Tối tơbleăng tơdroăng a rôh hôp, mâu túa pơkâ tôh têa lo i iâ, tôh têa ki môi tiah kong mê a Dak Lak dế pro kơdĭng 1/3 têa, kơdroh liăn ‘no hrê, mơdêk ki lĕm ƀă dâi dêi mâu tơmeăm pêi lo ing chiâk deăng. Laga, ƀăng tơnêi dế xúa nôkố tá hâi châ vâ chê 10% tung tâi tâng ƀăng tơnêi pêt, tá hâi châ po rơdâ. Kơxô̆ liăn hrê apoăng gá hên, yă tê tơmeăm pêi lo ing chiâk deăng ôh tá tơniăn, rơtế ƀă tơdroăng ki tá hâi hlê plĕng ‘na kih thuât rak ngăn xúa mê cho mâu tơdroăng pá ki kân.

Vâ tŏng gum xơpá kố, kơvâ ngăn rơchoâ long têa dế pơtối tơrŭm ƀă kong pơlê tơbleăng thế veăng tơlo gum mâu liăn ngân sap ing tơdroăng pơkâ tơnêi têa, kơxô̆ liăn ODA ƀă mung liăn kơjo vâ pro tíu ‘măn kơdĭng têa ƀă troăng ki tôh têa ăm mâu hdrê loăng pêt ki xiâm. Mâu rơkong tơpui tối a Rôh hôp hiăng môi tuăn tiah kố, drêng kuăn pơlê hiăng rơkê xúa kong ngê̆, tôh têa ƀă kơmăi ki rơkê chal nếo, kơdĭng kô chiâng tơdroăng ki kal ăm tơdroăng ‘mâi pêt tơmeăm tung chiâk deăng, tơmiât troh mơnhông krá tơniăn a mâu kơpong ki ôh tá ai têa, khăng khoăng.