Hơnăm 2025 hiăng vâ tâi, têt 2026 hiăng vâ troh, pôa Nguyễn Trí Kiên a bêng Sông Cầu, kong pơlê Dak Lak mơdoh chôu tâ prêi tung kơxâk vâ ‘măn tât a ‘noăng rơchoâ, choi puâ kơdê pơreăng, hbrâ vâ kơ’nêi ká. Pôa Kiên ăm ‘nâi, khía mơhot têa kân lân lu rôh má 13 ƀă rôh kong mê khía mơhot kơ’nâi mê hiăng loân lu tá 4 sào klôh păn ká, mơhiu 28 rơpâu to ká mú ki lĕm, lŭp dâng 2 rơtal liăn. Rơtế ƀă tơdroăng đâp dêi kĭng klôh, pôa lăm mung liăn dêi nhŏng o, pro mơéa mung tơ’nôm liăn vâ vêh păn ká.

“Nôkố á dế mung vâi lăm tâ prêi tung kơxâk, tơkŭm ‘măn a kĭng klôh têa, kui tah mâu trâp tơnêi ăm gá trâu ƀă ‘mêng mâu kĭng klôh ăm gá krá, mơgrúa lĕm, xôh kơdê pơreăng, pro tơdâng tơ’mô đô̆ PH klêi ah mê á nếo roê hdrê ká vâ kơ’nêi. Hngêi á dế tơchĕng vâ vêh păn 28 rơpâu to ká mú, rêm klôh ai 7 rơpâu to. Ki hdrối tâ, kơ’nêi klêi ah mê lăm pêi cheăng vâi xo liăn roê tâk chêm ká, xua păn ká troh 10 khế; ƀă liăn roê hdrê mê nôkố ôh tá ai, á mung to hrĭng rơtuh a hngêi rak liăn”.

Rơtế môi tiah ƀă mâu rơpŏng kuăn pơlê păn ká a kĭng ‘noăng, vâ chê 1.200 rơpŏng păn xi xŏng kân a Kung king Xuân Đài, xuân dế pơxiâm mơnhông dêi cheăng păn xua tro mâu kong mê khía mơhot mơhiu tâi. Ngoh Lê Văn Tú a bêng Sông Cầu ăm ‘nâi, khía mơhot kân rôh má 13 hiăng plong mot pro tơ’nhiê tơdrong păn xi xŏng, mơhiu tâi mâu xi xŏng kân ki hiăng hbrâ vâ tê apoăng khế 12 lo a têa kơxĭ, tung mê lối 70 to tơdrong ôh tá tăng hlo. Pơtối mê nếo, rôh kong mê khía mơhot ki sap nah hâi chói ai kố nah xuân pro 26 rơpâu to xi xŏng tro phât hiâm tung têa ƀă hlâ tâi, tâi tâng ki lŭp cho 4,5 rơtal liăn. Rơpŏng dế tăng mung liăn vâ ‘mâi mơnhông tơdroăng ki ki păn xi xŏng.

“Rơpŏng á xuân dế ối chê̆n hngêi rak liăn 1,2 rơtal la nếo achê kố vâi xuân ối ăm mung tơ’nôm 200 rơtuh vâ á ai liăn vêh pêi cheăng, ‘mêng pro mâu tơdrong păn. Rơpŏng á hiăng roê 4 rơpâu to xi xŏng kân ngiât vâ kơ’nêi tung 8 to tơdrong ƀă păn rơnó ki nếo. Hngêi á tơchĕng mung tơ’nôm liăn vâ pro tơ’nôm tơdrong păn vâ ai liăn mơdrếo chê̆n”.

Tiô riân ngăn dêi Khu ngăn chiâk deăng ƀă Hyôh kong prâi kong pơlê Dak Lak, khía mơhot rôh má 13 plong mot rơtế ƀă kong mê khía mơhot sap nap hâi chói ai a khế 11 kố nah hiăng tro lŭp ó ăm kơpong ki păn ká xi xŏng dêi kong pơlê. Krê kơpong pơlê kong krâm Sông Cầu (kong pơlê Phú Yên ton), dâng 100 rơpâu to tơdrong păn dêi lối 1.500 rơpŏng kuăn pơlê tro tơ’nhiê, tiô riân lŭp dâng 1.900 rơtal liăn. Pôa Nguyễn An Phú, Phŏ kăn pơkuâ Khu ngăn chiâk deăng ƀă Hyôh kong prâi kong pơlê Dak Lak ăm ‘nâi, kong pơlê dế chêh pro troăng hơlâ tŏng gum ăm tơtro, pro tơ’lêi hlâu vâ mâu ngế ki păn xi xŏng ‘mâi mơnhông dêi cheăng păn.

