A cheăm Hoà Thịnh, kong pơlê Dak Lak, tíu ki ai tơdjâk dêi khía mơhot kân, têa lân lu, klêi kơ’nâi khu hno, rơchôa têa châ ‘mâi rơnêu hiăng chía lĕm tơniăn, mê nôkố, têa hiăng hiu mot tung ƀăng klâng kuăn pơlê, vâi krâ-nhŏng o tung pơlê veăng lăm pêi tơnêi, thâ rĕng mơdâ, xế dêi hdrê. Tung tơnêi tíu lối 2.200 ha báu rơnó Xeăng Tôu, troh nôkố cheăm kố hiăng mơdâ pêt tơmeăm tơkéa vâ chê klêi. Pakĭng 110 tâ̆n hdrê báu ki hiăng mơdâ, xế xua kong pơlê hbru gum ăm, mê ki u ối dâng 180 tâ̆n, kong pơlê Dak Lak hiăng ai troăng hơlâ tŏng gum liăn ngân vâ kuăn pơlê ai liăn tí tăng rôe xêh hdrê báu ki tơtro ƀă klâng chiâk tơná, vâ kơ teăm rĕng mơdâ pêt tro rơnó pêi klâng pêi chiâk. Pôa Mai Tấn Huy, kuăn pơlê a cheăm Hoà Thịnh ai tối tiah kố:

“Vâi krâ-nhŏng o dê pêi dêi báu a rơnó Xeăng Tôu kơnôm châ tơnêi têa gum hdrê pêt vâ vâi krâ kuăn pơlê mơdâ dêi hdrê teăm rơnó. Hyôh kong prâi nôkố hiăng tơ’lêi hlâu ăm kuăn pơlê vâ mơdâ hdrê. Pói tơngah ga kô chiâng dâi lĕm”.

Ôh ta xê to a Hoà Thịnh, klêi kơ’nâi têa lân lu, hên kuăn pơlê ối a peăng mâ hâi Lo kong pơlê Dak Lak tơkéa vâ tối vâ hía dêi tâi tâng mâu hdrê mơdâ pêt. Tiô riân ngăn dêi kơvâ ngăn ‘na chiâk deăng, tâi tâng hdrê báu ki kuăn pơlê kal vâ mơdâ pêt a rơnó Xeăng Tôu hơnăm kố dêi tâi tâng kong pơlê, ai dâng 26.000 tâ̆n. Troh nôkố, ing ivá cheăng dêi kong pơlê ƀă tơdroăng veăng tơdjuôm pêi dêi mâu khu mơdró kâ, khu râ cheăng, mơngế krê hiăng ai dâng 15.000 tâ̆n hdrê bái hiăng teăm pơtroh ăm a kŏng dêi kuăn pơlê. Méluâ ti mê, tâng vâ pơchông ngăn ƀă tơdroăng ki kal vâ păng ‘nâng dêi kuăn pơlê, mê lâp kong pơlê Dak Lak xuân ôh tá bê dâng 11.000 tâ̆n hdrê, kong pơlê dế pơtối tŏng gum liăn ngân vâ kuăn pơlê hbrâ rơnáu dêi hdrê tung mâu hâi la ngiâ kố ah.

Pakĭng kơxô̆ liăn ki tŏng gum ing kong pơlê, mâu khu hriăn ngăn ‘na khoa hok xuân kơhnâ khât tung rơtế prôk ƀă kuăn pơlê a kpơng ki tro tơdjâk xua ing kía mơhot kân, têa lân lu. Tung rpơnó eăng Tôu kố, Viê̆n hriăn ngăn ‘na Khoa hok Kih thuât  Duyên hải Nam Trung Bộ hiăng  pơkâ pêi pro pơtối ‘na gum ăm hdrê báu troh a kuăn pơlê mâu pơlê cheăm ối peăng Mâ hâi lo kong pơlê Dak Lak. Pôa Nguyễn Đức Thọ, Kăn ơkuâ ngăn Tíu xiâm hnê mơhno, pơtroh gum ‘na kŏng ngê̆ ƀă mơhnhôk pêi chiâk deăng, cheanwg tung Viê̆n hriăn plĕng ‘na Kih thuât Duyên hải Nam Trung Bộ tối ăm pin ‘nâi, hên tíu ki pơtroh gum xing xoăng, dâng tâ̆n báu hdrê hiăngu châ pơtroh a kŏng dêi kuăn pơlê.

