Mâu tơdroăng tơkêa bro ai tâi tâng túa pơkâ pro vâ chê 790ha. Hdrối mê, Vi ƀan hnê ngăn kong pơlê Quảng Ngãi hiăng kĭ pơkâ klêi kơ’nâi rah xo khu ki ‘no liăn pêi cheăng ing túa ki tơkŭm tơbriât ƀă mâu tơdroăng tơkêa bro. Ki nhên, Kŏng ti Pêi cheăng tiô rơnó Grup Sun Word rơtế ƀă Khu tơrŭm Kŏng ti pêi cheăng tiô rơnó Pơkuâ ngăn Troăng prôk Việt Nam ƀă Kŏng ti pêi cheăng tiô rơnó Pơkuâ ngăn mâu hngêi trăng, troăng prôk tơmeăm khoăng Ngôi sao Phú Quốc cho mâu khu mơdró kâ ‘no liăn pêi cheăng pêi pro mâu tơdroăng tơkêa kố.

Klêi kơ’nâi hiăng pro klêi, 3 tơdroăng tơkêa pro kơphô̆ kố kô châ mơ’no ăm kơchơ mơdró lối 14 rơpâu tơmeăm hngêi trăng troăng prôk tŭm túa. Mâu tơdroăng tơkêa ‘no liăn pêi cheăng cho vâ pêi pro pơhlêh tơdroăng ôm hyô kơpong Tây Nguyên ƀă túa pơkâ tơdjuôm mơjiâng pro Kơpong ôm hyô Măng Deang, rế hía rế mơjiâng môi kơpong cheăng kâ ki xiâm nếo dêi kong pơlê Quảng Ngãi.