Klêi kơ’nâi Rôh hôp môi tuăn rôh má pái, Vi ƀan Tâ phĭu Pôk kăn kong pơlê Dak Lak nếo tơrŭm ƀă Khu pơkuâ ngăn Vi ƀan Măt trâ̆n Tơnêi têa Việt Nam kong pơlê tơkŭm po Leh pơcháu Inâi ki păng ‘nâng ngế ki lo tơbriât vâ to pro kăn Kuô̆k hô̆i hneăng XVI ƀă kăn Hô̆i đong hnê ngăn kong pơlê hơnăm 2026 – 2031. A rôh hôp, mâu kăn hiăng séa ngăn krá tơniăn tơdroăng pơkâ athế ai tŭm, troăng hơlâ pơkâ chêh inâi, mâu ngế ki vâ lo tơbriât to pro kăn tiô pơkâ dêi luât, môi tuăn chêh inâi 19 ngế ki ai tŭm tơdroăng ki vâ lo tơbriât to pro kăn Kuô̆k hô̆i hneăng XVI ƀă 141 ngế ai tŭm tơdroăng vâ tơbiât to pro kăn Hô̆i đong hnê ngăn kong pơlê.

A rôh leh, péa pâ lăm ngăn, pơchông hlá mơ-éa Rôh hôp môi tuăn rôh má pái, inâi ngế ki tơbriât to pro kăn; vâ kĭ tơkêa, pơcháu hồ sơ tro pơkâ. Tơdroăng pơcháu cho rôh ki kal vâ Vi ƀan tâ phĭu kong pơlê pơtối tơbleăng pêi mâu hvêa prôk ki pơtối dêi túa pơkâ tâ phĭu, rak tơniăn tơdrăng, tro luât vâ hnoăng cheăng hbrâ ăm rôh tâ phĭu a kong pơlê.