Tơdrêng ƀă pôa Tô Lâm, Kăn xiâm pơkuâ hnê ngăn Đảng ai pôa Phạm Minh Chính, Ngế pro xiâm hnê ngăn Chin phuh, pôa Trần Thanh Mẫn, Kăn xiâm hnê ngăn Kuô̆k hô̆i rơtế ƀă hên kăn xiâm dêi Đảng, Tơnêi têa pin. Việt Nam ƀă Kul mơjiâng tơrŭm pêi cheăng tơpui kâ hâi lơ 24/6/1967, nôkố Việt Nam cho tơnêi têa tơrŭm cheăng ki kân má 3 dêi Kul, kơ’nâi Sinuâ ƀă Mih.

Tơdroăng lăm pêi cheăng rôh kố dêi pôa Tô Lâm cho rôh vâ péa tơnêi têa mơdêk tơrŭm tơpui tơno, ‘mâi mơnhông tuăn loi nhoăm dêi rơpó ’na kal kí, mơdêk tơbleăng pêi tơƀrê mâu tơdroăng tơhrâ ki hiăng châ pêi pro, ing mê pro trâu rơdâ tâ nếo tơrŭm cheăng tiô hmâ ing nah pơla péa Đảng, péa tơnêi têa, pro xiâm vâ djâ  tơrŭm cheăng pơla  Việt Nam - Kul mơnhông rơdêi tâ nếo.

Hdrối mê, tung rôh lăm pôu a kong têa Lếo, pôa Tô Lâm, kăn xiâm pơkuâ hnê ngăn cheăng Đảng hiăng ai rôh tơpui ƀă poâ Thongloun Sisoulith, Kăn xiâm pơkuâ hnê ngăn cheăng Đảng, Kăn xiâm hnê ngăn kong têa Lếo; tơpui ƀă pôa  Sonexay Siphandone, Ngế pro xiâm hnê ngăn kong têa Lếo, pôa Saysomphone Phomvihane, Kăn xiâm hnê ngăn Kuô̆k hô̆i; tơdah Kăn xiâm hnê ngăn Măt trâ̆n Lếo mơjiâng tơnêi têa Kikeo Khaykhamphithoune; pôu tíu pêi cheăng kăn teăng mâ Việt Nam a Lếo ƀă trâm kuăn pơlê Việt Nam a Lếo.

Rôh kố, Pôa Phạm Minh Chính, Ngế pro xiâm hnê ngăn Chin phuh trâm pôa Sonexay Siphandone, Ngế pro xiâm hnê ngăn kong têa Lếo; Pôa Trần Thanh Mẫn, Kăn xiâm hnê ngăn Kuô̆k hô̆i trâm Kăn xiâm hnê ngăn Kuô̆k hô̆i Lếo Saysomphone Phomvihane; kăn pơkuâ dêi mâu khu xiâm, kơvâ cheăng péa tơnêi têa xuân trâm tơpui tơno mâu tơdroăng, thăm mơnhông tơrŭm cheăng pơla péa pâ.

Tung rôh lăm pôu, hiăng po leh diâp mâu hlá mơ-éa tơrŭm cheăng ki kal pơla mâu khu xiâm, kơvâ cheăng, kong pơlê dêi Lếo ƀă Việt Nam tung mâu kơvâ cheăng hnê hriâm, hlá mơ-éa luât ƀă tơrŭm pơla mâu kong pơlê; pơtối pro chiâng ivá pơkuâ tơƀrê, pơhlêh tơdroăng cheăng tơrŭm tung la ngiâ tơrŭm pơla péa tơnêi têa.