Hneăng hôp tơpui tối tơdroăng pêi pro ki kal, tơdroăng mơjiâng Đảng, pakĭng mê tối nhên ki pá, tơvâ tơvân, ki xiâm ƀă ƀai hriâm, rơtế ƀă troăng hơlâ, tơdroăng cheăng pêi hơnăm 2026 dêi khu pú hên Khu pơkuâ cheăng ƀă rơrêm ngế tung Khu pơkuâ cheăng Đảng ủy Kuô̆k hô̆i. Kăn xiâm hnê ngăn Kuô̆k hô̆i tối nhên ing tuăn vâ pêi cheăng ‘nâi hnoăng cheăng pêi tơná, tơdrăng, môi tuăn tung tơdroăng tơpui tơno, hên tơdroăng hnê tối vâ môi tuăn hiăng tối nhên pơkâ hiăng châ pêi tung mâu tơdroăng kal tơkâ luâ vâ mơdêk ki tơƀrê pơkuâ ngăn, hnê mơhno tung la ngiâ.

Kăn xiâm hnê ngăn Kuô̆k hô̆i ăm ‘nâi, hâi lơ 24/12, Vi ƀan pơkuâ cheăng Kuô̆k hô̆i kô hôp rôh má 2 Rôh hôp má 52, rôh hôp má mơ’nui dêi hơnăm 2025, tơkŭm tơpui séa ngăn, tơleăng mơnhên tơdroăng cheăng ki u ối, tơniăn tơdroăng pêi, pêi tơƀrê tiô tơdroăng kal vâ.