Mâu rơpŏng a tíu ki tro têa lân lu ó Hòa Thịnh, kong pơlê Dak Lak chiân Xeăng Mơhâu vêh ngi plêng, mơgêi hơnăm Ất Tỵ, xuân cho hâi kơdrâm phiu ro mâu tơdroăng a “Rơnó Hơngui kơpong 5 tơrŭm môi tuăn pêng păm tuăn pâ ƀă khu mô đô̆i kuăn pơlê’’. Tung kơdrum kơpong tơbâ tơmeăm ron nah tơnêi têa Hoà Thịnh, kuăn pơlê, kăn ƀô̆, mô đô̆i rơtế dêi pó kơxuô kơƀăn tơxông; tơ’noăng ivá, trâm mâ mơhno rơhdruê xuăng. O ối kŭn, vâi hdrêng phô̆m xông kân, mơngế kân châ mô đô̆i pôe xâk tê kơtê. Mâu nôu, mâu nâ hâk ro lăm rôe tơmeăm têt a mâu tíu tê mơdró 0 liăn. Pôa Phạm Văn Mạnh, ngế kuăn pơlê cheăm Hòa Thịnh, hâk ro tối:

“Ahdrối á mơnê tơdroăng pơkuâ dêi Đảng, tơdroăng tŏng gum dêi Khu mô đô̆i. Roh têa kân lân lu pơla kố nah thế tối cho rak ngăn tơmeăm khoăng, phái têa. Mâu tíu cheăng, mâu kơvâ cheăng xuân rak ngăn, xuân ai hmê, ai phái kâ, vêh hơtô, hngêi trăng xuân châ mơjiâng krá kâk’’.

Hòa Thịnh cho tíu ki tro têa kân lân lu hnŏng má môi tung roh lân lu sap nah tá hâi chói ai, lân a khế 11/2025. Drêng ki râ ó má môi, têa lân lu hngêi trăng, 4 pâ têa pơlok, hdrok hiu têi, mâu khu mô đô̆i hiăng teăm ai mâ tơdrêng rơtế ƀă khu râ kăn pơkuâ hnê ngăn Đảng, khu râ kăn pơkuâ rơtế ƀă kuăn pơlê ing tŏng xo mơngế hliăng tiâ, rơnêu kế tơmeăm khoăng xua kong prâi pro ôh tá tơniăn troh vêh mơjiâng hngêi trăng, vêh mơjiâng tơdroăng rêh ối, djâ rơkong tó ăm kuăn pơlê klêi kơ’nâi khía mơhot kân, têa lân lu.

Klêi pro “Cheăng pêi thâ Quang Trung’’ ƀlêi trâng tâi tâng a cheăm Hòa Thịnh, um méa Mô đô̆i Pôa Hồ trâu tung hiâm mơno kuăn pơlê ƀă tơdroăng loi tơngah. Đăi tă Đinh Văn Hưng, Chính ủi Khu xiâm pơkuâ Mô đô̆i kong pơlê Dak Lak tối rơdêi, Tơdroăng ‘’Rơnó Hơngui khu 5 tơrŭm môi tuăn – Têt pêng păm tơdroăng tuăn pâ khu mô đô̆i kuăn pơlê” roh kố môi xôh nếo mơnhên tuăn pâ khu mô đô̆i kuăn pơlê thăm rế krá:

“Ing tơdroăng hâi kố pin pơtối mơnhên môi tơdroăng ki xiâm mơjiâng tơdroăng gâk kring tơnêi têa tung tâi tâng kuăn pơlê, gâk kring kuăn pơlê ôh tá xê to ƀă tơdroăng ki tơplâ, khu mê ahdrối cho ƀă tơdroăng tơrŭm môi tuăn môi hiâm mơno pơla khu mô đô̆i ƀă kuăn pơlê. Drêng hiâm mơno tơniăn, drêng kuăn pơlê loi tơngah, drêng mê cho xiâm kối krá tơniăn má môi ăm tơdroăng tơniăn mơnhông mơdêk krá tơniăn dêi hdroâng mơngế’’.

Tiô pôa Phương Văn Lành, Kăn pơkuâ hnê ngăn Đảng ủi  cheăm Hòa Thịnh, ing tung mơhot têa kân lân lu troh mâu hâi vêh mơjiâng dêi tơdroăng ‘’Pro hngêi thâ Quang Trung’’, troh nôkố, Hòa Thịnh xuân tơdah châ hên kế tơmeăm tŏng gum kế tơmeăm khoăng ƀă hiâm mơno dêi Đảng  ƀă Tơnêi têa, mâu khu cheăng kal kí, rêh ối pơlê pơla, mâu khu mô đô̆i, mâu khu tơrŭm ki tŏng gum mơngế pá puât ƀă dế rĕng lĕm tíu ki châi xua kong prâi pro.

Rơnó Hơngui kơpong 5 tơrŭm môi tuăn roh kố, môi xôh nếo tơ’nôm ivá ăm khu râ kăn pơkuâ tung tơdroăng pêi pro ƀlêi trâng kân mâu hnoăng cheăng hơnăm 2026.

“Rơtế khu râ kăn pơkuâ hnê ngăn Đảng, khu râ pơkuâ, mâu khu mô đô̆i hiăng tơkŭm rak ngăn tŏng gum ăm kuăn pơlê. Ki rơhêng vâ tối hâi kố Kuân khu 5 djâ rơnó Hơngui kơpong 5 tơrŭm môi tuăn – Têt pêng păm tơdroăng tuăn pâ khu mô đô̆i kuăn pơlê troh kuăn pơlê cheăm Hòa Thịnh, kố cho môi roh ki kơnâ gum kuăn pơlê, tơdjuôm ivá ƀă kuăn pơlê tah lôi mâu tơdroăng pá puât, ăm kuăn pơlê hâk ro ƀă gum kuăn pơlê ai Têt hơtô, sôk ro, hơniâp lĕm’’.

Rêm ngế kuăn pơlê Hòa Thịnh hâk tơngăm ƀă khôi túa vâi krâ nah tơplâ kăch măng, pro chiâng roh rơtế xông tơplâ Hòa Thịnh mâu hơnăm 60, nôkố khŏm mơ-eăm tơkâ hluâ pá puât xua kong prâi pro ôh tá tơniăn. Têt kố kuăn pơlê kơpong têa kân lân lu ai têt hơtô tuăn pâ ing tơdroăng tơdjuôm ivá dêi tâi tâng pơlê pơla. Tơdroăng rêh ối nếo dế ai tung rêm toăng hngêi. Môi rơnó hơngui nếo dế vêh a pơlê xiâm rơtế pêi Hòa Thịnh.