Tung mâu hâi ki kố, a Tơraih tơƀai lâp plâi tơnêi Cam Ranh, tơdroăng khăm ngăn ‘na pơreăng châ pêi pro kơtăng. Tơpah to kơmăi khăm ngăn châ chăn ing hơngế châ krâ ‘măn a kơpong vâ mot tíu tơkăng kong. Mâu ngế cheăng khăm pơlât mơdêk hnoăng cheăng gak ngăn 24/24 chôu, vâ tơniăn ‘na khăm ngăn tơmối troh. Tơdrêng amê, mâu kơ ƀăng chêh hnê tối ‘na hbrâ mơdât pơreăng châ tơbleăng a hên tíu tơ’lêi hlo ngăn, hnê tơmối ki troh hbrâ khăm ngăn ivá tơrŭm ƀă mâu ngế cheăng khăm pơlât tâng hlo tâ dêi tung châ tơviah rĕng khăm. Troh nôkố, rơpâu ngế tơmối lo ing kong ê hiăng châ khăm ngăn hdrối ƀă chêh inâi tơbleăng tơná tro tiô pơkâ.

Pôa Lê Văn Tùng, Ngế pơkuâ Tíu xiâm séa ngăn pơreăng ƀă ngăn pơkeăng pơlât lâp plâi tơnêi dêi kong pơlê Khánh Hòa ăm ‘nâi:

“Tơmối troh a Tơraih tơƀai lâp plâi tơnêi Cam Ranh mê 100%  ngế xuân thế khăm ngăn ‘nôi tung châ ƀă kơmăi ki chiâng khăm xêh. Ƀă mâu ngế ki lâi nhôm lo ing kơpong ai pơreăng lơ nhôm tâ tú virus Nipah, kăn ƀô̆ séa ngăn kô djâ ngế ki mê mot a veăng ăm ối krê pơtân, chêh inâi tơbleăng tơdroăng khăm ngăn. Tâng kal kố  tơbleăng ăm kơ koan rak ngăn tơnêi têa vâ djâ tơmối ki mê lăm pơlât a hngêi pơkeăng ki achê, khăm ngăn, xo mơheăm xét nghiệm”.

Ôh tá xê to a bo cheăng tơkăng kong, tơdroăng séa ngăn  mơdât pơreăng xuân châ mơdêk pêi séa ngăn tung lâp kong pơlê. Tíu xiâm Séa ngăn mơdât pơreăng Khánh Hòa tăng ngăn nhên vâ ‘nâi tơdroăng pơreăng tâ tú a mơngế tung tơnêi têa ƀă a mâu ngế kong têa ê, mơdêk séa ngăn khăm mâu ngế tung kuăn pơlê ƀă mâu hngêi pơkeăng cheăm bêng, vâ teăm ‘nâi lơ ai ngế tâ tú, tăng ngăn hlối thế rĕng klâ krê mơngế ki lâi nhôm tâ pơreăng.

Tung pơla mê, kơvâ ngăn pơkeăng kong pơlê ‘nai nhên séa ngăn mơdât pơreăng ing tíu tê mơdró tơkăng kong ƀă tung kuăn pơlê cho tơdroăng hbrâ ki kal má môi. Ƀok thái pơkeăng Huỳnh Trọng Tân, Ngế pơkuâ ƀơrô cheăng dêi Tíu xiâm ngăn ‘na pơkeăng ƀă khăm pơlât dêi kong pơlê Khánh Hòa ăm ‘nâi:

“Ing tơdroăng séa ngăn krá khât tíu tê mơdró tơkăng kong ƀă kuăn pơlê tiô hnê mơhno dêi Khu xiâm ƀă Khu ngăn pơkeăng pơlât, nôkố hâi tâng tối ai ngế ki lâi tro la ngin xuân hbrâ rơnáu mâu kơpong xo pơlât môi tiah a hơnăm ai pơreăng COVID 19 nah, hlối tơrŭm krá ƀă mâu tíu pêi cheăng vâ tơ’nôm rơxế, kế tơmeăm kơjo pơlât drêng kal vâ”.

Pơreăng xua virus Nipah cho pơreăng tâ tú ối tung khu A, mơni kô kâi tâ tú ing kuăn kiâ troh kuăn mơngế ƀă ing mơngế kô troh mơngế ki ê, ƀă kơxô̆ mơngế hlâ riân tâk sap 40-70%. Nôkố hâi ai vaccine ƀă pơkeăng ki pơlât xêt. Tung pơla Ấn Độ tối mâu ngế nhôm tâ tú, kô tơ’lêi pro chiâng tâ tú troh mơngế ki ê. Hlo ti mê, kơvâ ngăn pơkeăng Khánh Hòa pơtối hbrâ rơnáu, hnê tối ăm kuăn pơlê hbrâ rơnáu đi đo, rêm ngế ‘nâi hbrâ rơnáu xêh vâ mơdât pơreăng, hlối tơrŭm krá ƀă mâu kơ koan ngăn pơkeăng vâ tơniăn ivá ăm tơná ƀă kuăn pơlê.

A Tíu pơlât, ki xiâm drêng kố cho pro tơniăn pơkâ klâ krê nhên ƀă tơniăn ăm tá mơngế ki tâ tú ƀă mơngế cheăng ngăn pơlât. A hngêi pơkeăng Nhiệt đới Khánh Hòa, kơpong klâ krê châ mơhno  ăm krê, troăng prôk phá há, ai tŭm tơmeăm pơkeăng pơlât, mâu ngế ƀă hbrâ tơmeăm kring vế tơná.

Ƀok thái pơkeăng Lý Thế Huy, Phŏ pơkuâ ngăn Hngêi pơkeăng Nhiệt đới kong pơlê Khánh Hòa, ăm ‘nâi:

“Hngêi pơkeăng hiăng hbrâ mơngế, tơniăn kơpong pơlât krê, klâ mơhno troăng prôk, ai tŭm mâu tơmeăm pơkeăng pơlât, mơngế pêi cheăng khăm pơlâ hlối hbrâ tơmeăm kring vế tơná vâ pêi hnoăng cheăng hbrâ mơdât xuân môi tiah pơlât drêng ai pơreăng tâ tú”.