Cho môi tung mâu kong pơlê ki tro tơ’nhiê hngêi trăng tơmeăm khoăng tung rôh kong mê khía mơhot pơla hdrối kố nah, cheăm Tuy An Nam, kong pơlê Dak Lak dế athế pêi pro péa tơdroăng cheăng ki kân: ‘mâi rơnêu mâu kế tơmeăm khoăng klêi kơ’nâi kong mê hía mơhot têa kân lân lu, tơniăn tơdroăng rêh ối kâ ối ăm kuăn pơlê ƀă hbrâ rơnáu ăm rôh tâ phĭu pôk kăn la ngiâ. Pôa Nguyễn Văn Hoàng, Kăn hnê ngăn Hô̆i đong cheăm ăm ‘nâi, maluâ ối ai hên xơpá, la pôk kăn cho hnoăng cheăng ki xiâm ki kal. Tung pơla kố, cheăm rế tơkŭm ‘mâi mơnhông mâu kế tơmeăm khoăng, tơniăn rêh kâ ối ăm kuăn pơlê, rế hbrâ rơnáu krâu mâu tơdroăng vâ kuăn pơlê lăm tâ phĭu pôk kăn tŭm, tơniăn, tro luât pơkâ.

“Ngin hiăng mơjiâng pro mâu khu, cheăng hnê mơhno, khu tâ phĭu pôk. Ngin hiăng pêi pro klêi. Mâu túa pơkâ xuân hiăng klêi, ƀă hnoăng cheăng ngin dế nôkố hnê tối. Mê ngin kô hnê tối ƀăng tơbleăng pano, áp phích xuân môi tiah hnê tối tung rơ’jiu dêi cheăm”.

Ôh ti xê to kăn pơkuâ rêm râ veăng pêi, kuăn pơlê Dak Lak xuân mơhno nhên hiâm mơno pôu râng hnoăng cheăng dêi kuăn pơlê ƀă tơdroăng kal kí ki kal kố dêi tơnêi têa. Pôa La Văn Thanh, ối a thôn Hiệp Đạt, cheăm Ea Mdroh tối: pôa đi đo tơmâng ngăn mâu tơdroăng tơbleăng ki kao, tăng ‘nâi nhên ‘na rôh tâ phĭu vâ troh hâi cho peie pro tŭm tro hnoăng cheăng dêi tơná, pôa Thanh tối tơdroăng ki tơngah:

“Cho môi ngế kuăn pơlê, á xuân kal vâ ‘nâi khât troh mâu tơdroăng ‘na tâ phĭu pôk kăn. Xuân mơdoh chôu vâ tăng ‘nâi tung mâu rơ’jiu um tơvi. Á rơhêng vâ rôh tâ phĭu rôh kố kô pôk mâu ngế kăn pơkuâ ki ai hiâm mơno hâk vâ kơ kuăn pơlê vâ pro tiah lâi vâi krâ nhŏng o kuăn pơlê rế hía rế mơnhông tâ”.

Tối rơdêi, rôh hôp pôk kăn Kuô̆k hô̆i hneăng XVI ƀă kăn Hô̆i đong hnê ngăn rêm râ cho tơdroăng kal kí ki kal khât, cho rôh vâ kuăn pơlê peie pro hnoăng pơkuâ dêi tơná ing kơtâ phĭu, rah xo mâu kăn ki kơhnâ rơkê, tơxâng vâ teăng mâ ăm mâu hiâm mơno, tơdroăng púi rơhêng vâ dêi kuăn pơlê, jâ Cao Thị Hòa An, Phŏ pơkuâ ngăn Đảng, Kăn hnê ngăn Hô̆i đong kong pơlê, Kăn hnê ngăn Vi ƀan tâ phĭu pôk kăn kong pơlê Dak Lak tối nhên:

“Hnoăng cheăng tâ phĭu pôk kăn cho tơdroăng cheăng ki kal dêi tơnêi têa ƀă dêi kong pơlê, athế tơniăn lĕm, tơdâng tơ’mô, tro luât pơkâ, tơniăn, kơdĭng ƀă athế cho hâi leh dêi tâi tâng kuăn pơlê. Pâ thế pin athế mơeăm ƀă mơeăm hên tâ nếo. Pin loi tiah kố kô pêi pro klêi mâu hnoăng cheăng pơkâ mơ’no”.

