Leh tơbâ 96 hơnăm hâi mơjiâng Đảng Kŏng san Việt Nam, koh phiu ro châ tơƀrê Hneăng hôp roh má 14 dêi Đảng ƀă hbrâ tơdah Têt Lo hơnăm nếo Bính Ngọ 2026, kơxo lơ 10/2, pôa Tô Lâm, Kăn xiâm pơkuâ hnê ngăn Đảng hiăng troh têk nhang, pleăng rơvĭng reăng tơbâ mâu Kăn pơkuâ hneăng hdrối dêi Đảng ƀă mâu ngoh khên tơnôu hlâ tung tơplâ xâ nah a Hưng Yên ƀă Bắc Ninh.

Tung tơdroăng po kân krip, rơrêk tung hiâm mơno, a Kơpong tơbâ pôa Nguyễn Văn Cừ, Kăn xiâm pơkuâ hnê ngăn Đảng hneăng hdrối (bêng Phù Khê, kong pơlê Bắc Ninh), pôa Tô Lâm, Kăn xiâm pơkuâ hnê ngăn Đảng rơtế Khu râ kăn teăng mâ nhuô̆m pleăng rơvĭng reăng, têk nhang xú hŏm, tơbâ ƀă pâ mơnê hnoăng kân kĭn, veăng gum kân kĭn dêi pôa Nguyễn Văn Cừ, Kăn xiâm pơkuâ hnê ngăn Đảng hneăng hdrối, ngế kŏng san ki kơhnâ, ngế kuăn rơkê dêi hdroâng mơngế Việt Nam ƀă pơlê xiâm Bắc Ninh.

A hngêi tơbâ pôa Nguyễn Văn Linh, Kăn xiâm pơkuâ hnê ngăn Đảng hneăng hdrối (cheăm Nguyễn Văn Linh, kong pơlê Hưng Yên), pôa Tô Lâm ƀă Khu râ kăn teăng mâ pleăng reăng, têk nhang mơhno hiâm mơno pâ mơnê a um pôa Nguyễn Văn Linh, ngế đảng viên môi hiâm mơno, plâ rơxông rêh, tơplâ xâ xua tơniăn krê hdroâng mơngế ƀă chuh ngiah xah hô̆i, kăn pơkuâ môi hiâm, tơmiât pêi rơkê, djâ troăng ahdrối ‘’Tối ƀă Pêi’’, ngế hok tro ki kơhnâ rơkê dêi Pôa Hồ Chí Minh, Kăn xiâm hnê ngăn tơnêi têa hneăng apoăng, ngế kuăn ki kơhnâ rơkê dêi pơlê xiâm Hưng Yên.