“Ngin hiăng djâ mâu hdrê ki châ tối cho tro kih thuât vâ kuăn pơlê mơdâ pêt, mâu hdrê ki kố ga dâi lĕm khât, laga, hiăng tro hrá tâng vâ pơchông ngăn ƀă tơdroăng ki mơdâ pêt dêi rơnó kố mâu hơnăm hdrối mê hía nah. Xua ti mê râ, ngin khoh gum ăm kuăn pơlê mâu hdrê ki iâ khế vâ ga rĕng teăm xiu, tơtro ƀă rơnó Xeăng Tôu ăm vâi krâ kuăn pơlê”.

Tiô tơdroăng chêh tối, troh a chôu phut kố, lâp kong pơlê Dak Lak hiăng mơdâ pêt châ dâng 70% a ƀăng tơnêi klâng, tung tâi tâng 26.000 ha báu rơnó Xeăng Tôu. Tơnêi ki u ối kuăn pơlê xuân dế pơtối xế, mơdâ dêi hdrê klêi kơ’nâi hiăng xing xoăng hdrê báu ăm kuăn pơlê ƀă ăm ga tơtro ƀă hyôh kong prâi ki tơtro. Méluâ pêi chiâk pêi deăng a rơnó kố hiăng hrá tâ rơnó ki păng ‘nâng, laga, tơdroăng ki xúa mâu hdrê báu ki iâ khế, kơvâ ngăn ‘na chiâk deăng xuân pói tơngah kế tơmeăm dêi báu rơnó Xeăng Tôu hơnăm kố xuân châ tơniăn.

Jâ Đặng Thị Thuỷ, Phŏ Kăn pơkuâ ngăn ‘na Chiâk deăng ƀă hyôh kong prâi kong pơlê Dak Lak tối ăm ngin ‘nâi, kơvâ kố hiăng vêh mơnhên ƀă séa ngăn khât tơdroăng ki pêi tơdrêng, pôu râng hnoăng cheăng dêi mâu khu mơdró kâ, khu ki kro mơdrŏng ƀă mâu khu ki hriăn cheăng ‘na khoa hok tung tơdroăng veăng gum ăm kuăn pơlê a kơpong ki tro têa kân lân lu. Kố cho tơdroăng cheăng ki kal gum kuăn pơlê teăm rĕng vâ mơnhông pêi chiâk pêi deăng, tơniăn tơdroăng rêh kâ ối. Jâ Đặng Thị Thuỷ tối ăm ngin ‘nâi: Dế nôkố,  Khu ngăn ‘na Chiâk deăng ƀă Hyôh kong prâi dêi kong pơlê Dak Lak hiăng hnê tối mâu khu râ, kơvâ cheăng thăm lăm troh a pơlê cheăm, hnê tối kuăn pơlê mơhriâm, xúa mâu túa ki mơdâ pêt kế tơmeăm, păn mơnăn mơnôa cho vâ thăm mơdêk ki tơƀrê tung pêi chiâk pêi deăng ƀă rak vế tơniăn vâ mơnhông tung la ngiâ ah.

“Kơvâ cheăng kố hiăng hnê tối ăm mâu kơ koan ki hriăn cheăng tí tăng séa mơnhên ngăn, hnê tối ăm kuăn pơlê mâu cheăm thâ rĕng teăm mơdâ pêt hdrê, vâ kơ kuăn pơlê tơniăn tung tơdroăng păn mơnăn mơnôa tung pơla kố ƀă a la ngiâ. Tơdrêng amê, hnê tối teăm tơdrêng tung hnoăng cheăng a tơrêm pơlê cheăm vâ kuăn pơlê hmiân tuăn ƀă tơkŭm pêi cheăng kâ tơ’lêi hlâu”.

Ing mâu ƀăng klâng chiâk ki nếo châ mơnhông kơ’nâi têa kân lân lu, i hiâm mơno loi tơngah dế châ vêh nếo ƀă kuăn pơlê a kơpong peăng Mâ hâi lo kong pơlê Dak Lak. Ƀă tơdroăng ki veăng gum ing hdrê, kih thuât troh a tơdroăng hnê tối ‘na kih thuât, mê vâi krâ-nhŏng o dế pói tơngah a rơnó Xeăng Tôu hơnăm 2026-2027 kô cho môi rơnó ki châ pêi báu hên, ing mê gum rak vế tơniăn tơdroăng rêh kâ ối ƀă mơnhông cheăng kâ krá tơniăn ton, klêi kơ’nâi khía mơhot, kong mêi kân, têa lân lu.