Pơkeăng pơlât rơtế ƀă túa lĕm tro, hnê hriâm cho mâu tơdroăng ki xiâm kal khât, ôh ti xê to pơkâ mê ối cho xiâm mơhnhôk  vâ rế ai hên mơngế pêi cheăng rơkê. Mê cho tơdroăng tối tơbleăng dêi pôa Tô Lâm - Kăn xiâm pơkuâ hnê ngăn Đảng a rôh hôp tơpui a tôh 2 tơdroăng Pơkâ dêi tơnêi têa ‘na rak ngăn ivá mo lĕm, pơ’leăng mâ mơngế vâ rế hên ƀă mơnhông tơƀrê ƀă tơdroăng pêi pro hơ’lêh  tiô chal nếo nôkố, mơdêk ki tơƀrê tung hnê hriâm ƀă hnê mơjiâng tuăn ngoâ rơkê pơla hơnăm 2026-2035.

Tiô Kăn xiâm pơkuâ hnê ngăn Đảng, pơkâ dêi tơnêi têa ôh tá xê to krê dêi kơvâ hnê hriâm lơ ‘na pơkeăng pơlât, mê ối cho dêi tâi tâng pơlê pơla, tâi tâng kuăn pơlê thế hmâng pêi pro. Ƀă ‘na pơkeăng pơlât, Kăn xiâm pơkuâ hnê ngăn Đảng pơkâ thế pơ’lêh tơdroăng cheăng ki kal chiâng rak ngăn ivá rôh apoăng ƀă hbrâ mơdât, pơxâu phâk xap ing xiâm mâu tơdroăng ‘na hyôh kong prâi, têa krúa, tơniăn krúa kế kâ - mâu tơdroăng ki xiâm pro chiâng ai pơreăng châi tamo. Tâng ôh tá tơbleăng mơnhên pơxâu phâk ing xiâm, mơhé ‘no hên liăn to lâi hngêi pơkeăng xuân ôh tá kâi bê tiô tơdroăng púi vâ.

“Ƀă pơkeăng pơlât, ki kal cho rak ngăn ivá rôh apoăng, thế chêh hbrâ rơnáu hdrối. Mê nôkố dế pêi hên khăm pơlât, môi tiah dế pêi bú vâ pơkí kơtôa - xua hbrâ rơnáu ôh tá rơkê mê pơreăng chiâng pơtối tâ tú. Thế ‘nâi nhên tơrêm kơvâ cheăng, ki lâi dế ai dế pêi nôkố? 5 hơnăm nếo pin kô vêh riân ngăn nếo há lơ ôh? Thế ‘nâi nhên gá tiah mê. Pơreăng kơ o êi xôu tung lâp plâi tơnêi hiăng lôi na nah, lôi ăm châ tâ tú alâi xuân thế hbrâ mơdât chiâng mơhrê hên liăn.. Êi kliâm ti lâi, tâ tú ing lâi? Tiô a tơmiât tơdroăng dêi tơnêi têa pêi pro cho thế pêi nhên mâu tơdroăng, mâu tơdroăng pơkâ mê”.

Tơdroăng pơkâ dêi tơnêi têa ‘na rak ngăn ivá ăm mo lĕm, ‘na pơ’leăng mâ mơngế ƀă mơnhông tơƀrê pơla hơnăm 2026- 2035 châ Kuô̆k hô̆i tơbleăng, ƀă pơkâ tâi tâng cho tơniăn ăm rêm ngế kuăn pơlê xuân châ rak ngăn, khăm pơlât, rak ngăn ivá sap apoăng, hbrâ mơdât ing apoăng, ing hơngế, a pơlê cheăm, kơdroh châi tamo; mơdêk ai hên kuăn ‘nĕng, mơ-eăm ăm kơxô̆ kuăn kơdrâi hên  tơ’mô kuăn kơnốu, hmâ ƀă kơxô̆ rĕng krâ dêi pơ’leăng mâ mơngế, mơdêk ki tơƀrê lĕm kơxô̆ pơ’leăng mâ mơngế, mơdêk rak ngăn krâu ăm mâu khu tơ’lêi tro châi tamo; veăng mơdêk ivá mo lĕm, tuăn ngôa tơleăng lĕm, râ ki kân, tơniăn tơƀrê tung rah ối dêi kuăn pơlê, mơjiâng tơnêi têa Việt Nam mo dâi.

