki xiâm. Kố cho rôh vâ Việt Nam mơhno ki púi vâ mơnhông tơná, po troăng mơhlo tơmeăm ai hlâu tuăn ngôa rơkê, mơdêk ivá  tơbiêt cheăng ƀă troăng hơlâ mơnhôk mơdêk rĕng, krá tơniăn. Hneăng hôp 14 ôh ti xê to  pơkâ mơ-eăm kal kí, mê ối cho tuăn vâ pêi cheăng dêi rơxông nếo nôkố, djâ Việt Nam hvêa prôk tiô rơxông nếo môi tiah  pôa Tô Lâm, Kăn xiâm  pơkuâ hnê ngăn Đảng hiăng tối:

“Hneăng hôp mâu kăn tung lâp tơnêi têa rôh má 14 cho môi tơdroăng leh kân dêi Đảng ƀă Hnoăng mơngế pin, cho vâ hdró tơdroăng kal ton nah dêi Tơnêi têa tung rơxông Hồ Chí Minh, hdró ki tơrŭm  pêi pro tiô tơdroăng lĕm tro rơpâu hơnăm dêi Hdroâng mơngế vâ mơnhông tơná tung rơxông nếo” .

Luâ 96 hơnăm mơjiâng ƀă mơnhông, ing luât pơkâ ki apoăng troh mâu hnoăng cheăng pêi ki kân dêi 40 hơnăm Hơ’lêh nếo ƀă hdró Hneăng hôp 14, dêi Đảng pin đi đo môi tuăn pêi pro tiô pơkâ  xua Tơnêi têa, xua kuăn pơlê, ôh tá la lâi pơtê hơ’lêh nếo, ‘mâi rơnêu vâ pơkuâ tơnêi têa xông rơdêi. Bă Púi vâ mơnhông tơná tung rơxông nếo, xo pơ’lêh nếo hriê̆n plĕng ki nếo pro xiâm, xo kuăn pơlê ƀă túa lĕm tro pro xiâm, Việt Nam khên tơnôu hvêa prôk tiô troăng hơlâ mơnhông krá, tơniăn.