Klêi kơ’nâi tối tơbleăng tŭm ‘na mâu tơdroăng ki pêi pro ƀlêi chiâng dêi tơnêi têa tung tâi tâng mâu kơvâ cheăng, pôa Tô Lâm, kăn xiâm pơkuâ hnê ngăn cheăng Đảng ăm ‘nâi, klêi kơ’nâi Hneăng hôp XIV ai hên hĭn tơdroăng cheăng ki kal tung mơjiâng Đảng kô châ tơbleăng pêi tơdâng tơ’mô môi tiah ‘mâi pơhlêh, ‘mot tơ’nôm ƀă pơkâ pêi pro tơdâng tơ’mô mâu tơdroăng hnê mơhno, pơkâ ‘na pêi pro Tơdroăng pơkâ dêi Đảng ƀă tơdroăng cheăng séa ngăn dêi Đảng; pơtối pơhlêh nếo rơdêi tơdroăng cheăng kăn ƀô̆ tiô troăng ki ai khât tơdrăng; rah xo tro ngế, pơcháu tro tơdroăng cheăng, xo tơdroăng pêi tơƀrê dêi tơdroăng cheăng, tơdroăng loi pôk xo dêi Kuăn pơlê ƀă klêi kơ’nâi hlo tung tơdroăng ki ai khât pro kế ki vê tơdroăng ki kal, lơ môi tiah tơbleăng pêi mâu troăng hơlâ thăm mơnhông tơdroăng cheăng hbrâ mơdât kâ kơ hveăm, pro mơhrê liăn ngân, hbrâ mơdât ‘na hiâm mơno tơchĕng tơmiât pêi mâu tơdroăng ôh tá ‘ló, túa rêh ối, mâu tơdroăng ki mơhno ki ai khât, ki pơhlêh tung tíu pêi cheăng.

Tối nhên pa môi hdroh nếo, Đảng, Tơnêi têa đi đo loi nhuô̆m mâu ivá veăng gum kân dêi mâu kăn pơkuâ, kăn xiâm pơkuâ hneăng hdrối ing mâu hneăng, Kăn xiâm pơkuâ hnê ngăn cheăng Đảng rơhêng vâ pơtối châ xo tơdroăng ki veăng tơpui tối kơnía dêi mâu kăn pơkuâ tíu xiâm Đảng hneăng hdrối vâ gum Khu pơkuâ ngăn Tơnêi têa, Khu xiâm pơkuâ tơdroăng kal kí, Khu pơkuâ ngăn Đảng hneăng XIV pơtối pêi pro klêi troăng hơlâ tŏng gum, ƀă mơdêk tâ nếo ki rơkê tung pơkuâ, hnê mơhno djâ Tơnêi têa prôk krá rơdêi mơnhông tơniăn tung la ngiâ.