‘Na troăng hơlâ ‘no liăn pêi Tơdroăng pơkâ dêi tơnêi têa tung rak ngăn ivá, pơ’leăng mâ mơngế ƀă mơnhông tơƀrê pơla hơnăm 2026-2035, tơdroăng pêi pro la ngiâ rak ngăn ivá tâi tâng kuăn pơlê, mơdêk ivá pêi cheăng dêi hngêi pơkeăng cheăm, hbrâ mơdât pơreăng ing apoăng, ‘mâi hơ’lêh ki tơbrê ‘na pơ’leăng mâ mơngế, hbrâ ví ki rĕng krâ ƀă mơdêk veăng kơjo kum ăm khu ki tơ’lêi tro rong râ châi tamo. Jâ Đào Hồng Lan, Ngế xiâm ngăn pơkeăng – khăm pơlât ăm ‘nâi:

“ ’Na tơdroăng tơkêa bro,  tơdroăng kal pêi, hiăng tơkŭm ing xiâm vâ tơbleăng pêi. Tơdroăng ki kal vâ mơdêk tơƀrê pơkeăng pơlât ƀă mơngế pêi cheăng thế rơkê tung khăm pơlât a cheăm, bêng, kong pơlê, hbrâ mơdât pơreăng, mơdêk ‘na pơ’leăng mâ mơngế, mơnhông tơƀrê tơniăn ‘na kơxŏ pơ’leăng mâ mơngế, hmâ ƀă ki rế krâ dêi pơ’leăng mâ mơngế, rak ngăn pơlê pơla ăm mâu ngế tơ’lêi tro châi tamo. Kố cho mâu tơdroăng ki kal, xiâm dêi mâu tơdroăng khăm pơlât ƀă pơ’leăng mâ mơngế, dế kal châ tơkŭm mơngế  liăn ngân vâ tah xơpá, tơvâ tơvân tung tơdroăng tối tơbleăng pêi. Mâu tơdroăng ki pá vâ tơbleăng pêi châ mâu pơkâ pêi rah hiăng tối tơdroăng pơkâ dêi Tíu xiâm”.

Ki vâ pêi nhên dêi Tơdroăng  pơkâ  tơnêi têa ‘na rak ngăn ivá, pơ’leăng mâ mơngế ƀă mơnhông tơƀrê pơla hơnăm 2026-2035 cho veăng ‘no hnoăng  pêi tiô pơkâ dêi cheăm, bêng, malối kơpong pêi ai tiô Khu xiâm pơkâ dêi tơnêi têa ‘na khăm pơlât cheăm ai 90% a hơnăm 2030 ƀă 95% troh hơnăm 2035. Mơ-eăm kơxô̆ mơngế kuăn pơlê châ pro hlá mơ-éa khăm ngăn ivá điê̆n tưh ƀă rak ngăn ivá tiô rơxông mơngế châ 100% sap hơnăm 2030 ah. Ki xiâm séa ngăn tơdroăng châi tamo mâu kong pơlê, pơlê kong kân ai tŭm ivá xét nghiệm  vâ ‘nâi pơreăng tung châ, tung châ hôm ai ivá ki kâi trâng ƀă pơreăng chiâng tâ tú ki rơ iô, ‘na têa xúa ôm krúa lĕm, mơgrúa tơnêi tíu tâ tá hngêi trung hriâm tiô pơkâ dêi Khu xiâm ngăn pơkeăng ta troh hơnăm 2030 kô châ 100%.

Kơxô̆ hngêi pơkeăng cheăm bêng, kơpong tơbleăng pêi pro hbrâ mơdât pơreăng, rak ngăn, pơlât mâu tơdroăng châi ki chiâng tâ tú tiô hnê mơhno dêi Khu xiâm ngăn pơkeăng troh hơnăm 2030 châ 100% ƀă pơtối troh hơnăm 2036. Kơxô̆ mơngế krĭn ôh tá păng kân a vâi hdrêng pá xôp 5 hơnăm troh hơnăm 2030 chu kơdroh pá xôp 15% ƀă troh hơnăm 2035 chu kơdroh ối pá xôp 13%.