Tơbleăng a hâi pơxiâm hôp, Yăo sư - Tiê̆n sih Nguyễn Xuân Thắng, Kăn xiâm hnê ngăn Hô̆i đong tơpui leăng tơnêi têa ăm ‘nâi: Hôp tơpui tơno cho tơdroăng cheăng pêi ki kân má môi apoăng vâ djâ tơdroăng pơkâ hneăng hôp Đảng rôh má 14 châ pêi pro tung rêh ối. Ing mê, vâ hnê pêi pro nhên khât tiô tơdroăng hnê mơhno dêi pôa Tô Lâm, Kăn xiâm pơkuâ hnê ngăn Đảng thế rĕng pêi hlối klêi Hôp, ƀă pêi kơtăng khât, pêi rĕng ƀă pêi tro, veăng ‘no hnoăng a tơdroăng pêi pro klêi mâu pơkâ, tơdroăng cheăng dêi Hneăng hôp Đảng rôh má 14.

“Kố cho hneăng hôp apoăng ƀă pin thế tơkŭm po hên rôh hôp, hôp mê tối chuyên đề tơdroăng kal, tối trâu ‘na tơrêm tơdroăng. Tung mê, tá tơdroăng vâ mơnhông rĕng, krá tung tơdroăng rêh ối nếo; tơdroăng ‘na ki tâk pế kơxô̆ rơtế ƀă mơjiâng tơdroăng cheăng ki vâ pêi tâk nếo, thế ai po hôp tơpui trâu tiah mê. Pin xuân kal ai mâu rôh hôp tơpui ‘na tơdroăng mơnhông khoa hok kŏng ngê̆, hơ’lêh nếo hriăn plĕng ki nếo lăm ngăn cho tơkŭm po hneăng Hôp mê, malối  cho NQ57, NQ59, NQ66, NQ68...  Vâ tối cho 9 tơdroăng pơkâ pêi, nhên ing tơdroăng hlá mơ-éa chêh má 14. Ing tơdroăng chêh tơbleăng a rôh Hôp ki pin xuân hvêa prôk tiô hlá cờ Đảng, tơdjuôm ivá, môi tuăn vâ pêi pro péa tơdroăng pơkâ 100 hơnăm, ƀă tơdroăng pơkuâ tơdroăng cheăng, mơ-eăm ing ivá tơná, khên tơnôu hvêa prôk mot tung rơxông nếo. Pơkâ má mơ’nui mơnhông tơdroăng rêh ối hơniâp dêi kuăn pơlê”.

A rôh hôp po 2 rôh tơpui tơno mê cho “Djâ tơdroăng tuăn vâ ki nếo dêi tơdroăng chêh pơtroh ăm hneăng hôp 14 xúa tung rêh ối” ƀă “djâ tơdroăng pêi pro dêi hneăng hôp 14 dêi Đảng xua tung rêh ối”.

Phŏ yăo sư  - Tiê̆n sih Dương Trung Ý, Ngế xiâm rah chêh hlá tơbeăng Kŏng san tối: Hneăng hôp 14 cho hneăng hôp hơ’lêh nếo rơdêi, tơƀrê ‘na tuăn tơmiât, mâ ngăn ƀă púi vâ mơnhông, cho hneăng hôp dêi tuăn ngôâ rơkê, tuăn tơmiêt vâ ƀă mơ-eăm kân ƀă mâu tơdrăng pơkâ troăng hơlâ vâ djâ tơnêi têa khên tơnôu hvêa prôk rơdêi tung rơxông nếo dêi hdroâng mơngế. Tơdroăng chêh  rôh kố pơkâ hên tơdroăng kal vâ ki nếo thế pêi pro, rơkong tơpui kŏng pêi, ‘nâi nhên pơkâ, tơdroăng cheăng, tơdroăng vâ pêi pro rơtế ƀă pôu râng hnoăng cheăng drêng hiăng klêi pêi, tơƀrê krá kak krá ton, rơtế pêi kơtăng ƀă tơdroăng ki vâ môi tuăn dêi kuăn pơlê. Phŏ yăo sư - Tiê̆n sih Dương Trung Ý , tối nhên:

