Tơdah khu râ kăn, pôa Lương Nguyễn Minh Triết, Kăn pơkuâ hnê ngăn cheăng Đảng kong pơlê Dak Lak kheăn kơdeăn mâu tơdroăng châ tơƀrê tơrŭm cheăng tung pơla kố nah pơla péa kong pơlê, mơnhên tơrŭm cheăng pơla péa tơnêi têa achê dêi pó hlối nhŏng o há pơtối châ rak krá. Kăn pơkuâ hnê ngăn kong pơlê Dak Lak pói vâ péa pâ mơdêk tơrŭm tâi tâng, ki má  lối cho tung kơvâ cheăng kâ, tê mơdró, mơ’no liăn cheăng, pêi chiâk deăng krá tơniăn; pro tơ’lêi hlâu vâ khu tê mơdró tơdjêp, po rơdâ tê mơdró; tơdrêng amê, tơrŭm krá tơniăn tung pơkuâ, gâk kring tơkăng kong, rak krá tơniăn gâk kring, kring tơniăn.

Pôa Thang Sa Vun, Kăn pơkuâ kong pơlê Kul tối, pói vâ thăm tơpui tơno, tối ăm dêi pó túa ki rơkê tơtro ‘na pêi chiâk deăng kŏng ngê̆ chal nếo, kơmăi kơmok, ôm hyô, gum pro trâu hơhngế tơrŭm nhŏng o, tơrŭm krá tơniăn Việt Nam – Kul.