Tiô tối tơbleăng dêi Vi ƀan tâ phĭu kong pơlê Dak Lak, troh nôkố, hnoăng cheăng hbrâ ăm rôh tâ phĭu a kong pơlê hiăng châ pêi tơƀrê hên tơdroăng. Khu hnê mơhno tơdroăng tâ phĭu kong pơlê tơkŭm po hôp rôh hôp má pŭn, pơkâ mâu tơdroăng tối tơbleăng mơgêi vâ hnê mơhno đi đo. Hô̆i đong hnê ngăn kong pơlê mơjiâng 11 khu séa ngăn, tơkŭm lăm ngăn a 102 to cheăm, bêng vâ ‘nâi nhên tơdroăng ƀă tŏng gum xơpá a mâu pơlê cheăm.

Khu ngăn kong pơlê cheăm bêng ƀă hnoăng cheăng dêi mâu kăn ƀô̆ hnê hriâm tơdroăng cheăng ăm lối 15 rơpâu ngế kăn a 103 to tíu, tơkŭm tơdroăng hôp, chêh inâi kuăn pơlê, tơdroăng ki riân phĭu. Rôh hôp má péa râ kong pơlê môi tuăn ƀă inâi dêi 22 ngế châ pơtroh inâi vâ pro kăn Kuô̆k hô̆i ƀă 144 ngế vâ pro kăn Hô̆i đong hnê ngăn kong pơlê; râ cheăm tơdah xo lối 4.600 to hồ sơ, ai ngế ki chêh xêh inâi vâ to pro kăn. Sap ing hâi lơ 4 troh lơ 8/2 tơkŭm xo rơkong tơpui dêi kuăn pơlê a tíu kuăn pơlê ối; rôh hôp môi tuăn má pái kô klêi hdrối Têt.