Hngêi jâ Đặng Thị Duy Hiền, thôn Thành Nam, cheăm Suối Dầu, kong pơlê Khánh Hòa tro tơhnâp tung rôh kong mêi têa lân lu kân hdrối kô nah.  Ƀă tơdroăng mơ-eăm kơjo kum dêi mâu kăn dêi cheăm ƀă mố đô̆i, jâ Đặng Thị Duy Hiền hiăng mơjiâng pro nếo hngêi ối nếo. Tơdroăng mơjiâng pro hngêi trâm hên xơpá xua ôh tá ai ngế pro, oh tá ai tŭm tơmeăm vâ pro ƀă hlong prâi hlối oh tá lĕm, pá vâ pro. Hlo ti mê, kăn ƀô̆, mâu lêng Đại đội Trinh sát Cơ giới 1, Khu xiâm pơkuâ ngăn Lêng kong pơlê Khánh Hòa  pêi pro  tơdroăng “lăm pơplâ Quang Trung’’ hiăng ai mâ teăm tơdrêng,  chơ tơmeăm, veăng ‘no hnoăng mơjiâng pro peăng meăn trêi hngêi hdrối. Kơ’nâi to lâi măng tĭng hiăng hlo hngêi, khế, pro hơniâp ro ƀă hmiên tuăn nếo ƀă jâ Đặng Thị Duy Hiền.

“Châ tơnêi têa ăm kơjo kum a mơjiâng pro hngêi ối a kố. A mơnê kơ mâu khu râ kơvâ cheăng khu grup hiăng kum ăm a pro ăm hngêi teăm klêi hdrối vâ troh hơnăm nếo. Hnoăng mố đô̆i pro kô châ 30% tâi tâng kơxô̆ liăn pro hngêi, mê a xúa kơxô̆ liăn ki mê vâ rôe tơ’nôm tơmeăm  pro vâ pê klêi”.

Mâu hâi hdrối kô hía nah, pôa Nguyễn Hoài Nam, pêi cheăng a Đại đội Trinh sát Cơ giới 1, Khu xiâm pơkuâ ngăn Lêng kong pơlê Khánh Hòa, rêm hâi tơvâ hên tơdroăng cheăng pêi. Hiăng tâi pơtroh hmốu, ngoh trut rơxế kôa chơ mâu tơmeăm ki vâ  pro ăm vâi pú veăng kum  pêi ƀă mâu ki hmâ pêi vâ rĕng klêi xiâm trăng hngêi. 

“Kong prâi to lâi hâi kô hmếo pơ mêi a peăng kơxêi la mâu kăn ƀô̆, mâu lêng ngin xuân mơ-eăm pêi vâ rĕng kêi hngêi hdrối hâi pơkâ. Mê cho hnoăng cheăng dêi ngin”.

Hngêi  dêi jâ Lê Thị Đã, ối a  Tôh dân phô̆ 1, bêng Đô Vinh, kong pơlê  Khánh Hòa, dế pro hiăng vâ  klêi. Tơdroăng xôk ro ăm hlo a ngiâ ngế kơdrâi hiăng tơkâ hên tơdroăng pá, hía tơmeăm tung rôh kong mêi têa lân lu kô nah. Ngoh Võ Văn Tâm, kuăn kơnốu dêi jâ Lê Thị Đã tối hlối rơrêk tung hiâm mơno drêng mố đô̆i troh veăng kum pro hngêi ăm rơpŏng hngêi:

“Kong mêi têa lu kô nah, hngêi a tro tơhnâp tâi tâng. Kơnôm mâu kăn cheăm ƀă Trung đoân 896 veăng kum ăm rơpŏng hngêi, pêi kơhnâ khât. Nôkố, hngêi xuân hiăng ai vâ ối”.

Pêi pro “Pơplâ Quang Trung” xua Ngế pro xiâm hnê ngăn Chin phuh, Khu xiâm pơkuâ ngăn  kong pơlê Khánh Hòa tơrŭm ƀă mâu tíu pêi cheăng Kơpong 4 dêi Lêng Tuk, Lữ đoàn Đặc công 5 hiăng mơhnhôk 70 tôh mơjiâng pro vâ chê 1.150 ngế kăn ƀô̆, mâu lêng rơtế ƀă hên rơxế, tơmeăm, thâ lăm troh a mâu tíu ki trâm pá ó vâ kum kuăn pơlê pro nếo hngêi xua hiăng tơ’nhiê klêi têa lu.

Ôh tá xê to pro nếo mâu hngê, mâu lêng mô đô̆i  ối pro thăm ai tuăn loi ăm kuăn pơlê kơpong têa lu. Sap mâu tơdroăng tơhnâp hngêi trăng, lup tơmeăm khoăng xua kong prâi pro ôh tá tơniăn, môi tơdroăng rêh ối nếo dế chôa vâ mơjiâng a pơlê dêi kong pơlê Khánh Hòa - khên mơnhông tâ nếo, tơtô tâ, tung tơdroăng ki tơrŭm pơla mâu lêng ƀă kuăn pơlê thăm krá kak./.