Tiô pơchuât tơbleăng, khế 1/2026, tơdroăng cheăng kâ rêh ối pơlê pơla a kong pơlê hlo tơniăn, hên kơvâ cheăng xuân rak vế kơlo tâk mơnhông. Tung pêi chiâk, pêt tơmeăm rơnó Hngíu ƀă rơnó Hlá ruih châ tơbleăng pêi tro pơkâ. Tơdroăng ki mơjiâng pro tơmeăm kơmăi kơmok xuân ối rak ivá mơnhông ƀă chih kơxô̆ mơjiâng pro ƀă kơmăi kơmok tâk vâ chê 16% tâng vâ pơchông ƀă khế kố hơnăm nah. Tơdroăng cheăng ôm hyô pơxiâm hlo mơnhông tơƀrê sap ing apoăng hơnăm.

Pôa Tạ Anh Tuấn, Kăn hnê ngăn Vi ƀan kong pơlê Dak Lak tối nhên pơkâ thế mâu kơvâ cheăng, mâu cheăm bêng athế pêi pro kơtăng, nhên tơdroăng, nhên hnoăng pêi sap ing khế ki apoăng, hneăng ki apoăng dêi hơnăm 2026; ngăn tơdroăng ki ‘no liăn pêi cheăng tơdjuôm cho tơdroăng cheăng ki xiâm, tro ƀă hnoăng cheăng rêm ngế ki ối a ko ƀă klêi kơ’nâi pêi pro.

Ki hdrối tâ, kal tơkŭm ăm tơdroăng cheăng tŏng gum tơmeăm Têt Lo hơnăm nếo Bính Ngọ, rak tơniăn ăm rêm ngế kuăn pơlê pơrá châ tơdah Têt tơniăn, phâi hơtôu.