A mâu kơppong chiâk deăng ki kân dêi kong pơlê Dak Lak, tơdroăng ki tơ’noăng vâ koh hâk Hneăng hôp kân Đảng roh má XIV hiăng châ mơhno tối nhên ing tơrêm rơnó, ing túa pêi chiâk pêi deăng ki châ tơƀrê. Ngoh Lyby Niê Siêng, kuăn pơlê pêi chiâk deăng a cheăm Krông Ƀuk tối ăm ngin ‘nâi, vâi krâ-nhŏng o hơniâp ro drêng hlo mâu hnoăng cheăng ki hiăng châ chiâng pêi pro ki kân ƀă đi đo tơkôm tơngah troh a Hneăng hôp kân Đảng kô pôu râng hnoăng cheăng ki kân.

“Koh hâk mơnê, đi đo tơ’noăng ai mâu hnoăng cheăng ki xiâm pro ti lâi vâ vêh pơtroh ăm tơná kuăn pơlê tung khu kuăn pơlê pêi chiâk deăng Dak Lak đi đo châ mơnhông lĕm tro má môi vâ veăng gum mơjiâng tơnêi têa rế hía rế kro mơdrŏng, lĕm ro tâ”.

Tiô kơ i hiâm mơno ki tơ’noăng koh hâk Hneăng hôp kân XIV dêi Đảng xuân lân rơdâ ó rơdêi tung mâu khu mơdró kâ, ki rơhêng vâ tối mê cho kơvâ mơ’no tê kế tơmeăm pêi lo ing chiâk deăng - cho ki xiâm dêi tơdroăng pêi lo liăn ngân, kế tơmeăm dêi kong pơlê. A Kŏng ti pêi cheăng tiô rơnó - Môi tung khu Mơ’no tê kế tơmeăm lơ 2 khế 9, dó inâi Simexco Dak Lak), hnoăng pêi chiâk pêi deăng, tê mơdró kâ hiăng châ pêi adrêng ƀă tơdroăng ki xiâm tung tơ’noăng, ki nhên ga. Pôa Nguyễn Tiến Dũng-Phŏ Kăn pơkuâ ngăn Kŏng ti mê tối ăm ngin ‘nâi:

“Koh hâi Hneăng hôp kân Đảng, khế kố ngin hiăng pơkâ kô pêi pro kêi  tơdroăng hiăng pơcháu mê, rôe 25 rơpâu tâ̆n ƀă mơ’no tê lối 20 rơpâu tâ̆n, ƀă tâi tâng kô tơkŭm kuăn mơngế ing đảng viên troh a mâu kăn ƀô̆, mơngế pêi cheăng vâ ai troăng hơlâ ki nhên, ing mê, pêi lo liăn ngân xuân cho tơdroăng ki vêh mơnhông pêi cheăng, tê mơdró kâ lĕm tro tâ”.

Tơdrêng ƀă khu mơdró kâ dêi tơnêi têa, kơpong mơdró kâ dêi mơngế krê xuân mơhno tối hên tơdroăng ki veăng rơtế pêi pro ƀă pói rơhêng tơngah mâu troăng  pơkâ ki kân dêi Đảng. Jâ Dương Nữ Thiên An-Kăn pơkuâ ngăn Kŏng ti pêi cheăng tiô rơnó ngăn ‘na mơdró kâ-rôe ‘mot-tê mơ’no Si Cafe ai tối tiah kố:

“Tung hneăng Hôp kân roh má XIV, tơkŭm hên tơdroăng cheăng tung thăm mơdêk kơvâ ngăn ‘na chiâk deăng. Xua mê, ing tơná khu mơdró kâ ki pêi tung hnoăng cheăng chiâk deăng mê ngin vâ môi tuăn păng ‘nâng. Tung pêi chiâk pêi deăng, tung tê mơdró kâ, riân ta tơdroăng ki tê mơ’no kế tơmeăm troh a kong têa ê ngin xuân hiăng châ ai tơdroăng ki tŏng gum kân ing troăng hơlâ ki pơkâ kố. Tung la ngiâ kố ah, á pói rơhêng vâ kô châ tŏng gum hên tâ nếo ing mâu troăng hơlâ ki nếo dêi Tơnêi têa”.

Ing tơdroăng ki ai păng ‘nâng, mâu tơdroăng ki pơhlêh ai pơxúa kân khât tung mơnhông pêi cheăng kâ-rêh ối pơlê pơla a mâu pơlê cheăm cho vâ mơhno mơnhên ki tơtro ai pơxúa kân khât dêi troăng hơlâ, troăng tơdjâ dêi Đảng tung pơla hdrối mê hía nah. Ki rơhêng vâ tối, mê cho a cheăm Ea Knuêč, kong pơlê Dak Lak. Hơnăm 2025, cheăm hiăng pêi pro kêi ƀă châ tơkâ luâ mâu tơdroăng ki mơnhông pêi cheăng kâ-rêh ối pơlê pơla, kơlo ki pêi lo liăn ngân châ dâng 10%, tâng vâ riân pêi lo liăn ngân rêm ngế rế hía tâk rế hên. Cho kong pơlê ki châ ngăn cho “tíu ki pêt mơjiâng hên plâi sầu riêng” dêi kong pơlê Dak Lak, mê Ea Knuêč hiăng mơjiâng kơpong ki pêi chiâk pêi deăng kân rơdâ, tung mê, ai tá tơdroăng ki po ôm hyô ‘na chiâk deăng ƀă tê dêi kế tơmeăm pêi lo ing chiâk deăng ing tê mơdró điê̆n tưh, po rơdâ hngêi kơchơ ki mơ’no tê tơngi kong têa ê. Jâ Nguyễn Thị Cẩm Loan-Phŏ Kăn hnê ngăn má môi dêi Vi ƀan Măt trâ̆n Tơnêi têa Việt Nam cheăm Ea Knuêč ai pói rơhêng vâ tiah kố:

“Pin athế ‘nâi nhên păng ‘nâng, mơnê Đảng, Tơnêi têa hiăng ai mâu troăng hơlâ ki trâu hơngế ƀă ai troăng tŏng gum vâ kuăn pơlê ngin châ rêh ối chía tơniăn, kô châ mơnhông chiâng kro mơdrŏng kân. Malối cho thăm mơdêk ki tơ’lêi hlâu ‘na tuăn mơno, gum ăm kuăn pơlê châ mơnhông pêi lo kế tơmeăm, mơdêk tơdroăng rêh kâ ối, pêi pro mâu tơdroăng cheăng tŏng gum pơlê pơla, thăm mơdêk tơdroăng khăm pơlât, rak ngăn ivá châ chăn, hnê mơhriâm ƀă ai tơdroăng ki veăng vâ môi tuăn hên”.

Ƀă tơdroăng ki tơ’noăng ó rơdêi mê, ing i hiâm mơno dêi kuăn pơlê, khu mơdró kâ ƀă mâu khu ngăn ‘na cheăng kal kí, Dak Lak dế tơkŭm tí tăng ‘nâi plĕng Hneăng hop kân XIV dêi Đảng ƀă pêi pro mâu hnoăng cheăng ki ai pơxúa kân khât, loi tơngah mâu troăng hơlâ, troăng tơdjâ ki nếo, kô pơtối mơnhôk i hiâm mơno ăm tơdroăng pêi chiâk pêi deăng, kuăn pơlê pêi chiâk ƀă thôn pơlê châ mơnhông krá tơniăn ton.