Hngêi ối pro ing kơxô̆ liăn ‘măn kơdĭng tung hên hơnăm pêi cheăng dêi prếi on veăng jâ Lê Thị Minh Trang, thôn Vĩnh Xuân, cheăm Tuy An Tây, nôkố bú ối hlo to tơnêi  hiăng tơ’nhêi tơhnâp klêi ngo pá rŏng hngêi kơdrâ rơhê tơhnâp. Kơxê hâi lơ 19/11, hngêi hlo tíu rơheăng kân, mâu kăn  cheăm teăm  thế rĕng châ tíu ê. Laga klêi kơ’nâi môi măng kong mêi kân, hngêi  hiăng tơhnâp tâi tâng.

“Rơpŏng hngêi ƀă kuăn pơlê ối tung pơlê kố púi vâ tơnêi têa pro hngrêi ăm kuăn pơlê vâ ối, ối pơtân  tiah kô xuân pá ‘nâng”.

Tơdroăng rêh ối dêi rơpŏng hngêi jâ Trang xuân cho tơdroăng ki pá puât môi tiah 35 rơpŏng kuăn pơlê ki ê thế châ tíu ê a thôn Vĩnh Xuân. Tiô pôa Lê Minh Ý, Kăn hnê ngăn chi ƀô̆ hlối pro kăn thôn Vĩnh Xuân, hdrối  ai tơdroăng kong prâi oh tá tơniăn, kuăn pơlê ki hên rêh ối kơnôm pêi chiâk, pêt priêt, pêt kơtếo. Klêi khía mơhot kân kơxô̆ 13 plong mot, báu prá loăng plâi pêt mơjiâng hâi teăm xông mê hiăng tro tê lân lu, têa rơlêa kân pơtối mê nếo tơnêi tơhnâp ó, pro hên mâu rơpŏng kuăn pơlê  trâm pá ôh tá ai hngêi ối, tơnêi pêi chiâk hía. Nôkố, kuăn pơlê púi ngah rĕng ai tíu ối vâ rĕng pêi cheăng kâ.

“Pơla hdrối kố nah Vi ƀan xuân hiăng tơmâng xo tơdroăng veăng tối dêi kuăn pơlê, hên kuăn pơlê môi tuăn ‘na tơdroăng mê, kuăn pơlê xuân púi vâ troh ối a tíu tơniăn tâ. Púi vâ rĕng pro vâ kuăn pơlê ai tíu ối tơniăn, rĕng châ tơniăn pêi cheăng kâ’’.

Pôa Phan Quang Phi, Kăn hnê ngăn Vi ƀan kuăn pơlê cheăm Tuy An Tây, ăm ‘nâi, mâu kăn cheăm hiăng séa ngăn, tơkŭm tâi tâng 49 rơpŏng tung kơpong tơnêi tơhnâp, kơjo hdrối mơhno tíu pro pơlê nếo ăm 35 rơpŏng ki ôh tá tơniăn. Kơpong pro pơlê nếo châ rah xo dêi cheăm Tuy An Nam, kơtăn tíu ối ton nah ai 5 km:

“Pơlê cheăm thâ tơrŭm ƀă cheăm Tuy An Nam xuân môi tiah Khu rak ngăn la lâi hiăng klêi pro hlá mơ-éa ‘na kơpong pro pơlê nếo mê kô pro hngêi hlối. Vâ tơniăn tiô pơkâ hnê mơhno dêi Ngế pro xiâm hnê ngăn Chin phuh”.

Tíu ki vâ tối cho tung pơlê tơbleăng pro hngêi cho ki  môi tuăn hên dêi kuăn pơlê a kơpong vâ. A thôn Quảng Đức, cheăm Tuy An Nam- tíu châ rah xo mơjiâng pro pơlê nếo- hiăng ai 17 rơpŏng kuăn pơlê vâ pleăng dêi tơnêi, pro tơniăn ki krúa lĕm vâ ăm pro hngêi ối ăm mâu rơpŏng hngêi tro tơhnâp. Jâ Nguyễn Thị Chín, Kăn thôn Quảng Đức, cheăm Tuy An Nam tối:

“Thôn xuân mơhnhôk kuăn pơlê a kố môi tuăn pleăng tơnêi vâ pro hngêi ăm mâu rơpŏng ki hngêi tro tơhnâp lăm ối a kố vâ rơtế ƀă dêi rơpó rêh ối tơdjuôm ro, kuăn pơlê a kố vâ môi tuăn. Kuăn pơlê a kố xuân pro hlâu ăm mâu rơpŏng ki xơpá tâ, môi tiah hlá lĕm kum hlá tơchiê”.

Tơdroăng veăng kum dêi rơpó mê mơhno ăm hlo nhên ing pơkâ dêi jâ Trương Thị Nhung, thôn Quảng Đức, cheăm Tuy An Nam, drêng vâ chê 2 sào tơnêi rơpŏng hngêi tung inâi tơnêi tro xo tơvêh vâ mơjiâng pro kơpong pơlê nếo.

“A vâ môi tuăn, ngăn môi tiah a  veăng kum mâu nhŏng o ki tro hngêi tơhnâp, bú kal; chêl thiăn liăn tŭm ăm kuăn pơlê hiăng hôm”.

Vâ rĕng châ mơjiâng pro, kăn hnê ngăn kong pơlê Dak Lak tơdrêng ƀă mâu tíu pêi cheăng, kơvâ cheăng ki tơdjâk troh ƀă kăn hnê ngăn péa to cheăm Tuy An Tây ƀă Tuy An Nam hiăng troh lăm ngăn kơpong tơnêi châ rah xo  pro kơpong pơlê nếo ăm 35 rơpŏng kuăn pơlê. Kơpong kố ai tơnêi dâng 3 ha, mê ai 52 ƀăng tơnêi dêi dâng 20 rơpŏng kuăn pơlê.

A rôh pêi cheăng, pôa Nguyễn Thiên Văn, Phŏ kăn hnê ngăn Vi ƀan Kuăn pơlê kong pơlê Dak Lak pơkâ thế mâu tíu pêi cheăng, kơvâ cheăng tơrŭm krá ƀă dêi rơpó, mơjiâng tôh kơjo kum ki krê vâ ngăn tâi mâu hồ sơ, hlá mơ-éa pro tiô luât pơkâ thâ rĕng hâi  hbrâ ‘no liăn vâ  pro, tơniăn tŭm tơdroăng tro luât vâ rĕng châ tơbleăng pro hngêi ăm kuăn pơlê.

“Pin xúa luât pơkâ ki kal tung pro hlá mơ-éa vâ mơjiâng pro thế pêi pro tiô luât pơkâ rĕng pro. La thế kơdĭng liăn, thế tơmiêt troh ki pơxúa tơbrê má môi, ai pơxúa má môi, ví pôi tá mơ’nhêi, ví kâ kơhveăm”.

Tơdroăng pơtối pro pơlê nếo ăm 35 rơpŏng kuăn pơlê kơpong tơnêi tơhnâp a cheăm Tuy An Tây ôh ti xê to troăng hơlâ  pêi ahdrối vâ tơniăn ‘na châ chăn kuăn pơlê, mê ối mơhno nhên hnoăng cheăng dêi mâu kăn rêm râ, tơdrêng ƀă ki môi tuăn dêi rơpó, tối ăm dêi rơpó tung kuăn pơlê.