Klêi tăng ngăn, Trung tươ̆ng Nguyễn Bá Lực tơmâng xo ƀă tối tơdroăng ki mơ-eăm, tăng ‘nâi plĕng dêi râ ủi, ngế pơkuâ Lữ đoàn 198 tung tơdroăng cheăng hbrâ hriâm tâp. Mâu tơdroăng châ hbrâ cho hâi achê ƀă tơdroăng pơkâ tơdroăng cheăng pêi, hlối tơniăn lĕm tro, khoa hok ƀă tá ai tơdroăng klâi.

Phŏ xiâm ti tăng ‘nâi plĕng dêi Lêng Việt Nam pơkâ thế Lữ đoàn pơtối séa ngăn, pê klêi mâu tơdroăng krâ ‘măn tơmeăm a tíu pơtâp tơplâ, plông pơtâp; tơmâng hriâm ăm rơkê tâ nếo, tơtro ƀă ki ai khât dêi tơdroăng cheăng, tơniăn ‘na mơngế ƀă pháu hơnêa. Drêng troh hơnăm nếo, Trung tươ̆ng Nguyễn Bá Lực rơkâu kăn ƀô̆, mâu lêng Lữ đoàn Đặc công 198 tơrŭm dêi rơpó, tơkâ luâ xơpá, tơ’noăng hriâm rơkê, hbrâ vâ tơplâ pê klêi hnoăng cheăng pơcháu tung hơnăm 2026.