“Tơdroăng mê hiăng mơhno, ki pơxúa dêi Tơdroăng chêh pơtroh ăm hneăng hôp ôh ti xê to a tơdroăng ki ai chêh ƀă tối tung hlá mơ-éa, ki khât châ mơnhên tung tơdroăng tơkŭm pêi pro. Tơdroăng chêh dêi hneăng hôp bú ai pơxúa ƀă xêt khât drêng châ pêi pro, hơ’lêh chiâng luât pơkâ ki tro, tơkŭm pêi ai pơxúa, pro chiâng xúa khât tung rêh ối kal kí, cheăng kâ túa lĕm tro pơlê pơla, mâu tơdroăng ‘na kring gak tơkăng kong, kring vế tơniăn pơlê pơla cheăm bêng, tơpui kâ ‘na tơdroăng tơnêi têa hlối mơhno ki pêi rơdêi, ki mơnhông ‘na rêh ối tơmeăm khoăng, ing tuăn vâ ƀă mơdêk tuăn loi dêi kuăn pơlê ƀă Đảng, Tơnêi têa. Vâ veăng tơkŭm pêi tro mâu troăng hơlâ, tơdroăng pơkâ, tơdrăng cheăng tung mâu Hlá mơ-éa chêh pơtroh ăm hneăng hôp kân 14 dêi Đảng, tơdroăng hlê, tơmâng pêi mâu tơdroăng ki kal tung hlá mơ-éa chêh hneăng hôp má 14 cho kal păng ‘nâng”.

Tối mơgêi rôh hôp, Phŏ yăo sư -  Tiê̆n sih Đoàn Minh Huấn, Ngế pơkuâ Hŏk viê̆n Chĭn trĭ Kuô̆k ya Hồ Chí Minh tối: Hôp tơpui tơno mơhno ki teăm tơdrêng, thâ rĕng, tối rĕng tro ƀă tơdroăng xiâm ki vâ rak vế dêi Tíu xiâm roh kố cho pêi pro, ôh ti xê ing hên tơdroăng pêi pro tơdế ƀă a mâu tơdroăng vâ tơkŭm pêi tơdroăng Pơkâ hneăng hôp 14. Tơdroăng pêi pro dêi rôh hôp mơhno nhên ki pơ’lêh ƀă tơdroăng tơpui tơno ƀă ki tơƀrê dêi tơrêm tơdroăng veăng hên tối.

Mâu kăn hiăng tơkŭm tơpui ‘na mâu tơdroăng tơƀrê, ing pơ’lêh tuá cheăng tâk, mơnhông cheăng kâ krê troh mâu tơdroăng kring vế tơkăng kong ƀă tơpui kâ. Tối nhên mâu tơdroăng cheăng ki kal tơbleăng pêi, pôa Đoàn Minh Huấn pơkâ thế mâu tíu pêi cheăng ki pơkuâ kal tơrŭm ƀă khu chêh hlá tơbeăng tối tơdroăng ki hiăng klêi hôp, tiô kơ tơdroăng cheăng pêi. Ing mê, pêi vâ châ tơƀrê tơdroăng tăng ngăn Pơkâ hneăng hôp 14 dêi Đảng xúa tung pơkâ, tơdroăng pêi pro dêi tơrêm kơ koan, tíu pêi cheăng.

“Hdrối hneăng hôp veăng djâ xúa a Pơkâ. Klêi mê, hiăng ai Pơkâ  xúa tung rêh ối. Kố cho pơla tơdroăng ‘na tơpui leăng ƀă pêi pro, mê pin ngăn amê: Mâu tơdroăng kal pêi tung mê ai mâu tơdroăng thâ rĕng pêi hdrối, pêi tung pơla iâ hâi khế dêi hơnăm 2026, ai mâu tơdroăng ki ‘nâ  thế pêi ton hơnăm, pêi tâi hneăng, ai mâu tơdroăng ki ‘nâ mâ ngăn vâ pêi cheăng ton hơnăm xuân châ tơpui tơno nhên hdrối. Mâu tơdroăng pêi tơƀrê mê ai mâu tơdroăng ’na ki xiâm ăm mơnhông tơƀrê, ai mâu tơdroăng ki ‘nâ pêi mơhno túa hdrối, ai mâu tơdroăng ki ‘nâ cho pêi pro hlối, ing tơdroăng pêi pro tơdjuôm troh pêi pro a mâu mâu kong pơlê, cheăm bêng.