Ing môi tíu pêi cheăng kŭn ƀă tơmeăm khoăng ối iâ tá hâi tŭm, troh nôkố Kơ koan xiâm hiăng chiâng tíu xiâm khăm pơlât hbrâ mơdât apoăng kơvâ dêi kơpong. Tung 5 chât hơnăm hiăng hluâ, Kơ koan xiâm hiăng veăng gum kal khât tung mâu tơdroăng pêi cheăng khăm pơlât kân môi tiah mơdât pơreăng kôk, rơxok chó, tah pơreăng châi hrê a kuăn ngá, mơdât mâu pơreăng rơ-iô môi tiah châi so, lo xêi, tơngê lo mơheăm, theăn kŏng chêng rơkong.

Xông tơpui a roh leh, jâ Nguyễn Thị Liên Hương, Phŏ Ngế xiâm Khu xiâm khăm pơlât mơnhên ƀă kheăn kơdeăn mâu tơdroăng mơ-eăm, veăng gum dêi khu pú hên Kơ koan xiâm 50 hơnăm mơjiâng ƀă xông kân. Tơdrêng amê pơkâ thế, Kơ koan xiâm tơtrŏng hbrâ mơdât pơreăng, thăm pơtâng tối, hnê hriâm mâu troăng rak vế ivá tung kuăn pơlê, hbrâ mơdât pơreăng ki tâ tú, hbrâ liăn ngân vâ hbrâ mơdât pơreăng ƀă mâu tơdroăng ki kal khăm pơlât pơlê pơla thâ.