Khu kăn lăm pêi cheăng hiăng troh pôu, rơkâu Têt ăm mâu Đông Mô đô̆i gak tíu tơkăng kong Yok Đôn, Bo Heng ƀă Dak Ruê. Kăn hnê ngăn kong pơlê Dak Lak kơ-êng vâ ‘nâi tơdroăng rêh ối, tăng ‘nâi plĕng mâu tơdroăng cheăng, tơdroăng hbrâ vâ tơplâ, kring vế hnoăng pơkuâ, gak ngăn tơniăn tíu tơkăng kong tung rôh Têt tiô khôi hmâ dêi hdroâng mơngế.

Kăn hnê ngăn Vi ƀan kuăn pơlê kong pơlê Dak Lak tối, hơnăm  2025 kố nah ƀă hên tơdroăng xơpá, pơloăng mơnúa la kong pơlê xuân pêi châ hên ki tơƀrê tung mơnhông cheăng kâ rêh ối. Xo liăn ngân  châ 18.000 rơtal liăn, tâk lối 30% tâng vâ pơchông ƀă Tíu xiâm pơcháu, tê ăm kong têa ê châ lối 12,8 rơtal USD. Kong pơlê khĕn kơdeăn mâu hnoăng veăng ‘no ki kân dêi mâu lêng tơplâ, tung mê, ai Mô đô̆i gak tíu tơkăng kong, hiăng veăng rak tơkăng kong tơniăn, ai pơxúa khât ƀă ki tơniăn hlối mơnhông tơƀrê.

Kăn hnê ngăn mâu tíu pêi cheăng tơkăng kong tơbleăng, mâu lêng hiăng hbrâ pêi mâu pơkâ gak plâ hâi măng hbrâ vâ tơplâ, kring tơniăn tung rôh Têt hơnăm nếo Bính Ngọ 2026; pakĭng mê, mâu tíu pêi cheăng xuân dế mơ-eăm po mâu tơdroăng kring vế tơniăn pơlê pơla mê cho “Rơnó Hơngui tơkăng kong tơtô hiâm mơno kuăn pơlê”, tơdjuôm ivá tơmâng tŏng gum Têt ăm kuăn pơlê ki ối a tíu tơkăng kong.