Klêi kâ hmê kơxêi măng, jâ Phạm Thị Dự (ối a Hưng Yên) tâ châi ko, hêng hêa, châi ‘lo ’lok tung mâ. Klêi môi măng, tơdroăng pơxiâm châi mâ dêi jâ kơ’nâi pái hâi tâ rế  râ ó, châi mâ rế ó tâ, mê jâ ƀă mâu ngế tung rơpŏng hngêi hiăng chơ jâ lăm a Hngêi pơkeăng pơlât mâ Trung ương vâ  khăm. Klêi ƀok thái khăm klêi mê tối, jâ Dự kơdrâ ‘nâi tơná tro châi dêi pơreăng Glôcôm (vâi hmâ tối cho xiâm pơreăng ki pro vâ chiâng ‘lôa mâ):

“A bú tơmiât tơná tơngê ki môi tiah hmâ tê, gá mot tung tá, ôh tá tơmiât tơná tro pơreăng ki vâ pro chiâng ‘lôa mâ. Gá pro châi môi tiah vâ pơtôu pơchêh tung mâ, châi ó lêi, pôu pring kong, klêi châi mê gá mot troh châi a mâ, ối tá kâi chiu, ôu pơkeăng xuân ôh tá kâi kơdroh châi. Mâu ƀok thái pơkeăng khăm ngăn pơlât ƀă lazer hlối ăm ôu pơkeăng, pơlât ngăn tung pơla 2 măng tĭng. Laga, klêi kơ’nâi 2 măng tĭng pơlât, lăm khăm nếo, tơdroăng châi mâ mê xuân ôh tá hâi kơdroh mê ƀok thái pơkeăng hiăng pơkâ thế pâ vâ pơlât’’.

Ki ăm ‘nâi pro châi apoăng mê cho châi ko, châi mâ môi tiah jâ Dự, ngế ki châi hơnăm ối nếo cho nâ Đỗ Thị Lan Hương (ối a Hải Phòng) tâ  khíu hơ’nêng ó drêng ‘nâi tơná tro pơreăng Glocom. Hdrối mê, nâ Hương xuân hâi chói châi mâ ki tiah mê, pakĭng mâ hlo achê, to ton tâ dêi mâ châi iâ, rơlâi rơlo la bú ăm ‘nâi môi tiah ki hmâ tâ klêi mê ah gá prêi xêh:

 “Ki khât tung rôh apoăng a kơdrâ tơchĕng hên tôu tuăn, hlối tơmiât tơdroăng ki ôh tá xê, tá tro; la klêi khăm ƀă mâu ƀok thái pơkeăng kố hlê tơpui rơkê hơlêm vâ á pôi tá tơchĕng hên. Ki hdrối rôh ki kal á châ pơlât ƀă pơkeăng ôu tơkŭm, khăm ngăn rêm măng tĭng, rêm khế ăm ngế ki mê, la pơreăng pro châi tiô rơnó mê rế tâk tiô khế hơnăm mê ôh tá kâi hlŭn, klêi mê pơreăng pro vâ ‘lôa mâ rế ôh tá tơniăn, mê ai tối thế pâ” .

Tiô mâu ƀok thái pơkeăng tối, Glocom cho môi túa pơreăng ki xiâm xua thăm pro tơbrêi troăng veăn mâ troh tơdroăng pro rế kơdroh ki pro ăm xáu hlo ƀă ton ing mê kô pro ‘lôa mâ. Pơreăng Glocom xuân cho pơreăng ki pro hên ngế chiâng ‘lôa mâ bú kơ’nâi plŏng mâ. Tâng ôh tá rĕng châ ‘nâi ƀă ôh tá rĕng pơlât prêi, mâ dêi ngế ki châi mê kô chôa  kơdroh ta troh mâ ôh tá xáu hlo ta ah ƀă hlối ôh tá chiâng  prêi lĕm xếo.

Ƀok thái pơkeăng Nguyễn Thị Thanh Hương, khoa Glocom, Hngêi pơkeăng pơlât mâ Trung ương ăm ‘nâi, vâ rĕng châ ‘nâi ƀă kâi pơlât prêi pơreăng Glocom, bú ƀă tơdroăng lăm khăm ƀă rah ngăn tê:

“Má môi cho mâu ngế tung rơpŏng hngêi ai ngế tro pơreăng mê; mâu ngế tro pơreăng mê tung châ môi tiah ‘na kơtêi kơtâu têi, kơtâu chôa, nŭm nheăn, châi gut, châi kóu kơxêng chêng kŏng ƀă mâu tơdroăng châi ki ê. Kơtêi kơtâu têi, nŭm nheăn kal thế lăm khăm tiô rơnó vâ ‘nâi tung klŏng mâ, mơdât lơ chiâng ai tơdroăng châi Glocom. Malối, hên ngế hơnăm hiăng krâ hmâ ôu pơkeăng nhâ nloăng... kô tơ’lêi tro pơreăng Glocom klêi ôu mâu pơkeăng mê. Pakĭng mê, mâu ngế hơnăm ối nếo ki ôh tá xáu hlo, mâ ngăn achê - la kơlo ki tâk kơxô̆ rĕng xuân kal thế khăm ngăn Glocom xua hên ngế thăm rế ôh tá xáu hlo rĕng hiăng chiâng tro pơreăng Glocom. Mâu ngế ki tiah mê xuân kal thế lăm khăm tiô rơnó ƀă khăm rah vâ rĕng ‘nâi”.

Ƀă mâu ngế tiah mê hiăng châ khăm tối pơreăng Glocom, ngế ki tiah mê thế rêh ối ƀă pơreăng ki mê plâ rơxông, ƀă tơdroăng ôh tá xáu hlo kô ôh tá kâi vêh lĕm xếo; xua mê, tơdroăng khăm ngăn, pơlât cho kal păng ‘nâng. Ngế ki tro pơreăng mê pơlât ƀă ôu pơkeăng tro chôu, khăm tro hâi khế pơkâ, ôh tá chiâng hmôu pơ rôe ôu xêh pơkeăng vâ rak kơlo dêi mâ ki ối xáu hlo, ví ah lơ chiâng ‘lôa mâ.