Kơxê lơ 11/2, a Hà Nội, Khu Kăn hnê ngăn Vi ƀan xiâm Măt trâ̆n tơnêi têa Việt Nam tơkŭm po Hneăng hôp tơpui tơno roh má pái vâ môi tuăn, chêh inâi mâu ngế ối tung mâu kơ koan, khu tơrŭm cheăng, tíu cheăng a Tơnêi têa châ tơbleăng to pro kăn teăng mâ Kuô̆k hô̆i hneăng má XVI tiô pơkâ dêi Luât tâ phĭu rah xo kăn teăng mâ Kuô̆k hô̆i ƀă kăn teăng mâ Hô̆i đong kuăn pơlê hơnăm 2015 ƀă hnê mơhno dêi Hô̆i đong tâ phĭu tơnêi têa.

Klêi kơ’nâi tơpui tơno, tối ‘na tơdroăng châ tơƀrê loi tơngah dêi kuăn pơlê tíu pêi cheăng ƀă tíu ối, 100% kăn teăng mâ veăng Roh hôp hiăng môi tuăn inâi 217 ngế ối tung mâu kơ koan, khu tơrŭm cheăng, tíu cheăng a Tơnêi têa chiâng vâ tơbriêt to pro kăn teăng mâ Kuô̆k hô̆i hneăng má XVI tiô tro pơkâ luât.

Xông tơpui a Roh hôp tơpui tơno, jâ Bùi Thị Minh Hoài, Kăn hnê ngăn Vi ƀan Xiâm Măt trâ̆n Tơnêi têa Việt Nam mơnhên, Roh hôp tơpui roh má pái hiăng kêi đeăng tâi tâng tơdroăng xiâm, tơdroăng pơkâ mơ’no, mơhno hiâm mơno pôu râng hnoăng cheăng, tơdroăng môi tuăn hên dêi mâu kơ koan, khu tơrŭm cheăng, tíu cheăng a Tơnêi têa ƀă kuăn pơlê tíu ối rêh tung tơdroăng tơbleăng mâu ngế ki kơhnâ rơkê, tŭm tiô pơkâ, chiâng vâ tơbriêt to pro kăn teăng mâ Kuô̆k hô̆i hneăng má XVI.

Tơdroăng châ tơƀrê kố mơnhên hnoăng dêi Măt trâ̆n Tơnêi têa Việt Nam tung pơkuâ tơpui tơno, tơniăn kuăn pơlê pơkuâ dêi hnoăng cheăng, ôh tá tơdjâk pa kong, tro pơkâ luât, gum kal khât tung tơdroăng châ tơƀrê dêi roh tâ phĭu.