Ối ‘nân tơkôm xo pơkeăng klêi khăm, pôa Đoàn Thanh Phương, thôn Hội Phú, cheăm Tuy An Đông ăm ‘nâi:

“Mơnê khât kơ mâu kơ koan ing mâu khu hmâ lăm tŏng gum, tơnêi têa, drêng ngin tro kong mêi têa lân lu bú ‘nâi to kơpon, pŏng yŭt to a loăng hiu, tâi tâng hngêi lu tâi ki ‘nâ têa mơhiu. Klêi rôh kong mêi têa lân lu kân tiah mê mâu khu tŏng gum hiăng hbru tơmeăm, lăm pôu, djâ ngin troh a tíu tơniăn,  mâu kơ koan hiăng kum khăm pơlât, xoăng pơkeăng mơnê khât ‘nâng”.

Râng tơdrong tâ pơkeăng nếo xo, jâ Lê Thị Hương ối a bêng Đông Hòa, kong pơlê Dak Lak tối hlối rơrêk lo têa mâ drêng mâu ƀok thái pơkeăng lo ing hơngế, troh lăm pôu rak ngăn ivá.

“Tâng tối ai mâu khu lo ing Pơlê kong kân Hồ Chí Minh troh lăm khăm ăm kuăn pơlê ki châi tamo ngin hâk ro ‘nâng, mâu ƀok thaí pơkeăng mâu ngế cheăng ngăn ‘na pơlât pêi cheăng khât, hnê tối nhên ăm kuăn pơlê. A mơnê ‘nâng, rơrêk tung hiâm mơno lo têa mâ”.

Sap hâi lơ 23/11 troh nôkố, tơdrêng ƀă mâu ƀok thái pơkeăng mơngế cheăng ‘na khăm pơlât a kong pơlê Dak Lak hiăng tơdah 5 khu ƀok thái pơkeăng, mâu ngăn pơkeăng ki lăm pleăng hnoăng tơná lo ing Hà Nội, Hải Phòng, Đồng Nai, Pơlê kong kân Hồ Chí Minh…  troh tơbleăng khăm pơlât a 11 to cheăm ki tro tơdjâk ó kong mêi têa lân lu, ƀă 22 tíu ki lăm prôk khăm ukố umê. Krê to a Đồng Nai rah 3 khu ngăn pơkeăng troh veăng khăm.

Thak sih, ƀok thái pơkeăng Chuyên khoa II Nguyễn Trọng Nghiã, Phŏ pơkuâ hngêi pơkeăng Nhi Đồng Đồng Nai ăm ‘nâi, bú tung  2 hâi pêi cheăng a cheăm Hòa Mỹ ƀă Tuy An Đông, khu kố hiăng khăm vâ chê 1.500 ngế kuăn pơlê, tung mê ai  vâi hdrêng ki hên to mâu ngế kơ o kơ ôk lo têa môh, tơngê, krĭn; mâu ki kân ai hên tơdroăng châi ‘na kéa, mâu ki ‘nâ kơtêi kơtâu têi, châi pơtok nong ƀă thĕn, ou, rơtốu xua heăn tro loăng mâu kế pro tơkêa kéa.

“Khu kăn hbrâ nhên, pin djâ môi khu ƀok thái pơkeăng tung mê ai tá ƀok thái pơkeăng pơlât ngăn vâi hdrêng, ƀok thái pơkeăng pơlât mâu hiăng kân, ƀok thái pơkeăng pêi cheăng pơlât tơdrêng tung mâu tơdroăng châi tamo ƀă 1 toăng rơxế chơ pơlât tơdrêng, 1 toăng rơxế chơ tơmeăm. Tơdroăng tơkŭm po khăm pơlât dêi ngin ai tŭm pơkeăng. Tung pơkeăng ai 2 khu: môi khu nhóm 1 rơpâu tơdrong pơkeăng rơpŏng hngêi xoăng tê kơtê môi tiah pơkeăng kơdroh tơngê, kơdroh châi, châi klêa pơyâng lo têa... Má péa nếo, pơkeăng ki djâ vâ khăm pơlât ai chêh toa’’.  

Tơdrêng ƀă khăm pơlât, kơvâ ngăn pơkeăng kong pơlê Dak Lak khăm pơlât hdrối a mâu tíu klêi kơ’nâi têa lu. Mâu khu pêi cheăng rĕng dêi Khu xiâm ngăn pơkeăng tơrŭm ƀă kŏng an, mâu lêng ƀă mâu kăn pơtối tôm tơkŭm xok, kơđu mâu kuăn kiâ hlâ, mơgrúa lĕm - tâ pơkeăng tung têa ki kuăn pơlê xúa ôu kâ hum roh. A mâu kơpong têa hiăng xiâ, kô xôh pơkeăng kơdê tri trôu kiâ ngu ngĕng, xôh pơkeăng vâ kơdroh lơ tâ tú pơreăng. Têa klôh châ xếo, tâ pơkeăng Cloramin B; tơdroăng cheăng séa ngăn mâu pơreăng tơ’lêi tâ tú môi tiah tơngê lo mơheăm, châi klêa lo têa, thĕn kŏng chêng rơkong châ mơdêk khăm khăm ngăn. Ƀok thái pơkeăng Châu Trọng Phát, phŏ pơkuâ Tíu xiâm Séa ngăn mơdât pơreăng kong pơlê Dak Lak ăm ‘nâi:

“Rêm hâi ngin mơjiâng sap 5-10 khu, tơbleăng troh mâu cheăm bêng. Pakĭng tơdroăng hnê tối veăng kơjo kum kuăn pơlê tung tơdroăng mơgrúa lĕm mâu tíu, mơgrúa lĕm hbrâ mơdât pơreăng, ngin xuân pêi tơdroăng cheăng séa ngăn vâ rĕng châ ‘nâi ai pơreăng ki tơ’lêi tâ tú. Pakĭng mê ngin xuân hbrâ hnê kuăn pơlê ‘na tơdroăng pêi pro vâ ai têa lĕm xúa tơniăn xuân môi tiah hnê ‘na rêh ối krúa lĕm, pêi krúa kế kâ ăm kuăn pơlê a mâu cheăm bêng”.

Kơnôm rĕng tơmâng khât dêi kơvâ ngăn pơkeăng kong pơlê tơdrêng ƀă tŏng kum teăm tơdrêng dêi mâu khu ƀok thái pơkeăng dêi mâu kong pơlê, troh nôkố lối 5.000 ngế kuăn pơlê a mâu cheăng kơpong tro têa lu hiăng châ khăm, pơlât ăm vâi pơkeăng. Mâu tôh ngăn pơkeăng ki lăm khăm ukố umê xuân khăm kơ-êng ‘na ivá, hnê kuăn pơlê pơlât a châ tamo a hngêi ƀă hlối ăm mâu pơkeăng ôu pơkeăng pik, kum kuăn pơlê kơdroh tâ pơreăng, rĕng vêh tơniăn tung rêh ối klêi têa lu.