Tối nhên hnoăng pêi péa tơdroăng rế ‘mâi mơnhông mâu kế tơmeăm khoăng ki tơ’nhiê xua kong mê khía mơhot têa kân lân lu, rế tơbleăng hên tơdroăng cheăng kal kí, pôa Lương Nguyễn Minh Triết, Kăn pơkuâ ngăn Đảng Dak Lak pơkâ thế rêm râ, mâu kơvâ cheăng mơdêk hiâm mơno pôu râng dêi hnoăng, pêi cheăng rĕng, khoa hok, “pêi cheăng tâk péa xôh, tâk pái xôh”. Malối, tung pơla pêi pro túa pơkâ kăn pơkuâ péa râ, pôa Lương Nguyễn Minh Triết pơkâ thế kăn ƀô̆ hriăn ngăn nhên mâu mơéa, thăm mơnhông tơrŭm, rak vế tơniăn tro tơdroăng ki pêi ƀă ki rơkê rêm hvêa chêng prôk hbrâ rơnáu ăm rôh tâ phĭu pôk kăn:

“Mơdêk ki tơƀrê dêi hnoăng cheăng tơrŭm pơla rêm râ, mâu kơvâ cheăng, kong pơlê, tơdrêng amê hlối mơjiâng pro troăng hơlâ pơhlêh kơxô̆, ứng dụng kong ngê̆ thong tin vâ tơkŭm po ƀlêi chiâng rôh tâ phĭu. Mâu tơdroăng ki tơkŭm po kal ai tơdroăng tơrŭm krá tơniăn, tơƀrê pơla rêm râ, mâu kơvâ cheăng, mâu kong cheăm bêng tiô troăng séa ngăn nhên, ví ôh tá tơdrăng lơ ôh tá hlo mâu tơdroăng ki xôi tơdroăng cheăng. Tâi tâng xua pơkâ peie tơdjuôm cho tơkŭm po ƀlêi chiâng rôh tâ phĭu pôk kăn Kuô̆k hô̆i hneăng XVI ƀă kăn Hô̆i đong hnê ngăn kuăn pơlê rêm râ a kong pơlê”.

Sap ing kơphô̆ troh thôn pơlê, sap ing kơpong ki tơ’lêi hlâu troh mâu cheăm bêng ki ối ai hên xơpá klêi kơ’nâi kong mê khía mơhot têa kân lân lu, hnoăng cheăng hbrâ rơnáu tâ phĭu pôk kăn a Dak Lak dế châ tơbleăng ƀă hiâm mơno hbrâ rơnáu hdrối, pôu râng dêi hnoăng ƀă khŏm mơeăm khât. Ƀă tơdroăng veăng pêi dêi khu pơkuâ tơdroăng kal kí, tơdroăng ki môi tuăn, pêi pro kơhnâ dêi kuăn pơlê, kong pơlê Dak Lak dế tơmiât troh pơkâ pêi tơkŭm po ƀlêi chiâng rôh tâ phĭu pôk kăn Kuô̆k hô̆i hneăng XVI ƀă kăn Hô̆i đong hnê ngăn kuăn pơlê rêm râ hneăng hơnăm 2026 – 2031, chiâng hâi leh dêi tâi tâng kuăn pơlê, veăng gum mơjiâng Tơnêi têa luât pơkuâ xah hô̆i chuh nghiah dêi kuăn pơlê, xua kuăn pơlê, dêi kuăn pơlê.