“Ngin hiăng tơkŭm tâi ki lŭp ƀă dế chêh pro tơdroăng pơkâ tơbleăng Pơkâ kơxô̆ 09 hơnăm 2025 vâ ‘no hrê tŏng gum ăm mâu rơpŏng ki păn ká xi xŏng tro tơdjâk xua kong mê khía mơhorôh má 13 plong mot ƀă kong mê têa lân lu. Kơlo gum 30 rơtuh liăn ăm rêm 100m3 tíu păn. Tơdrêng amê, Khu ngăn chiâk deăng ƀă Hyôh kong prâi xuân dế pro mâu mơéa tăng ‘nâi plĕng pơtroh ăm Vi ƀan hnê ngăn kong pơlê Dak Lak hnê mơhno mâu hngêi rak liăn pêi pro kơxô̆ liăn chê̆n, kơdroh xo liăn laih ƀă ăm mung tơ’nôm liăn, pro tơ’lêi hlâu vâ kuăn pơlê rĕng vêh păn ká xi xŏng”.

Pôa Nguyễn Kim Cương, Kăn pơkuâ Hngêi rak liăn Tơnêi têa kơpong 11 (pơkuâ kong pơlê Dak Lak ƀă Dak Lak nếo) ăm ‘nâi, khía mơhot rôh má 13 plong mot ƀă kong mê têa kân lân lu sap nah hâi chói ai pơla hdrối kố nahhiăng pro lối 27.700 ngế tơmối a kong pơlê Dak Lak tro lŭp dêi tơmeăm khoăng. Tung kơxô̆ ki kố ai lối rơpâu ngế tơmối pêi cheăng tung kơvâ păn ká xi xŏng, kơxô̆ liăn pro pơxúa ing păn gá hên. Pêi pro hnê mơhno dêi Vi ƀan hnê ngăn kong pơlê Dak Lak ƀă Hngêi rak liăn Tơnêi têa Việt Nam, Hngêi rak liăn Tơnêi têa kơpong 11 dế tơbleăng mâu troăng hơlâ tŏng gum, pro tơ’lêi hlâu vâ kuăn pơlê rĕng vêh păn, tê mơdró.

“Hngêi rak liăn Tơnêi têa kơpong 11 pơkâ thế mâu khu tơrŭm ăm mung liăn pêi pro tơdroăng pơkâ hâi khế mơdrếo chê̆n ăm kuăn pơlê mung ki tro lŭp xua khía mơhot pro. Pêi pro kơdroh xo liăn laih ăm kuăn pơlê dế mung tro lŭp xua kong mê têa lân lu tiô pơkâ thế dêi Hngêi rak liăn Tơnêi têa Việt Nam sap ing 0,5 – 2% tung môi hơnăm cho tung pơla khế kơdroh sap ing 3 troh 6 khế. Pơtối mê, mâu hngêi rak liăn séa ngăn pơtối ăm mung vâ kuăn pơlê vêh păn ká xi xŏng tê mơdró”.

Ƀă ivá mơeăm xêh dêi kuăn pơlê ki păn ká xi xŏng rơtế ƀă tơdroăng ki veăng gum teăm tơdrêng dêi kăn pơkuâ ƀă mâu khu tơrŭm ăm mung liăn, kơpong păn ká xi xŏng dêi kong pơlê Dak Lak dế rế hía rế vâ ‘mâi mơnhông klêi kơ’nâi kong mê têa lân lu. Mâu tơdrong păn ká xi xŏng châ ‘mâi pro, mâu klôh păn ká rế hía rế châ kơ’nêi hdrê xi xong, ká xuân cho rôh hiâm mơno vêh loi hlo a ngiâ kuăn pơlê ki rêh ối a kĭng têa kơxĭ, djâ vế tơdroăng tơngah ‘na ki tơniăn, phâi hơtôu ƀă môi rơnó ki châ xo hên tơmeăm păn tung la ngiâ.