Kăn xiâm pơkuâ hnê ngăn Đảng pơtroh rơkong kơ-êng tuăn pâ troh mơngế Việt Nam ối a kong têa ê, mơnhên tơdroăng tuăn pâ ƀă Tơnêi têa, hiâm mơno pôu râng hnoăng cheăng ƀă pơlê xiâm, tơnêi têa. Kăn xiâm pơkuâ hnê ngăn Đảng tối nhên, Đảng ƀă Tơnêi têa pin đi đo hlê plĕng pêi pro troăng tơmiât đi đo kuăn pơlê cho xiâm kối, cho tíu xiâm, ngế ki xiâm, cho ki vâ pêi troh, cho ivá mơhnhôk ƀă cho mơngế pêi cheăng ăm tơdroăng mơnhông mơdêk; tung mê, pơlê pơla mơngế Việt Nam a kong têa ê cho mơngế ki ôh tá păng klâ dêi hdroâng mơngế Việt Nam, cho mơngế pêi cheăng ki kal dêi khu tơrŭm tâi tâng hdroâng mơngế tung chal mơnhông mơdêk.

Kăn xiâm pơkuâ hnê ngăn Đảng pói vâ, kuăn pơlê tơnêi têa pin pakĭng pêi lĕm tro luât a kong têa vâi, tơrŭm môi tuăn mơjiâng tơdroăng rêh ối pơlê pơla rế hía rế mơnhông mơdêk ó rơdêi, mơdêk tíu pêi cheăng ki loi tơngah dêi pơlê pơla; đi đo rak, tơbleăng khôi túa lĕm tro Việt Nam, mơjiâng um méa lĕm ‘na tơnêi têa, kuăn mơngế Việt Nam tung mâ pú hmâ lâp plâi tơnêi.