Pôa Điểu Ngăm, 66 hơnăm, mơngế M’Nông, ối a bon Bu Gia, cheăm Quảng Trực ai tối tiah kố, mâu hâi hdrối mê hía nah, pôa hmâ lăm troh a Hngêi tơkŭm hôp dêi pơlê vâ tí tăng ‘nâi plĕng ‘na hlá mơ-éa ki chêh inâi mâu kăn teăng mâ Hô̆i đong hnê ngăn cheăm, a hneăng la ngiâ. Tiô pôa Điểu Ngăm tối ăm pin ‘nâi, mâu ngế ki hiăng châ rah xo inâi mê pơrá mơhriâm lâm kân, hiăng tơkâ luâ hên hơnăm pêi cheăng ton xŏn hdrối mê hía nah, xua ti mê, pôa pói tơngah kô châ rah xo mâu ngế ai hiâm mơno lĕm tơdrăng, rơkê plĕng khât, păng ‘nâng cho mâu ngế ki teăng rơkong tơpui dêi kuăn pơlê, cho tíu ki tơdjêp pơla Đảng Tơnêi têa ƀă Kuăn pơlê, veăng gum mơ’no mâu troăng hơlâ ‘na mơjiâng kơpong tíu tơkăng kong rế hía rế kro mơdrŏng kân, hloh hlê rơkê plĕng.

“Á kot mâ ƀă xông kân a pơlê ki kố. To lâi hâi ki kố, hâi ki lâi á xuân lăm troh a Hngêi túa lĕm tro dêi pơlê vâ ngăn inâi mâu ngế ki châ rah xo vâ pro kăn tung Hô̆i đong hnê ngăn cheăm. Á hâk mơnâ ƀă tơngăm ‘nâng drêng châ lăm tâ phĭu, pói rơhêng châ pôk mơngế ki chiâng rơkê tơpui kâ, tuăn ngôa hlê plĕng, cho ngế ki tơxâng teăng mâ ăm pơlê, veăng gum mơnhông ăm Quảng Trực kố rế hía rế xông tơtêk hên tâ”.

Jâ Thị Huynh hdrông kuăn ngo M’Nông, Kăn pơkuâ ngăn Tôh tâ phĭu kơxô̆ 2, bon Bu Prâng 2, cheăm Quảng Trực tối ăm ngin ‘nâi, tôh tâ phĭu ai dâng 300 ngế kuăn pơlê, 98% cho mơngế M’Nông. Klêi kơ’nâi Roh hôp tăng rah mơngế má 2 a hâi lơ 3/2, jâ rơtế ƀă 8 ngế đảng viên tung pơlê kơhnâ khât tung tơdroăng hnê tối, tơbleăng khĕn ‘na Luât tâ phĭu, hnê tối ăm kuăn pơlê tí tăng hlê plĕng tŭm têk inâi hâi khế kot mâ, tơdroăng rêh ối, pêi cheăng dêi rêm ngé ki châ rah xo mê, mâu hnoăng cheăng ki vâ pêi pro dêi mâu ngế ki mê, ing mê, cho vâ rak tơniăn ăm tơdroăng ki lăm tâ phĭu tro tiô luât, pêi pro tiô hiâm mơno kuăn pơlê pói rơhêng vâ, tăng rah mâu ngế ki rơkê khât, tơxâng cho kăn teăng mâ ăm tuăn mơno, tơdroăng pói vâ dêi kuăn pơlê.

“Dế nôkố, Hngêi tơkŭm hôp pơlê pơla hiăng tâ hlá mơ-éa chêh tối inâi mâu ngế ki vâ pro kăn teăng mâ Hô̆i đong hnê găn cheăm vâ vâi krâ kuăn pơlê châ ‘nâi, vâ tăng rah mâu ngế ki ai hiâm mơno lĕm tơdrăng, rơkê plĕng, mâu ngế ki ối dế rá pơla Kuăn pơlê ƀă Đảng, Tơnêi têa. Ing mê, veăng gum tơdjâ mâu troăng hơâ veăng gum dêi khu râ pá pêng ‘na tơdroăng mơ’no liăn ngân, mơjiâng gum ăm pơlê rơtế ƀă vâi krâ-nhŏng o kuăn pơlê thăm rế mơnhông mơdêk”.

Hneăng pôk kăn teăng mâ Kuô̆k hô̆i hneăng 16 ƀă kăn teăng mâ Hô̆i đong hnê ngăn kuăn pơlê rêm râ, hneăng hơnăm 2026-2031, cheăm tíu tơkăng kong Quảng Trực ai lối 7.200 ngế kuăn pơlê, tâ phĭu a 12 kơpong ki pôk kăn xiâm ối tung 11 to pơlê ƀă Trung đoân 726.

Pôa Đoàn Lê Anh, Kăn hnê ngăn Vi ƀan Măt trâ̆n Tơnêi têa Việt Nam cheăm Quảng Trực tối ăm ngin ‘nâi, hnoăng cheăng kring vế, gak ngăn, xing xoăng mâu tíu tâ phĭu, hbrâ rơnuâ mâu kế tơmeăm krâu khât, lĕm mơnâ, hbrâ ăm hâi tâ phĭu. Dế nôkố, kong pơlê dế pêi pro mâu hvêa chêng ki má mơ’nui, hbrâ ăm roh hôp má mơ’nui, klêi mê, chêh xo inâi ki păng ‘nâng mâu kăn Hô̆i đong hnê ngăn cheăm tung hneăng la ngiâ. Pôa Đoàn Lê Anh, tối ăm pin ‘nâi:

“Roh tâ phĭu hneăng hơnăm 2026-2031, ngin dế tơrŭm cheăng ƀă mâu khu râ, kơvâ cheăng vâ tơkôm klêi kơ’nâi Roh hôp tăng rah roh má 3 pơtối tăng rah xo inâi mâu kăn Kuô̆k hô̆i, mâu ngế kăn teăng mâ Hô̆i đong hnê ngăn kong pơlê pơtroh ăm cheăm, ing mê, vâ pơkâ pêi pro tŭm têk mâu túa chêh bro hlá mơ-éa ki pơtối, rak vế tơniăn hnoăng cheăng tâ phĭu rah xo kăn châ pơkâ pêi pro tro tiô tơdroăng pơkâ. Krê ƀă Hô̆i đong hnê ngăn cheăm, dế nôkố, ngin dế séa mơnhên ngăn, hbrâ ăm roh hôp tăng rah mơngế roh má mơ’nui vâ chêh xo inâi ing 40 ngế kăn, chu ối pá 33 ngế, klêi mê, pôk xo 20 ngế kăn teăng mâ Hô̆i đong hnê ngăn cheăm ăm hneăng la ngiâ”.

Ƀă tơdroăng ki hbrâ hnoăng cheăng ki nhên, hneăng tâ phĭu rah xo kăn a cheăm tíu tơkăng kong Quảng Trực loi tơngah kô po tiô tuăn mơno kuăn pơlê pói rơhêng vâ, tro tiô pơkâ, ing mê, mơjiâng chiâng tơdrơoăng ki hơniâp ro tung Kuăn pơlê. Vâi krâ-nhŏng o hdrông M’Nông pơtroh tuăn mơno tung hlá phĭu, pói tơngah vâ châ rah xo mâu kăn teăng mâ cho mâu ngế ki ai tuăn mơno lĕm tơdrăng, rơkê plĕng, achê kuăn pơlê, hlê plĕng kuăn pơlê. Ing mê, veăng gum mơjiâng pơlê Quảng Trực rế hía rế kro mơdrŏng, hloh hlê rơkê plĕng.